Read Timugon Murut 2 TUNUNG RU BANSA' ISRAIL 32 Bible Online

2 TUNUNG RU BANSA' ISRAIL 32 - Timugon Murut bible

2 TUNUNG RU BANSA' ISRAIL 32

¹Kopongo Raja' Gijkia nambaal ra baal-baal ondo' nampakito ra gagaya' nano ra TUHAN, Raja' Sanirib, intor ra pagun ru Asyur namulunsar ra Jiuda. Raja' Sanirib nagawang ra bandar-bandar ondo' mokoondo' ra kubu, am nanusub ra saujor nano maa' raginio mampagaau ra bandar no.

²Paat ra Raja' Gijkia nakapandai ra Raja' Sanirib gumogot koson mamulunsar ra Jirusalim,

³Raja' Gijkia am pagawai-pagawai nano namatas koson mononsong ra babayaan ru timug giu' ra liwar ru bandar maa' raginio ulun ru Asyur kalo makaalap ra timug paat ra ilo minggaar ra Jirusalim. Panusub pagawai-pagawai ra masuang ulun mingkual koson mononsong ra mato ru timug saboi kolondo' boo timug ondo' mingkual intor ra mato ru timug no.

⁵Raja' Gijkia namiot ra kaikangan ru bandar ra namuna' ra timbok am niayuk nambaal ra manara-manara ra rasawat no,[45] am niayuk rondo' lapis ru timbok poyo giu' ra tampilon ra liwar. Suai raginio, pinuna' ru Raja' Gijkia kubu ondo' binaal giu' ra rasawat ru tana' pinumpun, giu' ra tampilon sirangon ra Jirusalim lair. Nanusub io niayuk ra ulun mambaal ra masuang tutura' am perisai.

⁶Linantik ru Raja' Gijkia panglima-panglima koson maningganai ra ngaangai' ungkuyon giu' ra bandar no, am nanusub risilo tumimung giu' ra intok malimparang saang ru kulobon garabang ru bandar. Kono risilo,

⁷“Musiti' kau mangintopot am maikang toojo guang. Pai' kalaa' ra raja' ru pagun ru Asyur kapoam saujor ondo' tiningganai nano. Mokoondo' akai ra kuasa' ondo' maayo poyo ra bala takau intor ra atan ondo' giu' ra bala ru raja' no.

⁸Raja' ru Asyur mokoondo' ra kuasa' ru ulun, kaa' itakau mokoondo' ra TUHAN, i Aki Kapuuno' takau, ondo' mangindangan am mangayou ra bala takau.” Mamagun naunsu' ru ragu ru raja' nilo.

⁹Kopongo kukula' buoi, paat Raja' Sanirib am saujor nano soroi giu' ra bandar Lakgis, nangator io ra ulun sinusub koson mampasaboi ra tanou ragitio ra Raja' Gijkia am mamagun ru Jirusalim,

¹⁰“Aku Raja' Sanirib, panguasa' ru pagun ru Asyur, masaga' mangkuot ra sasaban min baani kaga' soroi ayuk ra Jirusalim ondo' pinagawangan.

¹¹Nambala' Raja' Gijkia ramuyun ra TUHAN, i Aki Kapuuno' min mamayag ramuyun intor ra kuasa' mai, kaa' Raja' Gijkia namparuung ramuyun. Mompoloso io ramuyun matoi ra bitilan am paason.

¹²Raja' Gijkia noyo ondo' mamuso ra intok-intok sambayangan ra TUHAN am altar-altar Nano, am nanusub ra mamagun ru Jiuda am Jirusalim sumambayang am monolob ra kaminyan giu' ra rondo' altar ayuk.

¹³Kalo kia nakapandai kau atan ondo' nasauk ra kinamatuaan kuli am aku galama' ra mamagun ru bansa'-bansa' ra bokon? Kalo poyo igondo' dewa ru bansa' ra ati pana mamayag ra mamagun nano intor ra kuasa' ru raja' pagun ru Asyur.

¹⁴Osoi kia ra dewa-dewa ra bansa'-bansa' ru bokon no nakaili' mamayag ra pagun nilo intor ramon? Dewa min kalo lair makapamayag ramuyun.

¹⁵Pai' polosoo' Raja' Gijkia mamparuung kapoam mampalayau ramuyun. Pai' pangintopot riso! Kalo poyo igondo' dewa ru bansa' ra ati pana masaga' mamayag ra pagun nano intor ra raja' ru pagun ru Asyur. Dewa mino pana maaru' kalo makapamayag ramuyun!”

¹⁶Ulun-ulun sinusub ru ulun ru Asyur no minindagu ra masuang poyo ragu ondo' magasab ra TUHAN i Aki Kapuuno' am Raja' Gijkia, ulipon ru TUHAN.

