Read Timugon Murut 2 TUNUNG RU BANSA' ISRAIL 12 Bible Online

2 TUNUNG RU BANSA' ISRAIL 12 - Timugon Murut bible

2 TUNUNG RU BANSA' ISRAIL 12

¹Kopongo Raja' Rigabiam nangikang ra pamarintaan nano, io am ngaangai' ru mamagun nano nampalilian ra Ukum ru TUHAN.

²Paat ra bilor kalimo ru pamarintaan nano, inukum ilo ru TUHAN sabap ra kalo giminagaya' ilo Riso. Jirusalim binulunsar ru Raja' Sisak, panguasa' ru Misir,

³ra 1,200 kurita' kuda, 60,000 ngaulun saujor mangkuda, am saujor-saujor ondo' kalo maalap ra untob, nakaaya' niayuk saujor ru Libia, Suki am Itiopia.[18]

⁴Raja' Sisak nampagaau ra bandar-bandar ru Jiuda ondo' mokoondo' ra kubu am naginjul saboi ra Jirusalim.

⁵Nabi Simaya minuma' ra Raja' Rigabiam am tingganai-tingganai ru Jiuda ondo' natimung giu' ra Jirusalim koson nagiru' intor ra Raja' Sisak. Kon ri Simaya risilo, “Rongogo' ragu ru TUHAN, ‘Nangiruan kano Raki'; raino mangiruan Aku ramuyun saboi kuasaan kau ri Sisak.’ ”

⁶Raja' am tingganai-tingganai no nangiou ra makatula ilo noyo. Konilo, “Atan ondo' binaal ru TUHAN no matimpok.”

⁷Pokorongog TUHAN ra ragu-ragu nilo, indagu Io poyo ri Simaya, “Sabap ra nangiou ilo ra tula nilo, kalo lingonon Ku pusoon ilo. Paat ri Sisak mamulunsar, polosoon ilo mamayag ra inan, am Jirusalim kalo lunsayon.

⁸Kabalu' pana raginio, kuasaan ilo ri Sisak; bagu no makapandai ilo ra nansala' mangandoi ayuk Raki' am mangandoi ayuk ra pamarintaan ru tana' ti.”

⁹Koon raginio noyo Raja' Sisak siminubol ra Jirusalim am nampagaau ra rapu' giu' ra Baloi ru TUHAN am giu' ra istana. Inalap no ngaangai' no nakaaya' perisai-perisai mas ondo' binaal ru Raja' Salomo.

¹⁰Koson pamalit ra perisai-perisai mas no, nambaal Raja' Rigabiam ra perisai-perisai gangsa'. Pinalansan ru raja' ngaangai' perisai no ra pagawai-pagawai ondo' pinangandoi magalung ra kulobon-kulobon ru istana.

¹¹Moonong raja' no mumpos ra Baloi ru TUHAN, ulun-ulun magalung mangakat ra perisai-perisai, am malupus raginio, pasagulion nilo ngaangai' no ra lamin ru magalung.

¹²Sabap ra raja' minggana' guang giu' ra saang ru TUHAN, am sabap ra lakat poyo mokoondo' baal-baal moonsoi giu' ra Jiuda, sangit pana ru TUHAN ra Raja' Rigabiam natabinaasan am kalo nampalingon namuso riso.[19]

¹³Raja' Rigabiam namarinta giu' ra Jirusalim am kuasa' nano riminuang. Paat ra io nasauk ra raja', umur nano apat ngoopor am rondo' ngambilor. Buoi mopor am tulu' ngambilor, namarinta io giu' ra Jirusalim, bandar ondo' pinili' ru TUHAN giu' ra titikop ru wilayah Israil koson ra intok sambayangan Riso. Ina' ru Raja' Rigabiam iono i Naama, intor ra Amon.

¹⁴Raja' Rigabiam nambaal ra kalaatan sabap ra kalo minirot io nambaal ra kasagaan ru TUHAN.

¹⁵Binaal ru Raja' Rigabiam intor ra talimpuun polos ra pupus, am niayuk tinulisan intor ra sasambaloi nano, mokoondo' ra ralalom ru kitab Sejarah ru Nabi Simaya am kitab Sejarah ru Nabi Ido. Raja' Rigabiam am Raja' Jirobiam magail mangayou.

¹⁶Raja' Rigabiam minatoi am linobong giu' ra kalabangan ru raja' giu' ra bandar Daut, am anak ungkuyon nano, i Abia, namalit riso koson ra raja'.