Read Timugon Murut NIGIMIA 3 Bible Online

NIGIMIA 3 - Timugon Murut bible

NIGIMIA 3

¹Gitio noyo ralan ra timbok ru bandar Jirusalim pinuna'.[4] Tingganai Maayo Imam Ilyasib am imam-imam ra bokon nambaal saguli' ra Kulobon Garabang Domba, napatapuli' ra angob-angob ru kulobon no am patimpokon ngaangai' no. Patimpokon nilo timbok saboi ra Manara Maatus am Manara Gananil.

²Ulun ru Jiriko nambaal ra tayar ru timbok ondo' tunggul no. I Jakur anak ri Imri nambaal ra tayar ru timbok ondo' tunggul no.

³Bansa' ru Sinaa nambaal ra Kulobon Garabang Papait. Napaatang ilo ra balak-balak, angob-angob ru kulobon, paku'-paku' tataun, am tataun-tataun pangalor ra kulobon garabang.

⁴I Mirimot anak ri Uria, iono akupu ri Gakos, nambaal ra tayar ru timbok ondo' tunggul no. I Misulam anak ri Birikia, iono akupu ri Misgijabil, nambaal ra tayar ru timbok ondo' tunggul no. I Jadok anak ri Baana nambaal ra tayar ru timbok ra tunggul no.

⁵Ulun intor ra bandar Tikoa nambaal ra tayar ru timbok ondo' tunggul no, kaa' tingganai-tingganai ru bandar no marara' mambaal ra kandoi majamol ondo' pinataak risilo ru ulun naningganai risilo.

⁶I Joyada anak ri Pasia am i Misulam anak ri Bisodia nambaal saguli' ra Kulobon Garabang Jisgana.[5] Napaatang ilo ra balak-balak, angob-angob ru kulobon, paku'-paku' tataun am tataun-tataun pangalor ra kulobon garabang.

⁷I Milatia intor ra Gibion, I Jadon intor ra Mironot, am ulun ru Gibion am niayuk ulun ru Mijpa nambaal ra tayar ru timbok ra tunggul no saboi ra istana gabenor ru Iprat Kalasaan.

⁸I Ujiil anak ri Gargaya, sangulun manukang ra mas nambaal ra tayar ru timbok ra tunggul no. I Ganania, sangulun mambaal ra umau maamis owou, nambaal ra tayar ru timbok ra tunggul no saboi ra Timbok Mapila'.

⁹I Ripaya anak ri Gur, mangunguasa' sampiruo ra libung Jirusalim, nambaal ra tayar ru timbok ra tunggul no.

¹⁰I Jidaya anak ri Garumap nambaal ra tayar ru timbok ra tunggul no, ondo' mamaar ra baloi nano galama'. I Gatus anak ri Gasabniya nambaal saguli' ra timbok ra tunggul no.

¹¹I Malkia anak ri Garim, am i Gasub anak ri Pagat-Moab nambaal ra tayar ru timbok ra tunggul no, am niayuk Manara Makaapui.

¹²I Salum anak ri Galogis, mangunguasa' sampiruo ra libung Jirusalim, nambaal ra tayar ru timbok ra tunggul no. Inindangan io ru anak-anak ruandu' nano ralalom ru pambaalan no.

¹³I Ganun am mamagun ru Janoa nambaal saguli' ra Kulobon Garabang Limayak. Napaatang ilo ra angob-angob ru kulobon, paku'-paku' tataun am tataun-tataun pangalor ra kulobon garabang. Ilo niayuk namuna' ra timbok ra galur no 440 ngamito saboi ra Kulobon Garabang Ginsamol.

¹⁴I Malkia anak ri Rikab, mangunguasa' ra libung Bit-Kirim nambaal saguli' ra Kulobon Garabang Ginsamol. Napaatang ilo ra angob-angob ru kulobon, paku'-paku' tataun am tataun-tataun pangalor ra kulobon garabang.

¹⁵I Salum anak ri Kolgoji, mangunguasa' ra libung Mijpa, nambaal saguli' ra Kulobon Garabang Taur ru timug. Napaatang ilo ra taap ra kulobon garabang no, napaatang ra angob-angob ru kulobon, paku'-paku' tataun am tataun-tataun pangalor ra kulobon garabang. Giu' ra Kulam Sila, nambaal io ra tayar ru timbok mamaar ra taman istana saboi ra tukar ondo' tumuun intor ra Bandar Daut.

