Read Timugon Murut NIGIMIA 8 Bible Online

NIGIMIA 8 - Timugon Murut bible

NIGIMIA 8

¹Paat ra sila' katulu', ulun ru Israil namagun noyo giu' ra bandar ru sigagama'. Paat ra orou kasaa' sila' raginio, ilo ngaangai' timinimung giu' ra Jirusalim, giu' ra tana' malimparang mamaar ra Kulobon Garabang ru Timug. Nakitaak ilo maa' raginio kitab Taurat alapon ri Imam Ijra, sangulun mapandai kaga' ra Taurat ondo' pinataak ru TUHAN ra Israil ondo' pinabala' galing ri Musa.

²Ginio ra inibit ri Ijra kitab no ra saang ru ngaangai' ulun ondo' natitimung. Ilo no ungkuyon, ruandu' am lalaing-lalaing ondo' makarati' ra suang ru kitab no.

³Giu' intok malimparang no, maar ra kulobon garabang, nambasa' i Ijra ra Taurat no risilo intor ra susuab polos ra tanga' ru orou, am ilo ngaangai' nangkirongog toojo.

⁴Minigor i Ijra giu' ra rasawat ru pantas tataun ondo' binaal timpoko' koson kuayan raginio. I Matisa, Sima, Anaya, Uria, Ilkia am Maasiya minigor ra tampilon pamiris nano; liliwa' i Pidaya, Misail, Malkia, Gasum, Asbadana, Jakaria am Misulam minigor tampilon ra kait nano.

⁵Pantas intok binigaran ri Ijra masawat poyo intor ra ngaangai' ulun no, saboi makakito ilo ri Ijra. Kaukab ayuk ri Ijra kitab no, ilo ngaangai' minigor.

⁶Kon ri Ijra, “Omporo' noyo TUHAN, i Aki Kapuuno' ondo' matulai!” Ngaangai' ru ulun no napainsawat ra kalindu' am taam, “Amin! Amin!” Kopongo raginio igulatur ilo samba ri Aki Kapuuno'.

⁷Kopongo raginio bigor ilo ra intok ru sigagama', am ulun ru Liwi ragitio nambala' risilo ra sinail toojo Taurat no: I Jisua, Bani, Siribia, Jamin, Akub, Sabitai, Godia, Maasiya, Kilita, Ajaria, Jojabad, Ganan am Pilaya.

⁸Pinabala' nilo Taurat ri Aki Kapuuno'[11] no ra sinusui am nambala' ra liliwaan[12] maa' raginio maratian ru mamagun.

⁹Pokorongog mamagun ra pambasaan Taurat no, nalamawan ilo saboi nantangi' ilo. Ginio ra Gabenor Nigimia am Imam Ijra, ulun mapandai kaga' ra Taurat no, am ulun ru Liwi ondo' tatanga' mambala' ra liliwaan Taurat no nambala' ra mamagun, “Orou raiti' orou patimpokon koson ra TUHAN, i Aki Kapuuno' min. Ginio ra pai' kano mangiluk guang kapoam mantangi'.

¹⁰Uli' kano am pambaal kano ra bunsag. Pantayar kano ra akanon am wain min risilo ondo' natutusan. Orou raiti' orou patimpokon ra Tuhan takau. Ginio ra pai' kano pangiluk guang. Kaansukan ondo' tinaakan ru TUHAN ramuyun mangikang ramuyun.”

¹¹Saugar-ugar ulun ru Liwi ra giu' am giti koson mompororo' ra mamagun am ruruli' mindagu, “Pai' pangiluk guang ra orou patimpokon ti.”

¹²Ngaangai' ulun no pana minuli'. Nangakan am nanginum ilo liliwa' maansukan, am niayuk nantayar ra akanon ra ulun bokon, sabap ra makapandai ilo ra arati' ru pambasaan ondo' norongog nilono.

¹³Paat ra suabon no, tingganai-tingganai ru bansa', imam-imam am ulun-ulun ru Liwi minongoi ri Ijra koson mintutun ra pangilaan ru Taurat.

¹⁴Nakito nilo ra ralalom ru Taurat ondo' tinaakan ru TUHAN ondo' pinabala' galing ri Musa, nanusub TUHAN ra ulun ru Israil mayan giu' ra kalukub-kalukub, paat ra ilo mangiantak ra Pangiantakan Mangkalukub ra Raun.

¹⁵Ginio ra nampatanou ilo ra susuban ragitio[13] giu' ra titikop ru Jirusalim, giu' ra bandar-bandar ra bokon, am giu' ra ngaangai' pekan, “Ongoi kano ra bulur-bulur am alap kano ra raan-raan ru puun pain, puun jaitun, puun kemunting, puun kurma am puun tataun ra bokon, am pambaal kano ra kalukub sumugut ra aturan ondo' tinulisan ra ralalom ru Taurat.”

¹⁶Mamagun pana minongoi boo alap ra raan-raan am nambaal ra kalukub-kalukub giu' ra tampak ru taap marata' ra baloi nilo, giu' ra liliut ru baloi nilo, giu' ra liliut Baloi ru TUHAN, am giu' ra padang maar ra Kulobon Garabang Timug, am giu' ra padang maar ra Kulobon Garabang Ipraim.

¹⁷Ngaangai' ulun ondo' siminaguli' intor ra pamatiran nambaal ra kalukub am minayan ra giu' no. Gitio noyo kainsaa' baal raginio binaal intor ra bulintok ri Josua anak ri Nun. Ilo ngaangai' naansayan am naansukan.

¹⁸Moonong orou, intor ra orou kasaa' ru pangiantakan no saboi ra orou pupus, nambasa' i Ijra ra santayaran intor ra Taurat ri Aki Kapuuno' risilo. Nangiantak ilo ra pangiantakan no buoi tulu' ngoorou, am paat ra orou kabalu' nambaal ilo ra upacara kaampusan sumugut ra aturan ru Taurat.