Read Timugon Murut 2 TUNUNG RU BANSA' ISRAIL 36 Bible Online

2 TUNUNG RU BANSA' ISRAIL 36 - Timugon Murut bible

2 TUNUNG RU BANSA' ISRAIL 36

¹Mamagun ru Jiuda nampili' ra Raja' Joagas anak ungkuyon ru Raja' Josia, am nampalantik riso nasauk ra raja' giu' ra Jirusalim.

²Raja' Joagas makaumur ruo ngoopor am talu ngambilor paat ra io nasauk ra raja' ru Jiuda, am namarinta io ra Jirusalim buoi talu ngansila'.

³Raja' Niko intor ra Misir, namparakop ra Raja' Joagas am nampajajal ra Jiuda nambayar ra cukai suang 3,400 ngakilogram pirok am 34 ngakilogram mas.

⁴Raja' Niko nampili' ra Raja' Iliakim pabukat ru Raja' Joagas, nasauk ra raja' Jiuda, am nangulau ra inggalan ru Raja' Iliakim nasauk ra Raja' Joyakim. Raja' Joagas inibit ru Raja' Niko giu' ra Misir.

⁵Raja' Joyakim makaumur ruo ngoopor am limo ngambilor paat io nasauk ra raja' ru Jiuda, am namarinta io giu' ra Jiuda buoi mopor am rondo' ngambilor. Makatula Raja' Joyakim ra TUHAN, i Aki Kapuuno' nano.

⁶Raja' Nibukadnijar intor ra Babilonia namulunsar ra Jiuda. Rinakop no Raja' Joyakim, binangkil no io, am inibit no io ra Babilonia.

⁷Raja' Nibukadnijar nagibit ra santayaran ra rapu' intor ra Baloi ru TUHAN ra istana nano giu' ra Babil.

⁸Ngaangai' binaal ru Raja' Joyakim, nakaaya' binaal nano ondo' majamol am malaat, tinulisan ra ralalom ru kitab Sejarah Raja'-Raja' ru Israil am Jiuda. Anak ungkuyon nano, i Joyakin minalit riso koson ra raja'.

⁹Raja' Joyakin makaumur mopor am balu'[49] ngambilor paat ra io nasauk ra raja' ru Jiuda, am namarinta io giu' ra Jirusalim buoi talu ngansila' am mopor ngoorou. Raja' Joyakin niayuk makatula ra TUHAN.

¹⁰Paat ra mambusak bilor raginio, Raja' Nibukadnijar namparakop ra Raja' Joyakin am nagibit riso ra Babilonia. Raja' Nibukadnijar niayuk nagibit ra rapu' intor ra Baloi ru TUHAN. Kopongo raginio Raja' Nibukadnijar nampili' ri Jidikia, kamaman[50] ru Raja' Joyakin, nasauk ra raja' ru Jiuda am Jirusalim.

¹¹I Jidikia makaumur 21 ngambilor paat ra io nasauk ra raja' ru Jiuda, am namarinta io giu' ra Jirusalim buoi mopor am rondo' ngambilor.

¹²Raja' Jidikia makatula ra TUHAN, am marara' minggana' guang koson rumongog ra Nabi Jirimia, ondo' nampasaboi ra ragu ru TUHAN.

¹³Raja' Jidikia giminuor ra Raja' Nibukadnijar, ondo' nampajajal riso nagibot ralalom inggalan ri Aki Kapuuno' ra gumagaya' io ra Raja' Nibukadnijar. Raja' Jidikia bambalingatan am marara' tumalikur intor ra tula am niayuk sumaguli' ra TUHAN, i Aki Kapuuno' ru Israil.

¹⁴Suai intor raginio, tingganai-tingganai ru Jiuda, imam-imam am mamagun minaya' ra ralan kaayagan ru bansa'-bansa' ra naginggaar ondo' makatula. Sinamba nilo sinungkalalaing am nampajamol ra Baloi ru TUHAN, ondo' timpokon ayuk ru TUHAN galama' ra inan Nano.

¹⁵Buoi ru ginio TUHAN, i Aki Kapuuno' ru kinamatuaan nilo, nararayus nanusub ra nabi koson mampakara' ra ulun Nano, sabap ra masaga' Io mamayag risilo am Baloi ru TUHAN.

¹⁶Kaa' kinuli-kuli nilo ulun-ulun sinusub ri Aki Kapuuno' no, kalo nampalio ra ragu Nano, am nakakurit ra nabi-nabi Nano. Pupus no, siminangit kaga' TUHAN risilo saboi kolondo' boo ralan mingkual koson mapalabus ra ulun Nano intor ra ukuman Nano.

¹⁷Ginio ra TUHAN namparatong ra raja' ru Babilonia koson mamulunsar risilo. Namatoi raja' Babilonia ra ulun mamulok ru Jiuda, am poyo ulun soroi giu' ra Baloi ru TUHAN. Kalo nakaasi' raja' no ra osoi pana, mamulok am matutuo, ungkuyon am ruandu', ulun marualan kapoam ulun maligag. Pinataak ri Aki Kapuuno' ilo ngaangai' ra raja' ru Babilonia.

¹⁸Kuliamos-kuliamos ra Baloi ru TUHAN am kuliamos-kuliamos mologo ondo' soroi ra giu' no, rapu' ru raja' am pagawai-pagawai nano, ginaau ru raja' Babilonia, am inibit ra Babil.

¹⁹Linunsai ru raja' no timbok ra bandar ru Jirusalim am nonolob ra bandar no, nakaaya' Baloi ru TUHAN am ngaangai' istana, nababaya' ra kuliamos mongologo giu' ra ralalom ru istana.

²⁰Inibit ru Raja' Babilonia ngaangai' ulun ondo' lakat poyo naayag giu' ra bandar no ra Babilonia. Jinajalan ilo nasauk ra inulipon ra raja' am papag nano saboi ra talimpuun ru pamarintaan ru Pirsia.

²¹Koon raginio noyo nasauk atan ondo' rinagu ru TUHAN ondo' pinabala' galing ra Nabi Jirimia, “Pagun ragitio mokoloso buoi tulu' ngoopor ngambilor koson papaliton ra bilor-bilor Sabat[51] ondo' kalo linio.”

²²Paat ra bilor kasaa' ra pamarintaan ru Raja' Koris, raja'[52] Pirsia, inintopot ru TUHAN ragu Nano ondo' pinasaboi ru Nabi Jirimia. Namuir TUHAN ra guang ru Raja' Koris maa' raginio mangingkual ra susuban tinulisan koson basaan giu' ra titikop ru pamarintaan nano. Bolos ru surat no koon ragitio,

²³“Gitio noyo ragu ru Raja' Koris, raja' ru Pirsia. TUHAN, i Aki Kapuuno' panguasa' giu' ra suruga', nampasauk raki' ra raja' ru titikop ru tana' ti. Nangani' Io raki' ra kandoi koson mambaal rondo' baloi Riso giu' ra Jirusalim, giu' ra wilayah ru Jiuda. Ginio ra, akau ngaangai' ondo' nasauk ra ulun ri Aki Kapuuno' musiti' sumaguli' ra giu'. Gama' ru TUHAN, i Aki Kapuuno' min mabaya' ramuyun.”