¹⁶Nigimia anak ri Ajbuk, mangunguasa' sampiruo ra libung Bit-Jur nambaal ra timbok ondo' tunggul no saboi ra kalabangan ru sasambaloi ri Daut, kulam ra binaal am barik ru saujor.

¹⁷Kukula' tayar ru timbok ragitio pinuna' ru ulun ru Liwi ralalom pansunuan ragitio: I Rigum anak ri Bani nambaal ra timbok ondo' tunggul no; I Gasabia, mangunguasa' ru sampiruo ra libung Kigila, nambaal ra tayar ru timbok ra tunggul no, ra bala ru libung nano;

¹⁸I Binui anak ri Ginadad, mangunguasa' sampiruo ra libung Kigila, nambaal ra timbok ra tunggul no;

¹⁹I Ijir anak ri Jisua, panguasa' ru Mijpa, nambaal ra tayar ru timbok ra tunggul no, giu' ra saang ru intok ru kinandoi saboi ra intok ru timbok lumikou;

²⁰I Baruk anak ri Jabai nambaal ra tayar ru timbok ra tunggul no, saboi ra kulobon ru baloi ru Tingganai Maayo Imam Ilyasib;

²¹I Mirimot anak ri Uria, iono akupu ri Gakos, nambaal ra tayar ru timbok ra tunggul no, saboi ra pompor ru baloi ri Ilyasib.

²²Kukula' tayar ru timbok ragitio pinuna' ru imam-imam ralalom ru pansunuan ragitio: Imam-imam ondo' minayan giu' ra liliut ru Jirusalim nambaal ra tayar ru timbok ra tunggul no;

²³I Binjamin am i Gasub nambaal ra tayar ru timbok ra tunggul no, ondo' giu' ra saang ru baloi nilo; I Ajaria anak ri Maasiya, iono akupu ri Anania, nambaal ra tayar ru timbok ra tunggul no, ondo' giu' ra saang ru baloi nano;

²⁴I Binui anak ri Ginadad nambaal ra tayar ru timbok ra tunggul no, intor ra baloi ri Ajaria saboi ra pisuk ru timbok;

²⁵I Palal anak ri Ujai nambaal ra tayar ru timbok ra tunggul no, tumalimpuun intor ra pisuk ru timbok am manara ru istana tampilon rasawat, mamaar ra liliut ru magagalung; I Pidaya anak ri Paros nambaal ra tayar ru timbok ra tunggul no, saboi ra rondo' intok giu' ra saang ru Kulobon Garabang Timug tampilon ra sirangon, am manara pagalungan ra Baloi ru TUHAN. (Kalo maalur ra giu' no mokoondo' intok ondo' ininggalanan ra Opil, intok inayanan ru ulun-ulun mangandoi ra Baloi ru TUHAN.)

²⁷Ulun intor ra bandar Tikoa nambaal ra tayar ru timbok ra tunggul no, intor ra rondo' intok giu' ra saang ru manara pagalungan ra Baloi ru TUHAN saboi ra timbok mamaar ra Opil; tayar ru timbok ti iono tayar karuo ondo' binaal nilo.

²⁸Sampulalai imam nambaal ra tayar ru timbok ra tunggul no, intor ra Kulobon Garabang Kuda am makatingkuang ra ralayo; moonong ulun mambaal ra tayar ru timbok giu' ra saang ru baloi ru sigagama'.

²⁹I Jadok anak ri Imir nambaal ra tayar ru timbok ra tunggul no, iono ondo' saang ru baloi nano. I Simaya anak ri Sikania, magagalung ra Kulobon Garabang Sirangon, nambaal ra tayar ru timbok ra tunggul no.

³⁰I Gananya anak ri Silimia, am i Anun, anak ri Jalap ra koonom, nambaal ra tayar ru timbok ra tunggul no; tayar ru timbok ti iono tayar karuo ondo' binaal nilo. I Misulam anak ri Birikia nambaal ra tayar ru timbok ra tunggul no, ondo' giu' ra saang ru baloi nano.

³¹I Malkia, sangulun manukang ra mas, nambaal ra timbok ra tunggul no, saboi ra baloi ru ulun-ulun mangandoi ru Baloi ru TUHAN am ulun-ulun mantalan, ondo' intok no giu' ra saang ru Kulobon Garabang Mipkad,[6] mamaar ra lamin rasawat giu' ra pisuk ru timbok tampilon ra sirangon ralayo.

³²Ulun manukang ra mas am ulun mantalan nambaal ra tayar ru timbok ra pupus, intor ra lamin rasawat giu' ra pisuk ru timbok saboi ra Kulobon Garabang Domba.