Read Timugon Murut TOBIT 1 Bible Online

TOBIT 1 - Timugon Murut bible

TOBIT 1

¹Gitio noyo tunung ru kaayagan ri Tobit. Suang ru papag nano intor ra ragana' saboi ra rasawat koson ragitio: Tobit, Tobiil, Ananiil, Aduil, Gabail, Rapail am Raguil papag ri Asiil intor ra bansa' ru Naptali.

²Paat ra Asyur pinarinta ru Raja' Salmanisir, i Tobit rinakop am inibit intor ra bandar Tisbi giu' ra Ralayo ru Galilia. Bandar no tampilon rabugus ru Kadis giu' ra Naptali, giu' ra kalasaan ru raat Gajor, am giu' ra tampilon ralayo ru Pogor.

³Aku i Tobit, masalok mabanis guang am gumagaya' ra ugama, am buoi ru bayag gumogot mambaal ra moonsoi. Masalok aku mangindangan ra pabukat ondo' makiindangan am ulun ru Israil ra bokon ondo' nababaya' raki' ralalom pinatiran giu' ra Niniwi, pusor bandar ru Asyur.

⁴Paat ra aku lakat poyo mamulok, minayan aku ra Ralayo ru Israil. Ngaangai' bansa' ru Israil musiti' mampataak ra taak simbalui giu' ra Jirusalim, bandar ondo' pinili' ri Aki Kapuuno'. Giu' no, binaal noyo Baloi Nano, ayanan Nano ra matulai ra sabuoi-buoi no. Kaa' ngaangai' bansa' ru Naptali, bansa' kuno, minanggal ra raja' papag ru Raja' Daut giu' ra Jirusalim.

⁵Ginio ra sasambaloi kuno, koson ulun ra bokon intor ra bansa' kuno, maindalom mongoi ra bandar Dan giu' ra kagunungan ru Ralayo ru Galilia. Giu' no mampataak ilo ra taak simbalui ra sinungkalalaing sapi' gawayan ondo' pinaundok ru Raja' Jirobiam raja' ru Israil ra intok raginio.

⁶Intor ra sasambaloi kuno, masalok aku ayuk mongoi ra Jirusalim mangiantak ra pangiantakan ru ugama, koson ondo' nanusuban ru Ukum ri Musa ra moonong ulun ru Israil. Mongoi aku ra Jirusalim magibit santayaran ra ampos ru kinumos ondo' kasaa', anak kambing am anak domba ondo' inanak kasaa', sampiopor intor ra tinambiag ra soroi, am ampos ru linompor kasaa' ru bulu domba.

⁷Ngaangai' no taakin ku ra imam-imam papag ri Arun koson taak ru sambayang. Sampiopor intor ra gandum, wain, umau jaitun, kawa' ru dalima', kawa' ru ara am ampos ru tana' ra bokon no, taakin ku ra ulun Liwi ondo' maningganai ra sambayang giu' ra Jirusalim. Sampiopor ra karuo no tinalan ku, am ruit no makapakuan aku ra pangiantakan-pangiantakan giu' ra Jirusalim. Moonong bilor baalon ku ginio, ondo' ak am paat bilor katulu', bilor tangusan ru tana'.[1]

⁸Moonong bilor ondo' katalu mantayar aku ra sampiopor poyo ra ruandu' nangapuor, anak nailusan ra matuo am ulun bansa' ra bokon ondo' namagun ra popolos ru bansa' mai, am mangakan akai mabaya' ra pasulungon ra bunsag. Ngaangai' raginio baalon kuno koson gumagaya' ra Ukum ri Musa, ondo' inila' ri Dibora, ina' ru aki kuli, i Ananiil. Paat ra ama' kuli minatoi, nailusan aku ra matuo.

⁹Kasukor aku, inandu' ku i Anna, ralaa intor ra bansa' mai galama'. Makaanak akai sangulun ungkuyon am ininggalanan ku ri Tobias.

