Read Timugon Murut 2 TUNUNG RU BANSA' ISRAIL 29 Bible Online

2 TUNUNG RU BANSA' ISRAIL 29 - Timugon Murut bible

2 TUNUNG RU BANSA' ISRAIL 29

¹Raja' Gijkia nasauk ra raja' ru Jiuda paat ra io makaumur ruo ngoopor am limo ngambilor, am namarinta io giu' ra Jirusalim buoi ruo ngoopor am siam ngambilor. Ina' nano i Abia anak ri Jakaria.

²Nambaal Raja' Gijkia ra atan ondo' kasagain ru TUHAN, koson ra kinamatuaan nali Raja' Daut.

³Paat ra sila' kasaa' nalupus Raja' Gijkia nasauk ra raja', inukaban no saguli' ngaangai' kulobon garabang ra Baloi ru TUHAN am niayuk namuna' raginio.

⁴Tinimung ru Raja' Gijkia imam-imam am ulun-ulun ru Liwi giu' ra liliut tampilon sirangon Baloi ru TUHAN.

⁵Raja' Gijkia minindagu risilo ra giu' no. Kono, “Akau ulun ru Liwi musiti' patimpokon inan ra tayar ru TUHAN am mamasau ra Baloi ru TUHAN, i Aki Kapuuno' min. Patiri' noyo ngaangai' kuliamos ondo' mampajamol ra Baloi ru TUHAN.

⁶Kinamatuaan takali kalo giminagaya' ra TUHAN, i Aki Kapuuno' takau. Binaal nilo atan ondo' kalo kasagain Nano. Inimpayan nilo Io am kalo nampalio ra intok ayanan Nano.

⁷Inangaban nilo Baloi ru TUHAN am linasaan lampung ra giu' no. Kalo boo nonolob ilo ra kaminyan, kapoam mampataak ra taak simbalui koson mapabansuk ra guang ru TUHAN[39] giu' ra Baloi ru TUHAN, ri Aki Kapuuno' ondo' sambaan ru ulun ru Israil.

⁸Ginio ra siminangit TUHAN ra Jiuda am Jirusalim. Akau ngaangai' makapandai ra binaal ru TUHAN mangkinibit ra moonong ulun makatigog am malaa'.

⁹Kinamatuaan takau pinatoi giu' ra intok pangayawan, am anak andu' takau rinakop.

¹⁰“Raino aruon ku koson mambaal ra nabantuan ra TUHAN, i Aki Kapuuno' ru Israil, maa' raginio Io kalo boo sumangit ritakau.

¹¹Akau anak ku ngaangai', pai' no kalibut. Akau no ondo' pinili' ru TUHAN koson monolob ra kaminyan Riso, am niayuk maningganai ra mamagun koson sumamba Riso.”

¹²Gitilo noyo ulun ru Liwi ondo' siminaang paat raginio: Intor ra bansa' ri Kigat: Magat anak ri Amasai am Joil anak ri Ajaria. Intor ra bansa' ri Mirari: Kis anak ri Abdi am Ajaria anak ri Jigalilil. Intor ra bansa' ri Girson: Joa anak ri Jima am Idin anak ri Joa. Intor ra bansa' ri Ilisapan: Simri am Jiyil. Intor ra bansa' ri Asap: Jakaria am Matanya. Intor ra bansa' ri Giman: Jiwil am Simii. Intor ra bansa' ri Jidutun: Simaya am Ujiil.

¹⁵Pinatimung nilo ulun ru Liwi intor ra bansa' ru sigagama', am ilo ngaangai' pana namasau ra inan. Koson ra ondo' rinagu ru raja', namasau ilo ra Baloi ru TUHAN sumugut ra Ukum ru TUHAN.[40]

¹⁶Imam-imam siminubol ra Baloi ru TUHAN koson mamasau raginio. Pinaingkual nilo ngaangai' kuliamos majamol ra liliut. Intor ra giu' no ulun-ulun ru Liwi nagibit ra kuliamos-kuliamos majamol no ra liwar ru bandar, giu' ra Limayak Kidron.

¹⁷Kandoi no tinalimpuunan paat ra orou kasaa' ra sila' kasaa'. Paat ra orou kabalu', nopongo ilo namasau ra titikop liliut ra Baloi ru TUHAN saboi ra lamin ra saang. Rinayusan nilo poyo kandoi no buoi balu' ngoorou. Paat ra orou koopor am onom sila' raginio, nopongo ilo namasau ra Baloi ru TUHAN.

¹⁸Nangani' ulun-ulun ru Liwi ra Raja' Gijkia ra pambalaan ragitio, “Nopongo mai noyo namasau ra titikop Baloi ru TUHAN, nakaaya' altar intok mampataak ra taak simbalui koson mapabansuk ra guang ru TUHAN,[41] am mija' ru ruti' pinasulung, am ngaangai' kuliamos no.

¹⁹Pinasaguli' mai niayuk ngaangai' kuliamos ondo' inalap ru Raja' Agas paat ra io kalo giminagaya' ri Aki Kapuuno' bulintok ra pamarintaan nali. Ngaangai' ru kuliamos no patimpokon mai noyo saguli' koson ra TUHAN, am raino ngaangai' no soroi giu' ra saang ru altar.”

