Read Timugon Murut 2 TUNUNG RU BANSA' ISRAIL 20 Bible Online

2 TUNUNG RU BANSA' ISRAIL 20 - Timugon Murut bible

2 TUNUNG RU BANSA' ISRAIL 20

¹Kukula' buoi raiti, saujor ru Moab am Amon nababaya' ra paguguum nilo saujor ru Miunim,[26] namulunsar ra Jiuda.

²Kukula' ngaulun sinusub minuma' ra Raja' Josapat am nambala' riso, “Pulalai mangayou ondo' maayo intor ra Idom minatong intor ra sandaup ru Raat Matoi koson mamulunsar rirun. Ginaau nilo noyo Gajajon-Tamar.” (Gajajon-Tamar iono inggalan ra bokon ru In-Gidi.)

³Raja' Josapat malaa' am pakiasi' boo ra TUHAN nakitulu'. Io pana nanusub boo ra mamagun maa' raginio mampali.

⁴Intor ra moonong bandar giu' ra Jiuda, mamagun mongoi ra Jirusalim koson makiindangan ra TUHAN.

⁵Mababaya' ra mamagun ru Jirusalim, timinimung ilo giu' ra liliut bagu ra Baloi ru TUHAN. Bigor Raja' Josapat ra saang ru mamagun

⁶am pakiasi' boo ra bolos mosongou, “Iou TUHAN, i Aki Kapuuno' ru kinamatuaan maili, intor ra panturungan Muno giu' ra suruga', namarinta Kou ra bansa'-bansa' ra tana' ti. Okou makakuasa' am maikang kaga'! Kolondo' osoi pana makaanggal Rirun.

⁷Okou no i Aki Kapuuno' mai. Paat ra ulun Muno Israil minanding ra pagun ti, pinagiru' Mu bansa' ondo' minayan ragiti am nangani' ra tana' ti ra papag ri Abragam, rangan Muno, koson masauk ra tungkuson nilo ra sabubuoi no.

⁸Minayan ilo noyo ragiti am nambaal rondo' baloi sambayangan koson mangurumat Rirun. Nakapandai ilo

⁹ra amon ru ukumin ilo ra karaat, iou pana ru pangayawan,[27] maruol tumapik, kapoam bitilan, makaratong ilo Rirun am migor ra saang ru baloi sambayangan ti. Paat ralalom ru kapaganan, makapakiasi' ilo Rirun am morongog Mu ilo am mangindangan risilo.

¹⁰Raino ulun ru Amon, Moab am Idom mamulunsar ramon. Paat ra kinamatuaan maili miningkual intor ra Misir ragili, kalo nangiou Kou risilo sumubol ra pagun raginilo. Ginio ra minaya' ilo ra ralan lumiput am kalo namuso ra bansa'-bansa' no.

¹¹Raino ilai' ralan nilo mambalos ramon — matong ilo koson mapagiru' ramon intor ra tana' ondo' tinaakan Muno ramon.

¹²Okou no i Aki Kapuuno' mai! Ukumi' noyo ilo, sabap ra kalo maikang akai manggal ra saujor maayo ondo' mamulunsar ramon. Kalo makapandai akai atan musiti' mai baalon, kaa' matong akai Rirun makiindangan.”

¹³Ngaangai' bala ru ungkuyon ru Jiuda, mababaya' ra anak andu' nilo, migor giu' ra Baloi ru TUHAN.

¹⁴Ambiluo ru TUHAN pana nanguasa' ra sangulun Liwi ondo' siminaang giu' ra tatanga' ru ulun masuang no. Inggalan nano i Jagajiil anak ri Jakaria, sangulun intor ra bansa' ru Asap, iono papag ri Binaya, i Jiyil am i Matanya.

¹⁵Kon ri Jagajiil, “Okou raja' am ngaangai' mamagun ru Jiuda am Jirusalim, minindagu TUHAN ra akau pai' kalawo guang am malaa' makauma' ra pulalai ondo' maayo ti, sabap ra ondo' mangayou sala' ka akau, kaa' i Aki Kapuuno'.

¹⁶Susuab no pangayou no risilo, paat ra ilo magaloi ra Ginting Jiis. Makatuum kau risilo giu' ra pompor ru limayak ondo' sumuku' ra tana' kaagisan mamaar ra Jiruil.

¹⁷Kalo pana mangayou kau ralalom ru pangayawan ti. Alapo' noyo intok min am paginaa no. Makakito kau ra TUHAN mangani' ramuyun ra kamanangan. Pai' no kalaa' kapoam pagantangan, akau mamagun ru Jiuda am Jirusalim! Uma' kano ra pantula'; TUHAN mabaya' ramuyun!”

¹⁸Kopongo raginio Raja' Josapat igulatur am ngaangai' mamagun pana migulatur nababaya' riso am samba ra TUHAN.