¹⁰Kopongo raginio rinakop aku am inibit giu' ra pagun Asyur am namagun giu' ra bandar Niniwi. Buoi minayan ra giu', ngaangai' pabukat kuno am ulun ru Israil ra bokon maindalom mangakan ra akanon ru ulun giu' ra pagun no,

¹¹kaa' marara' aku mangakan ra akanon nilo.

¹²Makara' ku toojo susuban ri Aki Kapuuno'.

¹³Ginio ra nambaal i Aki Kapuuno' Ondo' Masawat Kaga' no ra Raja' Salmanisir nangiou napasauk raki' ra pagawai istana koson mangatang ra balanja' ru ngaangai' pakuan ru raja'.

¹⁴Ra kalo poyo minatoi raja', maindalom aku mongoi ra pagun Midia koson mambali ra kuliamos ru raja'. Sangarawan ragili minapit aku giu' ra bandar Ragai giu' ra pagun Midia, am napatatang aku ra ruit kukula' ngangkarung ri Gabail pabukat ri Gabria. Karung-karung no makasuang nasailan 300 ngakilogram pirok.

¹⁵Kopongo Raja' Salmanisir minatoi, minalit riso anak ungkuyon nano i Sanirib. Kopongo raginio kiralanon giu' ra Midia makalalaa' kaga', saboi kalo boo mokoongoi aku ra giu' no.

¹⁶Paat ra pamarintaan ru Raja' Salmanisir, masuang indangan kuno ra pabukat rondo' bansa' raki'.

¹⁷Nampaakan aku ra ondo' nangaitilan am nangani' ra konoon ra ondo' kolondo' konoon. Amon makito ku baangkai ru bansa' kuno patirin giu' ra lisar ru timbok ru bandar, lobongon ku io.

¹⁸Paat ra sangarawan nagulas Raja' Sanirib ri Aki Kapuuno' Raja' Ondo' Masawat Kaga', saboi inukum io ri Aki Kapuuno' am Raja' Sanirib liminugut kalalaat intor ra Jiuda. Pakasaguli' intor ra Midia, raja' no siminangit toojo ra ulun ru Israil, am masuang intor risilo pinatoi no. Ra kalinuos kuno nangalap ra baangkai nilo am lobongo' ngaangai' no. Raja' no pana nanusub boo maguyum ra baangkai-baangkai no, kaa' kalo najampa'.

¹⁹Pambala' boo sangulun mamagun ru Niniwi ra raja' ra aku noyo ondo' nompolobong ra ulun-ulun pinatoi no. Paat nalimanan ku ra bayag kuno mapagon sabap ra binaal kuli, pansibuni aku. Paat baal raginio napandayan ru raja', nalaa' am pagiru' aku.

²⁰Ngaangai' rapu' kuno ginaau am pinasimpung ra rapu' ru istana. Kolondo' boo atan-atan raki' ondo' ak am andu' kuno i Anna am anak kuno i Tobias.

²¹Kalibos onom ngaminggu' ragili, Raja' Sanirib pinatoi ru ruo ngaulun anak ungkuyon nano ondo' narayus pagiru' giu' ra kabuluran Ararat. Anak ungkuyon no ra bokon i Isaradon sinauk ra raja'. Pinalansan no ri Agikar, anak ru maayo ungkuyon kuno i Anail ngaangai' panalingapuan ra ruit ru parinta am istana.

²²I Agikat pinasauk saguli' ra tingganai manalingapu ra istana, sabap paat ra pamarintaan ru Raja' Sanirib, raja' ru Asyur, kandoi ri Agikar manalingapu ra inumon, mambuli ra mohor ru raja', manalingapu ra ruit am magalung ra istana. Sabap ra akon kuno i Agikar, nasauk io ra ulun maparapit ondo' moonsoi raki' am raja', saboi nakauli' aku ra Niniwi.