Read Timugon Murut 2 TUNUNG RU BANSA' ISRAIL 25 Bible Online

2 TUNUNG RU BANSA' ISRAIL 25 - Timugon Murut bible

2 TUNUNG RU BANSA' ISRAIL 25

¹Raja' Amajia nasauk ra raja' paat io makaumur ruo ngoopor am limo ngambilor, am namarinta io giu' ra Jirusalim buoi ruo ngoopor am siam ngambilor. Ina' nano i Joadan intor ra Jirusalim.

²Binaal ru Raja' Amajia atan ondo' mapabansuk ra guang ru TUHAN, kaa' kalo binaal no ginio ra sototopot ru guang.

³Kopongo ayuk pamarintaan nano maikang, pinatoi no ngaangai' pagawai ondo' namatoi ra ama' nano ragili,

⁴kaa' kalo pinatoi no anak-anak nilo. Siminugut Raja' Amajia ra atan ondo' sinusub ru TUHAN ralalom ru Ukum ri Musa ondo' bolos no koon ragitio, “Matuo kalo ukumin sabap ra kasalaan ru anak nilo. Anak kalo ukumin sabap ra kasalaan ru matuo nilo. Moonong ulun iowon ayuk ukumin sabap ra kasalaan ondo' binaal nano galama'.”

⁵Tinimung ru Raja' Amajia ngaangai' ulun ru bansa' ru Jiuda am Binjamin. Tinayar no ilo nasauk ra kukula' pulalai ru saujor sumugut ra bansa' ru sigagama'. Linantik no pagawai koson maningganai ra moonong pulalai no; mokoondo' pulalai ondo' suang no saribu ngaulun, am mokoondo' niayuk ondo' suang no maatus ngaulun. Ulun ru pulalai no nakaaya' ngaangai' ungkuyon ondo' makaumur nakasail ra ruo ngoopor ngambilor. Ngaangai' nilo suang no 300,000 ngaulun. Ilo ulun ondo' pinili', ondo' timinampos koson mampatoi, am mapandai manantutura' am manamperisai.

⁶Suai raginio Raja' Amajia niayuk nampagaji' ra 100,000 ngaulun saujor intor ra Israil ra olo'-olo' 3,400 ngakilogram pirok.

⁷Kaa' mokoondo' sangulun nabi minuma' ra raja' am indagu riso, “Pai' ibito' saujor-saujor ru Israil ti mababaya' rirun sabap ra TUHAN kalo mangindangan ra ulun intor ra Pamarintaan ru Ralayo.

⁸Indoson mu ra mangikang ilo ra pulalai muno paat ra mampapatoi, kaa' i Aki Kapuuno' ayuk ondo' makakuasa' mangani' ra kamanangan kapoam kakalaan. Polosoon ri Aki Kapuuno' pantula' mangala rirun.”

⁹Pangkuot Raja' Amajia ra nabi no, “Kaa' ati kulaan kia ra ngaangai' pirok ondo' tinaakan ku noyo koson mampagaji' risilo?” Taam nabi no, “TUHAN makapangani' ra masuang poyo intor raginio rirun!”

¹⁰Ginio ra Raja' Amajia nanusub ra pulalai ondo' ginajian no muli'. Kopongo raginio minuli' ilo kaa' siminangit kaga' ra mamagun ru Jiuda.

¹¹Minibaani' Raja' Amajia am paningganai ra saujor nano mongoi ra Limayak Maasin. Giu' no nampapatoi ilo am namatoi ra 10,000 ngaulun saujor ru Idom,

¹²am namparakop ra suang 10,000 ngaulun poyo. Inibit nilo ulun rinakop no giu' ra tampak ru bulur batu giu' ra bandar Sila, am namatir risilo ra ragana' saboi minatoi nakabanta' ra rasawat ru batu.

¹³Liliwa' raginio pulalai ru Israil kalo iniou ru Raja' Amajia maya' riso mangayou minongoi noyo pamulunsar ra bandar-bandar Jiuda giu' ra lolot ru Samaria am Bit-Oron, am namatoi ra 3,000 ngaulun. Nampagaau ilo niayuk ra masuang kuliamos.

¹⁴Paat ra Raja' Amajia minuli' intor ra pangayawan ra ulun ru Idom, inibit no minuli' sinungkalalaing ru ulun ru Idom am pinosoroi ngaangai' no giu' ra Jiuda. Io pana sumamba boo ra sinungkalalaing am nonolob ra kaminyan ra sinungkalalaing no.

