Read Timugon Murut TOBIT 12 Bible Online

TOBIT 12 - Timugon Murut bible

TOBIT 12

¹Kaampus bunsag paguatan no, pampiau i Tobit ri Tobias am indagu riso, “Anak kuno, pai' liliani' mangani' ra ayup ra ulun ondo' nangator noyo rirun, am niayuk ruit paruangon.”

²Taam i Tobias, “Kula' musiti' pataakon kuno? Kalo malubatan aku koborok pana amon mangani' riso sampiruo intor ra ngaangai' ondo' inibit kuno.

³Nangator io raki' minuli' ra maayag am napalabus ra andu' kuno intor ra riwato. Io poyo nagibit ra ruit no minuli' nabaya' raki' am pupus no namabas rirun. Ginio ra kula' kia suang ru ayup musiti' kuno pataakon riso?”

⁴Taam i Tobit, “Pangani' riso sampiruo intor ra ngaangai' ondo' inibit muno minuli' ra inindangan no. Ayup no maaya' riso.”

⁵Pampiau boo i Tobias ri Rapail am indagu riso, “Apuo' noyo koson ra ayup muno sampiruo intor ra ngaangai' ondo' inibit to. Okou pana makaugar ra maayag.”

⁶Kaa' pampiau i Rapail ri Tobit am i Tobias sikaruo ayuk, am indagu io risilo, “Omporo' noyo i Aki Kapuuno', am tunungo' noyo ngaangai' kinoonsoi ondo' binaal Nano ramuyun ra ngaangai' ulun, maa' raginio ilo pana mongompor am mapatulai Riso. Potonowo' noyo binaal ri Aki Kapuuno' ra matanda' ra ngaangai' ulun. Omporo' noyo Io ra kalo lalanggain.

⁷Motopot ra moonsoi mambuli ra ondo' inopot ru raja', kaa' binaal ri Aki Kapuuno' no musiti' potonowon am omporon. Baalon noyo ondo' moonsoi, akau pana kalo malumpa' ra karaat.

⁸Moonsoi poyo makiasi' ra guang mabanis am manaak ra indangan moonsoi ra matanda' intor ra makarapu' ondo' masuang ra ralan kalo mabanis. Moonsoi poyo manaak ra indangan moonsoi intor ra manimung ra mas.

⁹Ulun ondo' masaga' manaak ra indangan palabuson intor ra kapatayan am pusoon ngaangai' tula nano. Makaumur io ra maawar.

¹⁰Kaa' ulun ondo' malaat am makatula tumula' riso galama'.

¹¹Raitii' ni minindagu aku ra musiti' buliin ondo' inopot ru raja', kaa' binaal ri Aki Kapuuno' musiti' potonowon ra ngaangai' ulun. Raino mindagu aku ramuyun ra sotopot no am kalo pasibunion ku atan-atan.

¹²Tobit, paat ra okou am i Sara nakiasi' ra Tuhan, aku noyo ondo' nagibit ra pakiasian no ra saang Nano ondo' matulai. Moonong ra okou mompolobong ra ulun minatoi, aku niayuk ondo' napasuku' ra binaal moonsoi no ra Tuhan.

¹³Paat ra okou miningkakat intor ra mija' ra kalo nangumit ra koborok pana akanon ra mompolobong ra baangkai no, sinusub aku ri Aki Kapuuno' koson mangkinam rirun.

¹⁴Koon niayuk ra nanusub Io raki' mamabas rirun am mapalabus ra anak mangiwan muno i Sara intor ra kapaganan nano.

¹⁵Aku ti i Rapail, rondo' intor ra tulu' malaikat ondo' migor giu' ra saang ru Tuhan Ondo' Maayo Kaga' Kuasa', nakatampos koson mangandoi Riso.”

¹⁶I Tobit am i Tobias pana kubu samba ra tana' am nonontol ra malaa'.

¹⁷Kaa' indagu i Rapail risilo, “Pai' kalaa'! Kaansayan ramuyun! Omporo' noyo i Aki Kapuuno' ra sabuoi-buoi no,

¹⁸sabap ra minatong aku ra mangindangan ramuyun ra kasaga' ri Aki Kapuuno' am sala' ka kasagaan kuno galama'. Parimbai kano ra mongompor ra Tuhan buoi ru bayag mino.

¹⁹Paat ra akau mangkara' ra nakakito kau raki' nangakan, sotopot no kalo nangakan aku, baal no ayuk koon raginio.

²⁰Omporo' noyo i Aki Kapuuno' buoi ru bayag min giti ra tana' ti, am paringkuanang kano Riso. Raino sumaguli' aku Riso ondo' nanusub raki'. Tulisi' noyo ngaangai' ondo' nailian mino.” I Rapail pana nagaloi giu' ra limbowon.

²¹Pakaingkakat i Tobit am i Tobias, kalo boo nakito nilo io.

²²Ilo pana narimbai ra rimbai mongompor ri Aki Kapuuno' am naringkuanang Riso sabap nambaal ra binaal ra mangaayo, sabap ra minintalang noyo malaikat ri Aki Kapuuno' risilo.