Read Timugon Murut NIGIMIA 1 Bible Online

NIGIMIA 1 - Timugon Murut bible

NIGIMIA 1

¹Gitio noyo pambalaan ri Nigimia anak ri Gakalia intor ra atan ondo' binaal nano. Paat ra sila' Kisliw, bilor karuo ngoopor ra pamarintaan ri Artasasta koson ra raja' ru Pirsia, aku, i Nigimia soroi giu' ra Susan, pusor bandar ru pamarintaan.

²Paat raginio, pabukat kuno i Ganani, nakasaboi intor ra Jiuda nababaya' ra kukula' ngaulun ra bokon. Nangkuot aku risilo intor ra babaal giu' ra Jirusalim am intor ra gino ngai' ru ulun ru Jaudi ondo' siminaguli' noyo intor ra namatiran giu' ra[1] Babilonia.

³Nantunung ilo ra ulun ragili ondo' pinatiran ondo' siminaguli' noyo ra pamagunan galama',[2] raino naayag ra naimbolo' am inasaban ru bansa'-bansa' ra bokon ondo' minayan giu' ra paginggaar nilo. Inambai poyo ra timbok ru Jirusalim lakat poyo nangalunsai, am kulobon-kulobon garabang nano kalo poyo pinuna' intor ra nosolob ragili.

⁴Pokorongog aku ra ngaangai' no, panturung aku am pantangi'. Kukula' ngoorou buoi ra aku nanulaboi am kalo nangakan ra atan pana. Pakiasi' aku ri Aki Kapuuno',

⁵“Iou TUHAN i Aki Kapuuno' mangnguasa' giu' ra suruga'! Okou i Aki Kapuuno' ondo' matulai, am tumingkuang akai Rirun ra malaa' kaga'. Gumagaya' Kou ra nabantuan Muno risilo ondo' motogom Rirun am mambaal ra susuban Muno.

⁶Ilai' aku, iou TUHAN, am rongogo' pakiasian kutu, tatanga' aku makiasi' orou am rondom koson ra bala ru ulipon-ulipon muno, ulun ru Israil. Mangiou aku ra akai ti, ulun ru Israil, makatula noyo. Kinamatuaan kuli am aku makatula noyo.

⁷Natulaan akai toojo Rirun, am kalo nambaal ra susuban Muno. Kalo giminagaya' akai ra ukum ondo' tinaakan Muno ondo' pinabala' galing ri Musa, ulipon Muli.

⁸Iou TUHAN, karaa' noyo ragu Muno ri Musa ragili, ‘Amon ru akau, ulun ru Israil, kalo gumagaya' Raki', pantutuliaron Takamin ra bansa'-bansa' ra bokon.

⁹Kaa' amon sumaguli' kau Raki' am mambaal ra susuban Kuno, ibiton Takamin saguli' ra intok ondo' pinili' Ku noyo koson ra intok Aku sambaan, kabalu' pana nakapantutuliar kano ra titikop ru tana' ti.’

¹⁰Iou TUHAN, ilo ti ulipon Muno, ulun Muno galama'. Binayag Mu noyo ilo ra kuasa' am ikang Muno ondo' maayo.

¹¹Ginio ra, rongogo' noyo pakiasian kutu am pakiasian ru ulipon-ulipon Muno ra bokon, ondo' moogot mangurumat Rirun. Anii' ra kaindanganan Muno maa' raginio paat ra orou raiti' ulipon Muno makasugut makaalap ra pakimasian intor ra raja'.” Paat raginio, aku ti mampasulung ra inumon ru raja'.