Read Timugon Murut NIGIMIA 5 Bible Online

NIGIMIA 5 - Timugon Murut bible

NIGIMIA 5

¹Kukula' buoi boo raginio masuang ulun ru Jaudi, ungkuyon am niayuk ruandu', tumalimpuun mambutok ra gino ngai' ru bansa' ru Jaudi.

²Mokoondo' ulun ondo' mindagu, “Sasambaloi mai maayo, am makapakuan akai ra gandum koson maayag.”

³Mokoondo' ulun ra bokon ondo' mindagu, “Nampagadai akai kalalaat ra umo, umo ru anggur am baloi mai koson mambali ra gandum maa' raginio kalo maitilan akai.”

⁴Mokoondo' poyo ulun ra bokon ondo' mindagu, “Nagira' akai kalalaat ra ruit koson mambayar ra cukai ra pamarinta tayar ru umo am umo ru anggur mai.

⁵Itakau ngaangai' bansa' ru Jaudi. Sala' ka kia anak-anak takano pana nogondo' bonsoi no ra anak-anak ru Jaudi ra bokon? Kaa' pinoloso mai kalalaat anak-anak mai nasauk ra ulipon. Mokoondo' poyo kukula' ngaulun anak ralaa mai ondo' tinalan noyo nasauk ra ulipon. Kolondo' nabaal mai ra atan pana sabap ra umo am umo ru anggur mai nasauk noyo ra longgom ru ulun ra bokon.”

⁶Pokorongog aku ra butok nilono, siminangit aku kaga'

⁷am imbuor aku mataki'. Sinonsol ku tingganai-tingganai am pagawai-pagawai. Indagu aku risilo, “Nagingkaut kau ra pabukat min galama'!” Aku pana nakimantuum boo ra mamagun koson manalasai ra kapaganan raginio,

⁸am indagu aku, “Mingkotog akai toojo mamuli' ra ulun ru Jaudi ondo' nantalan kalalaat ra inan nilo ra ulun bansa' ra bokon. Kaa' raino akau pinai boo ondo' mampajajal risilo mantalan ra inan nilo ramuyun, alika akau niayuk ulun ru Jaudi!” Tingganai-tingganai no nongkokoror ayuk, am kalo timinaam ra atan pana.

⁹Kopongo raginio indagu aku poyo, “Binaal mino nasala! Akau musiti' no malaa' am mangurumat ri Aki Kapuuno' am mambaal ra baal ondo' moonsoi. Koon raginio noyo, pantula' takau ondo' kalo mangintopot ri Aki Kapuuno' no, kalo makaalap ra sasaban koson magasab ritakau.

¹⁰Aku galama' nampaira' noyo ra ruit am gandum ra mamagun; koon niayuk ondo' binaal ru rangan-rangan kuno am ulun ondo' mangandoi ra tayar kuno. Raino, ibok kano langgai' takau sika' makibayar saguli' ra ira' no.

¹¹Pusoo' noyo ngaangai' utang nilo — ruit, kapoam gandum, kapoam wain, kapoam umau jaitun. Pasagulio' umo, umo ru gandum, umo ru jaitun am baloi nilo ra mataki'!”

¹²Taam tingganai-tingganai, “Iou tupo, baalon mai koson ondo' rinagu muno. Pasagulion mai ngaangai' ra kalo makibayar intor risilo.” Aku pana nampiau boo ra imam-imam, am nanusub ra tingganai-tingganai magibot, giu' ra saang nilo, maa' raginio bantu' ondo' rinagu ru tingganai-tingganai no totopot baalon.

¹³Kopongo raginio iruo' ku abot[7] am pakabulo' ginio ra saang nilo, am mindagu, “Gitio noyo ralan ri Aki Kapuuno' mangabul ra moonong ulun ra gino ngai' min ondo' kalo nanugut ra bantu' nano. Alapon ri Aki Kapuuno' baloi ru ulun no am ngaangai' longgom nano, saboi ulun no kolondo' longgom ra atan pana.” Ngaangai' ulun ondo' siminaang ra giu' no mindagu, “Amin!” am pongompor boo ra TUHAN. Tingganai-tingganai no pana nanugut ra bantu' nilo.

¹⁴Aku nasauk noyo ra gabenor ru pagun Jiuda buoi mopor am ruo ngambilor, iono intor ra bilor karuo ngoopor ra pamarintaan ru Raja' Artasasta saboi ra bilor katalu ngoopor am ruo ra pamarintaan nano. Buoi ru ginio, aku am pabukat-pabukat kuno kalo igondo' pangakan ra akanon paluntukon raki' koson ra gabenor.

¹⁵Moonong ulun ondo' nasauk ra gabenor ondo' nakapagulu raki' nasauk ra saanin ru mamagun sabap ra gabenor no gumogot 40 ruit pirok songorou[8] tayar ru akanon am wain. Naambai ra pagawai-pagawai nilo pana mangimbolo' ra mamagun, kaa' aku kalo mambaal koon raginio sabap ra aku malaa' am mangurumat ri Aki Kapuuno'.

¹⁶Kinai' ku ngaangai' ikang kuno koson pambaalan saguli' ra timbok no, am sanganu pana tana' kalo nangalap aku. Moonong ulun ondo' mangandoi raki', maya' mangandoi ralalom pambaalan no.

¹⁷Maindalom aku mampaakan ra maatus am limo ngoopor ngaulun ru Jaudi am tingganai-tingganai nilo giu' ra baloi kuno, suai intor ra tambului intor ra pagun-pagun ra paginggaar.

¹⁸Moonong orou mamakai aku ra balanja' kuno galama', sanginan sapi', onom ngainan domba ondo' moonsoi kaga', am masuang kaga' manuk sinimbalui. Suai raginio, moonong mopor ngoorou mambaal aku ra wain bagu. Kabalu' pana raginio, kalo nangalap aku ra elaun ru gabenor sabap ra nakapandai aku ra sinaanan ru mamagun maagat noyo kaga'.

¹⁹Makitaak aku Rirun, iou Aki Kapuuno', karaa' noyo ngaangai' ondo' binaal moonsoi kuno ra bansa' ragitio, am barakato' aku no.