Read Timugon Murut TOBIT 11 Bible Online

TOBIT 11 - Timugon Murut bible

TOBIT 11

¹Paat ra ilo sumuku' ra bandar Kasirin kalo maalur intor ra bandar Niniwi, indagu i Rapail,

²“Tobias, nakapandai kou ra atan koson baal ru ama' muno paat ito minugar.

³Ginio sabap ra moonsoi sigulu to ra andu' muno am manampos ra baloi ra kalo poyo makaratong bokon no.

⁴Pai' liliani' magibit ra amparu ru papait.” Ilo ruo pana nagulu minugar, am minaya' uku' ri Tobias no risilo.

⁵Liliwa' i Anna monontong ra ralan ondo' musiti' bayaan ru anak nali,

⁶kakito no i Tobias matong. Pampiau io ri Tobit, “Ilai', matong anak tano! Rangan nano niayuk!”

⁷Kalo poyo nakasuku' ra ama' nano, indagu i Rapail ri Tobias, “Mapali' mato ru ama' muno.

⁸Papipilo' amparu ru papait no ra mato nano. Tatapis no sumalangi' am makalungkab ra bulangkung mapulak intor ra mato nano, saboi makakito poyo ama' muno.”

⁹Nasimbul i Anna minuma' ra anak nano, am ganggali' no am indagu, “Buayoi kuno, nakakito aku poyo saguli' rirun. Raino matoi aku ra kalinuos!” Io pana nantangi'.

¹⁰I Tobit pana minigor am kabalu' pana nakasaru kalayam nano, ingkual io niayuk intor ra kulobon ra liwar.

¹¹Inggaar i Tobias ra ama' nano liliwa' nampaguut ra amparu ru papait. Sampuyo' no mato ru ama' nano, liliwa' nanungka' riso, indagu io, “Ikango' guang muno ama'!” Io pana napapipil ra amparu ru papait no ra mato ru ama' nano, am pinoloso tatapis no sumalangi'.

¹²Io pana ra karuruo kalindu' nano nanganit ra ondo' mokoondo' ra pompor ru mato ru ama' nano.

¹³Ganggol i Tobit ri Tobias liliwa' mantangi'. Pampiau io, “Makakito aku! Makakito aku rirun, anak kuno, buayoi kuno!

¹⁴Koompor noyo i Aki Kapuuno'! Omporo' noyo Io, sabap maayo Io! Koompor noyo ngaangai' malaikat Nano ondo' matulai. Gama' ru mabaya' Io ra kuasa' Nano mangampin ritakau. Omporo' noyo ngaangai' malaikat Nano ra sabuoi-buoi no. Nangimbolo' noyo Tuhan raki' ra maruol ti. Kaa' raino makakito aku saguli' ra anak kuno i Tobias.”

¹⁵Umpos boo i Tobias ra baloi. Naansukan kaga' guang nano, am mongompor-ngompor io ri Aki Kapuuno' ra bolos matangil. Tunungi' no ama' nano ra pangkiralanan nali makaampos noyo ra moonsoi. Sala' ayuk ka ruit inibit nano minuli', kaa' niayuk i Sara anak ri Raguil, ondo' nasauk noyo ra andu' nano. Nambala' io ra maar noyo andu' nano ra kulobon garabang ru bandar Niniwi am maar noyo makaratong.

¹⁶Naansukan toojo i Tobit, am liliwa' mongompor-ngompor ri Aki Kapuuno', ingkual io manguma' ra anak mangiwan nano giu' ra kulobon garabang ru bandar. Kakito i Tobit ru mamagun ra bandar Niniwi, nakasioro' ilo sabap minugar io misangulun am kolondo' nangitang riso. Tunungi' ilo ngaangai' boo ri Tobit ra makaasi' i Aki Kapuuno' riso am namabas ra mato nano.

¹⁷I Tobit pana timinuum ri Sara andu' ri Tobias, am nanguma' riso ra ragu-ragu ragitio, “Kaansayan matong anak kuno! Koompor noyo i Aki Kapuuno' ondo' nangator rirun ramon. Nambarakat noyo i Aki Kapuuno' ri ama' muno, am okou niayuk am poyo anak kuno i Tobias. Kaansayan matong ra baloi bagu mutu! Gama' ru masalok kou barakaton, masalok maligag am maansukan. Umpos agang!”

¹⁸Paat orou raginio naansukan ngaangai' ulun ru Jaudi ondo' minayan ra Niniwi. Akon ri Tobit, i Agikar am i Nadab, minatong niayuk am baya' naansukan risilo.