Read Timugon Murut 2 TUNUNG RU BANSA' ISRAIL 14 Bible Online

2 TUNUNG RU BANSA' ISRAIL 14 - Timugon Murut bible

2 TUNUNG RU BANSA' ISRAIL 14

¹[21] Raja' Abia minatoi am linobong giu' ra kalabangan ru raja' giu' ra Bandar Daut. Anak nano i Asa namalit riso koson ra raja'. Ragana' ra pamarintaan ru Raja' Asa, Jiuda mamimio buoi mopor ngambilor.

²Sabap ra binaal nano ondo' moonsoi am matimpok, Raja' Asa iniou ru TUHAN, i Aki Kapuuno' nano.

³Pinatiran ru Raja' Asa altar-altar ru bansa' ra bokon am intok-intok sambaan ra sinungkalalaing. Ginaba' no lugu'-lugu' sinungkalalaing am batu-batu pangkaraan ru Dewi Asyira.

⁴Nanusub io ra mamagun ru Jiuda mambaal ra kasagaan ru TUHAN, i Aki Kapuuno' ru kinamatuaan nilo, am gumagaya' ra pangilaan am susuban Nano.

⁵Sabap ra pinatiran no intok-intok sambaan ra sinungkalalaing am altar-altar ru kaminyan giu' ra ngaangai' bandar ru Jiuda, pamarintaan no mamimio ragana' ru pamarintaan nano.

⁶Nambaal io ra kubu ra bandar-bandar Jiuda paat raginio, am buoi ru kukula' ngambilor pangayawan kalo nasauk, sabap ra TUHAN nanaak ra kaansayan riso.

⁷Indagu Raja' Asa ra mamagun ru Jiuda, “Ibok takano mambaal ra timbok-timbok, manara-manara am kulobon-kulobon garabang ondo' makaalor koson mamiot ra bandar-bandar ti. Makuasa' takau pagun ti sabap ra nambaal takau ra kasagaan ru TUHAN, i Aki Kapuuno' takau. Nanindung Io ritakau am nangani' ra kaansayan ra titikop ru pagun takau.” Koon raginio noyo ilo nanalimpuun ra pambaalan am nomongo ra kandoi no ra matanda'.

⁸Raja' Asa mokoondo' ra saujor suang 300,000 ngaulun intor ra Jiuda, inukapan ra perisai am tutura', am 280,000 ngaulun intor ra Binjamin, inukapan ra perisai am busur. Ngaangai' ru saujor no intor ra saujor ondo' nakaigila' am mapanggol ra baani.

⁹Rondo' paat ra sangulun bansa' ru Itiopia ininggalanan ri Jirag namulunsar ra Jiuda nabaya' ra saujor ra suang no sajuta' ngaulun am 300 kurita' kuda. Nakasaboi ilo polos ra Marisa.

¹⁰Raja' Asa miningkual koson manggal ri Jirag, am sigagama' nangatang ra saujor giu' ra Limayak Jipata mamaar ra Marisa.

¹¹Nakiasi' Raja' Asa ra TUHAN, i Aki Kapuuno' nano, “Iou TUHAN, masaga' kou mangindangan ra saujor ondo' malawo koson Okou mangindangan ra pulalai ondo' maikang. Raino indangano' akai, iou TUHAN, i Aki Kapuuno' mai, sabap ra lumansan akai Rirun. Ralalom inggalan Muno, akai raino mingkual mangayou ra saujor ondo' maayo ti. Okou no i Aki Kapuuno' mai, iou TUHAN; kolondo' osoi pana malansan makapangala Rirun.”

¹²Paat ra Raja' Asa am saujor ru Jiuda namulunsar, kinala ru TUHAN saujor ru Itiopia. Nagigiru' ilo,

¹³Raja' Asa am saujor nano pana nangilou risilo saboi ra Girar. Masuang kaga' ulun ru Itiopia ondo' minatoi. Saujor ru Itiopia nasauk ra malawo saboi ilo kalo maikang am mampatoi.[22] Kinala ilo ru TUHAN am saujor Nano. Saujor ru Jiuda nakaalap ra masuang kaga' kuliamos ginaau.

¹⁴Kopongo raginio nakasugut ilo nampalunsai ra bandar-bandar giu' ra liliut ru Girar sabap ra TUHAN nangkinibit ra mamagun ra giu' no nangalaa'. Saujor ru Jiuda nampagaau ra ngaangai' bandar no am nakaalap ra masuang kaga' kuliamos ginaau.

¹⁵Ilo niayuk namulunsar ra kukula' pangkiman ru magagalung am nampagaau ra masuang domba am unta. Ilo pana minuli' boo ra Jirusalim.