¹⁷Surat ondo' tinulisan ru raja' no manggal ra TUHAN, i Aki Kapuuno' ru Israil. Koon ragitio bolos no, “Dewa ru bansa'-bansa' ru bokon kalo poyo igondo' pamayag ra ulun sumamba ra dewa-dewa raginio intor ra kuasa' kuno, koon niayuk ra dewa ru Raja' Gijkia kalo makapamayag ra mamagun nano intor ra kuasa' kuno.”

¹⁸Ulun-ulun sinusub ru ulun ru Asyur no gogolok mindagu ra suang ru surat no ralalom ragu ru Ibrani koson mampakalalaa' am mampalawo ra guang ru mamagun ru Jirusalim ondo' soroi giu' ra timbok ru bandar, maa' raginio magaau nilo bandar no ra maluoi poyo.

¹⁹Nabaya' ra ragu-ragu, pinogondo' nilo ri Aki Kapuuno' ondo' sambaan giu' ra Jirusalim ra dewa-dewa ru bansa' ra bokon, iono sinungkalalaing binaal ru ulun.

²⁰Raja' Gijkia am Nabi Jisaya anak ri Amos pakiasi' boo ri Aki Kapuuno' am nampiau Riso makiindangan.

²¹Nangator TUHAN ra rondo' malaikat ondo' namatoi ra saujor-saujor am pagawai-pagawai ru saujor pagun ru Asyur. Raja' ru pagun ru Asyur pana minuli' boo ra pagun nano ra nauyu' kaga'. Paat ra sangarawan, paat ra raja' ru Asyur soroi giu' ra kuil ru sinungkalalaing nano, kukula' ngaulun anak ungkuyon nano namatoi riso ra ilang.

²²Koon raginio noyo ralan ru TUHAN namayag ra Raja' Gijkia am mamagun ru Jirusalim intor ra kuasa' ru Raja' Sanirib, panguasa' ru pagun ru Asyur am intor ra pantula' nilo ra bokon. Nangiou TUHAN ra mamagun maayag ra moonsoi[46] am pagun-pagun ra paginggaar.

²³Masuang ulun minatong ra Jirusalim am nagibit ra taak ra TUHAN am tangguang ra Raja' Gijkia. Intor raginio bansa'-bansa' ra bokon mangurumat ra Raja' Gijkia.

²⁴Olo'-olo' paat raginio, narualan Raja' Gijkia saboi maar matoi. Pakiasi' io am nangani' TUHAN ra tatandu' ra mapali' io.

²⁵Kaa' Raja' Gijkia kalo naringkuanang ra napalian ondo' tinaakan ru TUHAN riso sabap malimbau io kaga'. Ginio sabap ra TUHAN nangukum ra mamagun ru Jiuda am Jirusalim.

²⁶Kaa' pupus no, Raja' Gijkia am mamagun ru Jirusalim minggana' guang, am TUHAN pana kalo nangukum risilo buoi ru Raja' Gijkia lakat poyo naayag.

²⁷Raja' Gijkia nasauk ra langkaya' kaga' am moonong ulun mangurumat riso. Nambaal Raja' Gijkia ra intok-intok pambulian ra mas, pirok, intan, apa' pampagamis ra akanon, perisai am kuliamos-kuliamos mologo ra bokon.

²⁸Suai raginio, nambaal io ra intok-intok pambulian ra bokon koson mambuli ra gandum, wain, am umau jaitun am niayuk kandang-kandang koson ra sampanon ru sapi' am domba nano.

²⁹I Aki Kapuuno' niayuk nanaak ra domba am sapi' riso, am niayuk masuang kaga' rapu' ra bokon saboi ra io nakapambaal ra masuang bandar.

³⁰Raja' Gijkia noyo ondo' nongombon ra bayaan ru timug intor ra Taur ru Timug Gigon am nampatilis raginio mansail ra babayaan giu' ra ragana' ru tana' mongoi ra ralalom ru bandar Jirusalim. Nakasugut Raja' Gijkia ralalom ru atan ayuk ondo' binaal nano.

³¹Paat ra ulun-ulun sinusub intor ra Babilonia minatong ra Raja' Gijkia koson mangkuot intor ra kasaukan makaimuag ondo' nasauk giu' ra pagun no, nompoloso TUHAN ra Raja' Gijkia galama' mingkuor, maa' raginio makinaman guang nano.

³²Ngaangai' binaal ru Raja' Gijkia am togom nano ra TUHAN, tinulisan ra ralalom ru kitab Pinaintalang ra Nabi Jisaya anak ri Amos, am ralalom ru kitab Sejarah Raja'-Raja' Jiuda am Israil.

³³Raja' Gijkia minatoi am linobong giu' ra tampilon rasawat ru kalabangan ru raja'. Ngaangai' mamagun ru Jiuda am Jirusalim nangani' ra pangurumatan maayo riso paat ra io minatoi. Anak ungkuyon nano i Manasi, minalit riso koson ra raja'.