²⁰Mataki' Raja' Gijkia nanimung ra tingganai-tingganai ru bandar no, am siminubol ra ralalom Baloi ru TUHAN nababaya' risilo.

²¹Koson ra taak koson mamuso ra tula ru sasambaloi ru raja' am niayuk tula ru mamagun ru Jiuda, am koson mamasau ra Baloi ru TUHAN, nagibit ilo tulu' ngainan sapi' gawayan, tulu' ngainan domba gawayan, tulu' ngainan anak domba, am tulu' ngainan kambing gawayan. Nanusub raja' ra imam-imam papag ri Arun mampataak ra ngaangai' bibiag no koson ra taak simbalui giu' ra rasawat ru altar.

²²Imam nanimbalui galing ra sapi' gawayan, am domba gawayan boo, am anak domba boo. Pinatakis nilo raraa' ru moonong taak simbalui no giu' ra rasawat ru altar.

²³Pupus no inibit nilo kambing gawayan ra raja' am mamagun, am pabantaa' nilo boo kalindu' giu' ra rasawat ru bibiag no.

²⁴Kopongo raginio, imam-imam nanimbalui ra kambing-kambing am pasasaro' raraa' ru kambing giu' ra rasawat ru altar, koson mamuso ra tula ru ngaangai' mamagun, sabap ra nanusub noyo raja' risilo mampataak ra taak simbalui koson mapabansuk ra guang ru TUHAN am taak simbalui koson mangampun ra tula ru ngaangai' mamagun ru Israil.

²⁵Minaya' Raja' Gijkia ra susuban ondo' tinaakan ru TUHAN ra Raja' Daut ondo' pinabala' galing ri Gad, nabi ondo' nangandoi ra Raja' Daut, am ondo' pinabala' galing ri Nabi Natan. Pinosoroi ru Raja' Gijkia ulun ru Liwi giu' ra ralalom Baloi ru TUHAN koson mangkuli ra jitor am simbal,

²⁶kuliamos miujik koson ra pinakai ru Raja' Daut ragili. Imam-imam minigor niayuk ra giu' no ra bujung.

²⁷Nanusub Raja' Gijkia maa' raginio taak simbalui koson mapabansuk ra guang ru TUHAN pataakon. Liliwa' taak simbalui pataakon, mamagun narimbai ra rimbai pangamparan ra TUHAN, am ulun-ulun mangkuli ra miujik pana tumalimpuun manamput ra bujung am mangkuli ra kuliamos miujik ra bokon.

²⁸Moonong ulun ra giu' no maya' sumambayang, ulun-ulun maririmbai no marimbai, am ulun-ulun mangkuli ra miujik narayus nangkuli saboi ngaangai' taak simbalui nakai' sinolob.

²⁹Kopongo raginio Raja' Gijkia am ngaangai' mamagun migulatur am samba ri Aki Kapuuno'.

³⁰Raja' am tingganai-tingganai ru bansa' nanusub ra ulun-ulun ru Liwi marimbai ra rimbai pangamparan ra TUHAN, rimbai ondo' sinulabit ru Raja' Daut am Nabi Asap. Ngaangai' boo ru ulun narimbai ra naansukan liliwa' migulatur am samba ri Aki Kapuuno'.

³¹Indagu Raja' Gijkia ra mamagun, “Raino inan min patimpokon noyo ra TUHAN, ginio ra pampataak kano ra taak simbalui ra paringkuanangan min ra TUHAN.” Ginagaya' nilo susuban no, am mokoondo' poyo intor risilo ondo' masaga' magibit ra bibiag-bibiag koson pataakon koson ra taak simbalui koson mapabansuk ra guang ru TUHAN.

³²Nagibit ilo ra 70 ngainan sapi' gawayan, 100 ngainan domba gawayan, am 200 ngainan anak domba koson ra taak simbalui koson mapabansuk ra guang ru TUHAN.

³³Nagibit ilo niayuk ra 600 ngainan sapi' gawayan, am 3,000 ngainan domba koson pataakon am akanon mabaya' ra ngaangai' ulun ondo' siminaang.

³⁴Sabap ra imam ondo' namasau ra inan sanganu ayuk kaga' suang nilo koson manimbalui ra ngaangai' bibiag no, nangindangan ulun-ulun ru Liwi risilo saboi kandoi no nopongo. Ulun-ulun ru Liwi giminagaya' poyo toojo ra aturan ru pamasawan, am narayus ilo nangindangan saboi naukop imam ondo' mamasau ra inan.

³⁵Suai ra mampataak ra taak simbalui koson mapabansuk ra guang ru TUHAN, imam-imam niayuk nampataak ra lomok intor ra taak-taak simbalui ondo' inakan ru mamagun. Imam-imam niayuk nampataak ra wain nabaya' ra taak simbalui koson mapabansuk ra guang ru TUHAN. Koon raginio noyo sambayang giu' ra Baloi ru TUHAN pinatalimpuun saguli'.

³⁶Naansukan Raja' Gijkia am mamagun sabap ra i Aki Kapuuno' nangindangan risilo nambaal ra ngaangai' baal raginio ra mataki' toojo.