Read Timugon Murut 2 TUNUNG RU BANSA' ISRAIL 34 Bible Online

2 TUNUNG RU BANSA' ISRAIL 34 - Timugon Murut bible

2 TUNUNG RU BANSA' ISRAIL 34

¹Raja' Josia makaumur balu' ngambilor paat io nasauk ra raja' ru Jiuda, am namarinta io giu' ra Jirusalim buoi talu ngoopor am rondo' ngambilor.

²Raja' Josia nambaal ra atan ondo' mapabansuk ra guang ru TUHAN. Minaya' io ra binaal moonsoi ru kinamatuaan nali Raja' Daut, am giminagaya' ra ngaangai' ukum ri Aki Kapuuno' ra totopot.

³Paat ra bilor kabalu' ra pamarintaan ru Raja' Josia, paat ra io lakat poyo mamulok, timinalimpuun io sumamba ri Aki Kapuuno' ondo' sinamba ru kinamatuaan nali, Raja' Daut. Kopongo apat ngambilor, timinalimpuun Raja' Josia namuso ra intok-intok sambaan ra sinungkalalaing, tatandu'-tatandu' ru Dewi Asyira am ngaangai' sinungkalalaing ra bokon.

⁴Ralalom ru susuban ru Raja' Josia, ulun-ulun nano nampalunsai ra altar-altar ru Baal am altar-altar koson monolob ra kaminyan ondo' mokoondo' ra giu' no. Inumok nilo sinungkalalaing ru Dewi Asyira am ngaangai' sinungkalalaing ra bokon, am kaau no pinatias ra rasawat ru kalabangan ru ulun ondo' siminamba ra sinungkalalaing no.

⁵Kopongo raginio giu' ra rasawat ru altar no nonolob Raja' Josia ra bungul ru imam-imam ondo' siminamba ra sinungkalalaing. Koon raginio io nampasauk ra Jiuda am Jirusalim mapasau saguli'.

⁶Baal ra nogondo' binaal nano giu' ra bandar-bandar am giu' ra intok ondo' nalunsai giu' ra wilayah Manasi, Ipraim am Simion, saboi ra wilayah Naptali giu' ra ralayo.

⁷Giu' ra titikop ru tampilon Pamarintaan Ralayo, Raja' Josia nampalunsai am nangumok ra altar-altar am tatandu'-tatandu' ru Dewi Asyira, am niayuk altar-altar koson monolob ra kaminyan. Kopongo raginio minuli' io ra Jirusalim.

⁸Paat ra bilor koopor am balu' ra pamarintaan ru Raja' Josia, kalupus io namasau ra pagun no am Baloi ru TUHAN ra nopolonggo' ra ngaangai' sumamba ra sinungkalalaing, nanusub io ra talu ngaulun pagawai nano koson mamuna' ra Baloi ru TUHAN i Aki Kapuuno'. Pagawai raginilo iono i Sapan anak ri Ajalia, Manasi gabenor ru Jirusalim am Joa anak ri Joagas, sangulun pagawai masawat.

⁹Ruit ondo' tinimung ru ulun-ulun ru Liwi giu' ra Baloi ru TUHAN, pinataak ra Tingganai Maayo Imam Ilkia. Ruit no inapu intor ra mamagun ru Ipraim, Manasi am tampilon ra bokon giu' ra Pamarintaan Ralayo, am niayuk intor ra mamagun ru Jiuda, Binjamin am Jirusalim.

¹⁰Ruit no pinataak ra talu ngaulun ondo' pinangandoi koson magalung ra pamunaan ra Baloi ru TUHAN. Ilo pana nampataak boo ra ruit no

¹¹ra ulun manukang ra tataun am ulun-ulun mangngandoi ondo' musiti' mambali ra batu am tataun, koson mamuna' ra baloi-baloi ondo' pinoloso nalunsai ru raja'-raja' ru Jiuda.

¹²Ngaangai' mangngandoi no mabanis kaga' guang. Inalungan ilo ru apat ngaulun Liwi, iono i Jagat am Obaja intor ra bansa' ru Mirari, am i Jakaria am niayuk i Misulam intor ra bansa' ru Kigat. Ulun-ulun ru Liwi ngaangai' no mangkuli ra miujik ondo' mapandai kaga'.

¹³Ulun-ulun ru Liwi ra bokon pinalansan ra pagautan ra kakamot ru panambalayan am magalung ra ulun-ulun manukang ondo' mambaal ra mansalinut kandoi. Ulun-ulun ru Liwi ra bokon poyo nangandoi ralalom kandoi ru upis pamarintaan, kapoam koson ra magalung.

¹⁴Paat ra ilo mangingkual ra ruit ondo' tinimung noyo giu' ra Baloi ru TUHAN, nakatuum i Ilkia ra kitab Ukum ru TUHAN, Ukum ondo' tinaak ri Aki Kapuuno' ri Musa.