¹⁵Binaal raginio nampasingkual ra sangit ru TUHAN, am Io pana nanusub ra sangulun nabi mongoi ra Raja' Amajia. Pangkuot nabi no riso, “Kua kia rirun sumamba ra dewa-dewa ru bansa' ra bokon ondo' kalo makapamayag ra ulun sumamba ra dewa-dewa galama' intor ra kuasa' muno raja'?”

¹⁶Kaa' pinutat ru Raja' Amajia ragu am indagu, “Intor sanggilan kia akai nampalantik rirun nasauk ra paminson ru raja'? Pongkoror, amon ru kalo, potoyon kou!” Kalo poyo nongkoror nabi no, indagu io, “Raino bagu no mapandayan ku ra mingkotog i Aki Kapuuno' koson mamuso rirun sabap ra ngaangai' ru binaal muno, am niayuk sabap ra kalo linio mu pinson kutu.”

¹⁷Raja' Amajia intor ra Jiuda am ulun-ulun maminson riso naguguum manggal ra Israil. Nangator io ra sangulun sinusub mongoi ra raja' ru Israil, iono Raja' Jigoas anak ungkuyon ru Raja' Jigoagas, akupu ru raja' Jigu, koson makimangayou riso.[37]

¹⁸Inataran ru Raja' Jigoas ulun sinusub no siminaguli' ra Raja' Amajia nabaya' ra taaman ragitio, “Rondo' paat ra bulungkut makaruui giu' ra kagunungan Libanon nangator ra tanou ra tataun sidar, ‘Iowo' noyo anak ruandu' muno magandu' ra anak ungkuyon kuno.’ Kaa' sanginan bibiag masigo nansail ra giu' no nanginginjang ra bulungkut makaruui no.

¹⁹Okou Raja' Amajia, lumimbau-limbau kou sabap ra kinala mu noyo ulun ru Idom; kaa' maminson aku rirun maa' raginio morondon ayuk ra baloi. Kua paguguyum ra kapaganan ondo' pupus no mamparatong ra karaat rirun am mamagun muno?”

²⁰Raja' Amajia kalo nampalio ra pinson no. Ginio noyo kasagaan ru TUHAN maa' raginio Raja' Amajia kalaan, sabap ra sinamba no ngaangai' sinungkalalaing ru ulun ru Idom.

²¹Ginio ra Raja' Jigoas intor ra Israil mangayou ra Raja' Amajia intor ra Jiuda. Nampapatoi ilo giu' ra Bit-Simis giu' ra Jiuda.

²²Pulalai ru saujor ru Jiuda kinala, am saujor-saujor pana nagigiru' ra baloi ru sigagama'.

²³Raja' Jigoas namparakop ra Raja' Amajia am inibit io ra Jirusalim. Giu' no ginaba' ru Raja' Jigoas timbok ru bandar ra galur no maar 200 ngamito intor ra Kulobon Garabang Ipraim saboi ra Kulobon Garabang Pisuk.

²⁴Ngaangai' mas am pirok giu' ra Baloi ru TUHAN, am niayuk ngaangai' kuliamos ondo' inalungan ru papag ri Obid-Idom, niayuk ngaangai' rapu' ru istana, inibit no giu' ra Samaria. Raja' Jigoas niayuk nagibit ra kukula' ngaulun rinakop.

²⁵Raja' Amajia, raja' ru Jiuda, naayag mopor am limo ngambilor nabuoi poyo intor ra Raja' Jigoas, raja' ru Israil.

²⁶Ngaangai' binaal ru Raja' Amajia, intor ra talimpuun polos ra pupus ru pamarintaan nano, tinulisan ra ralalom ru kitab Sejarah Raja'-Raja' Jiuda am Israil.

²⁷Intor ra Raja' Amajia giminuor ra TUHAN, naguguum ulun manggal riso giu' ra Jirusalim. Pupus no, nagiru' io ra bandar Lakgis, kaa' pantula' nano nangilou riso am namatoi riso.

²⁸Baangkai nano inibit ra Jirusalim giu' ra rasawat ru sanginan kuda, am linobong giu' ra kalabangan ru raja' giu' ra Bandar Daut.