Read Timugon Murut NIGIMIA 6 Bible Online

NIGIMIA 6 - Timugon Murut bible

NIGIMIA 6

¹I Sanbalat, i Tobia, i Gisyim am pantula'-pantula' mai ra bokon nokorongog ra nopongo mai noyo namuna' ra timbok no, am ra ngaangai' luang nano sinilian noyo, kabalu' pana paat raginio kalo poyo pinaatang mai angob-angob ru kulobon ra kulobon-kulobon garabang.

²Ginio ra i Sanbalat am i Gisyim nangator raki' ra bilin, nakitaak maa' raginio tumuum aku risilo giu' ra rondo' kampung giu' ra Limayak Ono, kaa' nakapandai aku ra moogot ilo mamatoi raki'.

³Ginio ra nangator aku ra taam ragitio risilo, “Tatanga' aku mambaal ra kandoi maatang; ginio ra kalo makaratong aku. Marara' aku ra kandoi ti maputat ra tumuum ayuk ramuyun.”

⁴Nangator ilo ra bilin ra nogondo' no saboi inggapat, am moonong boo raginio taamon ku ra taam ondo' nogondo'.

⁵Kopongo i Sanbalat nanusub ra sangulun intor ra ulun nano nampasaboi ra bilin ra kainlimo, kaa' raino ti ralalom ru surat ra inukab.[9]

⁶Koon ragitio suang ru surat no: “Sumugut ra ragu ri Gisyim, mokoondo' raragu ra gino ngai' ru pagun-pagun paginggaar ra okou am ulun ru Jaudi moogot gumuor, am ginio noyo sasaban no ra akau namuna' ra timbok ru bandar. Minindagu io niayuk ra moogot kou sumauk ra raja',

⁷am nanusub kou noyo ra kukula' ngaulun nabi giu' ra Jirusalim koson mampatanou ra okou no raja' ru pagun Jiuda. Maaru' mokorongog raja' ra baal raginio. Ginio ra mangatang aku maa' raginio ito ruo maguma' koson mansusunur ra baal raginio.”

⁸Nangator aku ra taam riso, “Ngaangai' ondo' rinagu muno kalo motopot. Binaal-baal mu galama' tanou no.”

⁹Nangkinam ilo nampakalalaa' ramon maa' raginio lumonggo' akai mangandoi. Pakiasi' aku boo, “Iou Aki Kapuuno', kaikango' aku raino!”

¹⁰Olo'-olo' paat raginio minongoi aku ra baloi ri Simaya anak ri Dilaya, iono akupu ri Migitabiil, sabap ra kalo nakaratong io tuum raki'. Indagu io raki', “Ito ruo musiti' mansibuni giu' ra Lamin matulai ralalom Baloi ru TUHAN am pioton ngaangai' kulobon, sabap ra mokoondo' ulun moogot mamatoi rirun. Sasanggilan ayuk ra rondom raiti' ilo matong mamatoi rirun.”

¹¹Kaa' taam aku, “Sala' ka kaindalaman kuno koson magiru' am mansibuni. Koson ra ulun kasuangan kalo makaumpos aku ra Lamin Matulai, maaru' matoi aku. Kalo, marara' aku!”

¹²Paat ra aku mampaguang toojo ra baal raginio saguli', nakaliman aku ra ragu pangkaraan ri Simaya no sala' ka intor ri Aki Kapuuno'. Kaa' i Tobia am i Sanbalat nangani' noyo ri Simaya ra rasua maa' raginio mampasaboi ra ragu pangkaraan no raki'.

¹³Nambayar ilo riso koson nampakalalaa' raki' maa' raginio maya' aku ra inatang nilo, am makatula aku. Koon raginio ilo mangalap ra kaluagan koson mampalaat ra inggalan kuno am manauyu' raki'.

¹⁴Pakiasi' aku, “Iou Aki Kapuuno', karaa' noyo atan ondo' binaal ri Tobia am i Sanbalat. Ukumi' noyo ilo. Karaa' niayuk i Noaja, nabi ruandu' no am ngaangai' nabi ra bokon ondo' nangkinam nampakalalaa' raki'.”

¹⁵Kopongo nangandoi buoi 52 ngoorou, ngaangai' timbok no nopongo pinuna' paat ra orou karuo ngoopor am limo ra sila' Ilul.

¹⁶Pokorongog pantula'-pantula' mai intor ra pagun-pagun paginggaar ra baal raginio, nakaliman ilo ra tinauyu' ilo, sabap ra moonong ulun nakapandai ra kandoi raginio binaal ra indangan ri Aki Kapuuno' galama'.

¹⁷Buoi raginio, tingganai-tingganai ru ulun ru Jaudi am i Tobia lakat poyo mangkikirim ra surat.

¹⁸Masuang ulun ondo' minayan giu' ra Jiuda minaya' ri Tobia sabap ra iwan ungkuyon nano, i Sikania anak ri Ara iono ulun ru Jaudi. Naambai poyo ra anak ungkuyon ri Tobia, i Joganan, nagandu' ra anak ruandu' ri Misulam anak ri Birikia.

¹⁹Kabalu' pana nararayus i Tobia nanulis ra surat raki' koson nampakalalaa' raki', kaa' giu' ra saang kuno sasabiton ru tingganai-tingganai ru Jaudi no ngaangai' kinoonsoi ri Tobia. Suai raginio, ngaangai' ondo' raguon kuno pabalaan nilo ri Tobia.