¹⁵Kon ri Ilkia ri Sapan, “Nakatuum aku ra kitab Ukum ru TUHAN giu' ra ralalom Baloi ru TUHAN.” Io pana nanaak boo ra kitab no ri Sapan,

¹⁶am i Sapan pana nagibit ra kitab no ra raja' am indagu, “Akai ngaangai' nambaal noyo ra ngaangai' susuban muno.

¹⁷Akai ngaangai' nangalap noyo ra ruit ondo' binulian giu' ra ralalom Baloi ru TUHAN am nangani' raginio ra ulun-ulun mangngandoi am ulun-ulun magalung risilo.”

¹⁸Kon poyo ri Sapan, “Gitio noyo kitab ondo' tinaak ri Ilkia raki'.” Binasa' ri Sapan suang ru kitab no ra raja'.

¹⁹Pakaining raja' ra suang ru kitab no, rilako' no bayang nano sabap ra mangiluk guang.

²⁰Indagu raja' ri Ilkia ri Agikam anak ri Sapan, i Abdon[47] anak ri Mika, i Sapan mamamatik ru pagun, am i Asaya ulipon ru raja',

²¹“Ongoi no pakipinson ra TUHAN ra bala kuno am ra bala ru ngaangai' mamagun ondo' lakat poyo soroi giu' ra Israil am Jiuda, intor ra pangilaan ru kitab ti. Sumangit TUHAN ritakau sabap ra kinamatuaan takau kalo giminagaya' ra ragu ru TUHAN am kalo nambaal ra atan ondo' tinulisan ra ralalom ru kitab ti.”

²²Ralalom susuban ru raja' no, i Ilkia am ulun ra bokon ondo' sinusub ru raja', minongoi pakipinson intor ra sangulun ruandu' ininggalanan ri Gulda. Io sangulun nabi ruandu' ondo' minayan giu' ra kampung bagu giu' ra Jirusalim. Ralaki nano, i Salum anak ri Tikwa, akupu ri Gargas, iono ulun manalingapu ra bayang giu' ra Baloi ru TUHAN. Tinunung nilo atan ondo' nasauk.

²³I Gulda pana nanusub boo risilo minuli' am pambala' ra raja'

²⁴ra ragu ru TUHAN ragitio, “Ukumin Ku Jirusalim am niayuk ngaangai' mamagun no ra ulas ondo' tinulisan ra ralalom ru kitab ondo' binasa' ra raja'.

²⁵Inimpayan nilo Aku, am nampataak noyo ra taak-taak simbalui ra tuhan-tuhan ra bokon. Binaal nilo napasingkual ra sangit Kuno. Raino sumangit Aku ra Jirusalim, am sangit Kuno kalo noyo malasa'.

²⁶Kaa' intor ra raja' galama', koon ragitio ragu Kutu, TUHAN i Aki Kapuuno' ru Israil: Linio mu suang ru kitab no,

²⁷am timinalikur kono intor ra tula am niayuk minggana' guang ra saang Kuno. Rinilak mu bayang am niayuk nantangi' paat ra okou nokorongog ra lolob Kuno koson mangukum ra Jirusalim am mamagun nano. Nokorongog Aku ra pakiasian muno,

²⁸ginio ra ukuman ondo' paratuon Kuno ra Jirusalim kalo masauk buoi ra okou maayag. Mangiou Aku rirun matoi ra moonsoi.” Ulun-ulun sinusub no pana minuli' ra Raja' Josia am nampasaboi ra tanou raginio.

²⁹Piniau ru Raja' Josia ngaangai' tingganai ru Jiuda am Jirusalim,

³⁰am nababaya' ilo minongoi ra Baloi ru TUHAN. Minaya' risilo imam-imam, ulun-ulun ru Liwi am ngaangai' mamagun, ondo' langkaya' am niayuk musikin. Giu' ra saang nilo ngaangai', binasa' ru raja' ngaangai' suang ru kitab nabantuan no, ondo' natuum giu' ra ralalom Baloi ru TUHAN.

³¹Minigor raja' giu' ra sapapa' ru lugu' ondo' timpokon ra raja',[48] am nambaal ra nabantuan ra TUHAN ra gumagaya' io Riso, am sumugut ra ukum am niayuk susuban Nano ra sotopot ru guang am salibuor, am niayuk maya' ra ngaangai' rinagu ra nabantuan ondo' tinulisan giu' ra ralalom ru kitab no.

³²Nanusub raja' ra ngaangai' ulun ru Binjamin am ulun ondo' soroi giu' ra Jirusalim maa' raginio mambantu' koson gumagaya' ra nabantuan no. Koon raginio noyo mamagun ru Jirusalim giminagaya' ra aturan-aturan ralalom ru nabantuan no, iono nabantuan ru ilo am i Aki Kapuuno' ru kinamatuaan nilo.

³³Pinuso ru Raja' Josia ngaangai' sinungkalalaing ondo' majamol, ondo' soroi giu' ra titikop wilayah ru ulun ru Israil. Io pana nanusub boo ra mamagun nano musiti' sumambayang ra TUHAN, i Aki Kapuuno' ru kinamatuaan nilo. Ginio ra buoi ru Raja' Josia naayag, narayus ilo giminagaya' ra TUHAN.