¹⁹Bansa' ru Kigat am Kora intor ra bansa' ru Liwi minigor, pagilakup ra nagindii boo mongompor ra TUHAN, i Aki Kapuuno' ru Israil.

²⁰Nokorondom ra suabon no ilo ngaangai' minongoi ra tana' kaagisan mamaar ra Tikoa. Paat ra ilo minintor, kon ru Raja' Josapat risilo, “Mamagun kau ru Jiuda am Jirusalim, pangintopot no ra TUHAN, i Aki Kapuuno' min, am akau pana mokoorot! Pangintopot no ra bilin ru nabi-nabi Nano, am akau pana makasugut.”

²¹Pakapansusunur ra mamagun, panusub raja' ra kukula' ngaulun maririmbai maa' raginio mambayang ra ondo' kaindalaman bayangon ra upacara-upacara ru ugama. Ulun-ulun maririmbai no musiti' mugar giu' ra saang ru saujor liliwa' marimbai, “Omporo' noyo TUHAN! Togom Nano mantilayun!”

²²Paat ra ilo tumalimpuun marimbai, napatabual TUHAN ra kajajawan giu' ra tatanga' ru pantula' ondo' mamulunsar risilo.

²³Saujor ru Amon am Moab mamulunsar ra saujor ru Idom am namuso raginio ra malingon. Kopongo raginio ilo no poyo mampapatoi ra rondo' am bokon ra moporos.

²⁴Paat ra saujor ru Jiuda nakasaboi giu' ra rondo' manara giu' ra tana' kaagisan, nagilong ilo ra tampilon ru pantula' am nakakito ra ngaangai' pantula' minatoi nakalangan ra tana'. Kolondo' sangulun pana intor ra saujor ru pantula' ondo' naayag.

²⁵Raja' Josapat am saujor nano minongoi pangalap ra kuliamos-kuliamos ru pantula'. Nakaalap ilo ra masuang bibiag tinambiag,[28] linutu', konoon am kuliamos-kuliamos mologo. Buoi talu ngoorou ilo nanimung ra kuliamos inalap no, kaa' kalo nakai' nilo kaalap sabap ra kuliamos raginilo masuang kaga'.

²⁶Paat ra orou kaapat, timinimung ilo giu' ra Limayak Biraka, am nongompor ra TUHAN ra tayar ru ngaangai' ondo' binaal Nano. Ginio noyo sabap ra limayak no ininggalanan ra Limayak Biraka.[29]

²⁷Koon raginio noyo Raja' Josapat naningganai ra saujor nano siminaguli' ra Jirusalim nabaya' ra kamanangan, sabap ra TUHAN nangala ra pantula' nilo.

²⁸Paat ra ilo nakasaboi giu' ra bandar, minongoi ilo ra Baloi ru TUHAN, am sinumbaya' ra jitor am bujung.

²⁹Moonong bansa' nangalaa' paat nokorongog ra binaal ru TUHAN nangala ra pantula' ru Israil.

³⁰Koon raginio noyo Raja' Josapat nakapamarinta ra kaansayan, am nangani' i Aki Kapuuno' ra Raja' Josapat ra kamiaan giu' ra titikop ru pagun.

³¹Raja' Josapat nasauk ra raja' ru Jiuda paat ra io makaumur talu ngoopor am limo ngambilor, am namarinta io giu' ra Jirusalim buoi ruo ngoopor am limo ngambilor. Ina' nano i Ajuba anak ri Silgi.

³²Koson ra ama' nali ragili, nambaal Raja' Josapat ra atan ondo' motopot ra mato ru TUHAN,

³³kaa' intok-intok sambaan ra sinungkalalaing kalo linunsai. Mamagun kalo poyo niayuk sumambayang ra sotopot ru guang ri Aki Kapuuno' ru kinamatuaan nilai.

³⁴Ngaangai' binaal ru Raja' Josapat, intor ra talimpuun ru pamarintaan nano saboi ra pupus, tinulisan giu' ra ralalom ru kitab Sejarah ri Jigu Anak ri Ganani, iono santayaran intor ra kitab Sejarah ru Raja'-Raja' ru Israil.

³⁵Rondo' paat, Raja' Josapat nakimabukat ra Raja' Agajia intor ra Israil, ondo' nambaal ra masuang kalaatan.

³⁶Nambaal ilo ra kapal-kapal maayo giu' ra Ijion-Gibir,

³⁷kaa' i Iliijir anak ri Dodawa intor ra bandar Marisa nampakara' ra Raja' Josapat. Kono, “Sabap ra okou nakimabukat ra Raja' Agajia, pusoon ru TUHAN atan ondo' binaal muno.” Kopongo raginio kapal-kapal ondo' binaal no napuso am kalo noyo boo makapasundoi.