Read Timugon Murut IJRA 4 Bible Online

IJRA 4 - Timugon Murut bible

IJRA 4

¹Pantula' ru ulun ru Jiuda am Binjamin nokorongog ra ilo ondo' minuli' intor ra pamatiran no tatanga' mambaal saguli' ra Baloi ru TUHAN, i Aki Kapuuno' ru Israil.

²Ginio ra minuma' ilo ri Jirubabil am tingganai-tingganai ru ulun no, am indagu, “Iowo' akai maya' mambaal ra Baloi ru TUHAN. Akai pana sumamba ra mogondo' i Aki Kapuuno' am masalok akai mampataak ra taak simbalui Riso intor ra akai sinusub mayan ragiti ru Raja' Isaradon, raja' ru pagun ru Asyur.”

³I Jirubabil, i Jisua am tingganai-tingganai ru ulun minindagu risilo, “Kalo makapakuan akai ra indangan min koson mambaal ra Baloi ru TUHAN, i Aki Kapuuno' mai. Akai galama' mambaal raginio, koson ra ondo' nanusuban ru Raja' Koris, raja' ru Pirsia.”

⁴Kopongo raginio mamagun ondo' lair noyo minayan giu' ra pagun no kuminam mampalawo ra guang ru ulun ru Jaudi am mampakalalaa' risilo, maa' raginio pambaalan no langgain.

⁵Ilo nangani' niayuk ra rasua ra pagawai-pagawai ru pamarintaan ru Pirsia maa' raginio mamutat ra pambaalan no. Binaal nilo ginio saboi ra paat ru pamarintaan ru Raja' Darius.[7]

⁶Paat ra talimpuun ru pamarintaan ru Raja' Agaswiros, pantula' ru mamagun ru Jiuda am Jirusalim nanulis ra surat panguwan.

⁷Paat ra pamarintaan ru Raja' Artasasta, raja' ru Pirsia, kasaukan raginio riminuli' poyo; i Bislam, Mitridat, Tabiil am niayuk rangan-rangan nilo nangator ra rondo' surat ra raja'. Surat no tinulisan ralalom ragu ru Aram,[8] am musiti' aligin paat ra basaan.[9]

⁸Suai raginio, Gabenor Rigum am i Simsai mamamatik nano, niayuk nanulis ra surat ragitio ra Raja' Artasasta intor ra Jirusalim,

⁹“Surat ti intor ra Gabenor Rigum, Mamamatik i Simsai, am rangan-rangan nilo, iono akim-akim, am niayuk ngaangai' pagawai ru Pirsia ra bokon, ondo' intor ra Irik, Babil am Susan giu' ra tana' Ilam;

¹⁰nababaya' ra bansa'-bansa' ra bokon ondo' pinabanding ru Raja' Asnapar ondo' Matulai giu' ra bandar Samaria am giu' ra intok ra bokon giu' ra Wilayah Iprat Kalasaan.”

¹¹Suang ru surat no koson ragitio, “Posoboyon ra Raja' Artasasta, intor ra ulipon-ulipon muno intor ra Iprat Kalasaan. Kaansayan.

¹²Musiti' kou raja' makapandai ra ulun ru Jaudi ondo' minatong ragiti intor ra intok bokon no raino minayan giu' ra Jirusalim am tatanga' mambaal saguli' ra bandar ondo' gugumuor am malaat no. Timinalimpuun ilo noyo nambaal saguli' ra timbok no kalo boo mabuoi pambaalan no mopongo.

¹³Amon ru bandar no baalon saguli' am timbok no tirongon, maaru' mamagun nano marara' boo mambayar ra cukai. Ginio ra ampos ru pamarintaan tumutus boo.

¹⁴Akai ngaangai' nakaili' ra binaal moonsoi muno raja', sabap raginio marara' akai magilong ra baal raginio masauk. Akai ngaangai' mangatang

¹⁵maa' raginio tutunon mu arkib ru kinamatuaan muli. Maaru' makapandai kou ra intor ragili, bandar no magail gumuor am mantipagon ra raja' am panguasa' ru pagun. Mamagun no masalok mapagon susubon am ginio sabap ra bandar no pinuso.

¹⁶Akai ngaangai' mangintopot ra amon ru bandar no baalon saguli' am timbok no tirongon, okou raja' kalo boo makapanguasa' ra Wilayah Iprat Kalasaan.”

¹⁷Binalasan ru raja' surat no koon ragitio, “Posoboyon ra Gabenor Rigum, Mamamatik i Simsai, am rangan-rangan nilo ondo' minayan giu' ra Samaria am ra intok ru bokon giu' ra kalasaan ru Iprat.[10] Kaansayan.

¹⁸“Surat min inaligan ragu am binasa' noyo raki'.

¹⁹Nanusub aku noyo maa' raginio baal raginio imumuyin. Motopot noyo ra intor ragili Jirusalim giminuor ra raja'-raja', am ra bandar no nososok ra ulun giminuor am mampajajou.

²⁰Raja'-raja' ondo' mapanggol namarinta noyo ra giu' am giu' ra titikop ru wilayah Iprat Kalasaan, am niayuk nampalulur ra cukai am tangguang.

²¹Ginio ra ingkualo' susuban maa' raginio ngaangai' ulun no lumonggo' mambaal ra bandar no saboi ra aku mangani' ra susuban ra sumunu' no.

²²Paugaro' susuban ti ra mataki' maa' raginio pamarintaan takau kalo magantung ra kalubatan ondo' maayo poyo.”

²³Kopongo ayuk surat intor ra Raja' Artasasta no binasa' ri Rigum, i Simsai am rangan-rangan nilo, naringkaagou ilo minongoi ra Jirusalim. Jinajalan nilo boo ulun ru Jaudi mompolonggo' ra pambaalan ra bandar no.

²⁴Pambaalan ra Baloi ru TUHAN naputatan saboi ra bilor karuo ra pamarintaan ru Raja' Darius, raja' ru Pirsia.