Read Timugon Murut TOBIT 10 Bible Online

TOBIT 10 - Timugon Murut bible

TOBIT 10

¹Liliwa' raginio moonong orou i Tobit manguntob ra paat ondo' gogoton mongoi ra Ragai am muli'. Kaukop noyo paat no, am kalo poyo minuli' anak nano, indagu i Tobit,

²“Maaru' lair ru naaput io ra giu'. Ati lair ru minatoi noyo i Gabail saboi kolondo' ulun mapataak ra ruit no riso.”

³I Tobit pana tumalimpuun mangiluk guang.

⁴Indagu andu' nano i Anna ri Tobit, “Maaru' minatoi noyo anak kuli.” Io pana tumalimpuun mantangi' am manulaboi ri Tobias.

⁵“Alii bagu raki', alii ra anak kuli, buayoi kuli, kua polosoo' tokou minugar?”

⁶Indagu i Tobit ra andu' nano, “Roro' no, antuob. Pai' pangkara' ra jajajou. Maligag io. Ati lair ru mokoondo' nakaawang risilo saboi naaput ra giu'. Malansanan ulun namparangan riso, mabukat takau tupo riso. Pai' kangiluk sabap io. Muli' io ra mataki'.”

⁷Kaa' taam i Anna, “Pongkoror! Pai' pagabau raki'! Maaru' minatoi noyo anak kuli!” Moonong orou mingkual i Anna ra baloi am marayus monontong ra ralan binayaan ri Tobias paat minintor. Kalo masaga' io mangining ra osoi ayuk pana am muli' ayuk ra malupus mokotolop mato ru orou. Makasuku' ra baloi kalo mombolong io, kaa' sorondom mantangi' am manulaboi ra anak nali.

⁸Binantu' ri Raguil ra ibot ra bunsag paguatan ra anak nano atangon buoi ruo ngaminggu'. Kopongo bunsag no, indagu i Tobias ri Raguil, “Kataak no raki' muli' raino. Maaru' matuo kuli maimamang am kalo boo malansan makailong raki'. Nantunung aku noyo rirun ati kulaan baal ru ama' kuli paat ra aku nangiruan ra baloi.”

⁹Taam i Raguil, “Pai' poyo, anak! Manusub aku ra sangulun mongoi ri ama' muli koson mambala' ra moonsoi kou ayuk.” Kaa' jumajal i Tobias, “Pai'. Kataak noyo raki' muli' ra baloi ru ama' kuli raino.”

¹⁰I Raguil pana mingkakat am pataako' i Sara, anak nano ri Tobias, am niayuk sampiruo intor ra rapu' nano, iono ulipon, sapi', domba, kaladai, unta, bayang, ruit am parabot nano.

¹¹Koon raginio noyo io nangiou risilo mugar ra maligag toojo. Panabi' io risilo, kono, “Tumoojo kau. Gama' ru mambarakat Tuhan Ondo' Masawat Kaga' no rirun am i Sara. Gama' ru lakat poyo maayag aku koson makakito ra anak-anak min.”

¹²I Raguil pana mindagu boo ri Sara, “Ongoi no ra iwan muno. Intor raino ilo noyo matuo muno am okou anak nilo. Tumoojo anak kuno. Polosoon aku mangining ra mongoonsoi ayuk intor rirun buoi ra aku lakat poyo maayag.” Ganggol io boo risilo am polosoo' ilo minugar.

¹³Kopongo raginio indagu i Idna ri Tobias, “Gama' ru mangator Tuhan no rirun muli' ra maayag, anak kuno am pabukat tagamin kuno. Gama' ru ralalom ru kaayagan ti makakito aku ra anak-anak muno. Nasauk Tuhan ra sasi': Ra okou palansanon ku anak kuno. Pai' kangiluko' guang nano buoi ru bayag muno. Tumoojo Tobias. Intor raino andu' muno i Sara am ina' muno aku. Gama' ru maansukan takau ngaangai' saboi ra pupus ru bayag takau.” Ganggol boo i Idna risilo am polosoo' ilo minugar.

¹⁴Kopongo raginio nongompor i Tobias ra Tuhan ru limbowon am tana' ti, Raja' ru limbowon am tana' ti sabap pangkiralanan nano makaampos noyo ra moonsoi. Nambantu' io ra mangurumat ra karuo-ruo iwan nano ra buoi ilo maayag.[6] Io pana minugar ra maligag am naansukan kaga'.