Read Timugon Murut TOBIT 13 Bible Online

TOBIT 13 - Timugon Murut bible

TOBIT 13

¹I Tobit pana nakiasi' koson ragitio, “Koompor noyo i Aki Kapuuno' ondo' naayag ra sabuoi-buoi no, Koompor noyo Io ondo' makakuasa'!

²Motopot ra mangukum Io, Kaa' makaasi' Io niayuk. Mapatuun Io ritakau giu' ra tana' ru ulun namagatoi, malupus raginio mapaluat ritakau intor ra kapatayan; kolondo' makalabus intor ra kuasa' Nano.

³Okou Israil, paringkuanang no Riso ra saang ru bansa'-bansa', intok napatuliaran ramuyun.

⁴Potonowo' noyo kinaayo Nano ra giu' no, katulayo' noyo Io ra saang ru ngaangai' ondo' naayag; sabap Io noyo i Aki Kapuuno', Tuhan takau, Ama' takau ra sabuoi-buoi no.

⁵Kabalu' pana nangimbolo' Io ramuyun sabap ra kalaatan min, makaasi' Io ramuyun poyo am mapauli' ramuyun intor ra gino ngai' ru bansa'-bansa', intok min pinantutuliar.

⁶Amon sumaguli' kau Riso ra ngaangai' ru guang am salibuor min am nambaal ra ondo' motopot ra saang Nano, maaru' rumuli' Io mangindangan ramuyun am kalo marayus mansibuni intor ramuyun.

⁷Ilai' noyo atan ondo' binaal noyo ri Aki Kapuuno' ramuyun, Paringkuanang noyo Riso ra bolos matangil. Koompor noyo Tuhan sabap ra matimpok Io, katulayo' noyo Raja' ondo' mantilayun.

⁸Kabalu' pana minayan aku ralalom ru namatiran, maringkuanang aku niayuk ra Tuhan am mindagu ra kuasa' Nano ondo' maayo ra ulun ondo' makatula. Talikur kano intor ra tula-tula min am pambaal kano ra atan ondo' kasagaan ri Aki Kapuuno'. Pai' ru napandayan ra matimpakan Io am makaasi' ramuyun.

⁹Masaga' aku mapatulai ri Aki Kapuuno' kuno am Raja' Ondo' Masawat Kaga', maanggak guang kuno sabap ra kinaayo Nano.

¹⁰Musiti' ngaangai' ulun mapatanou ra katulayan Nano am marimbai ra rimbai mongompor Riso giu' ra Jirusalim. Okou Jirusalim, bandar matulai, ukumin kou sabap ra tula-tula ru mamagun muno. Kaa' makaasi' Tuhan ra ulun ondo' nambaal ra kasagaan Nano.

¹¹Paringkuanang kano ra Tuhan ra matanda' no, omporo' noyo Raja' ondo' mantilayun.[7] Gama' ru baalon saguli' Baloi Nano am maansukan kau poyo.

¹²Mapabansuk Tuhan ra ngaangai' ulun pinatiran muli, am mamagun muno ondo' naimbolo' tagamin No ra sabuoi-buoi no.

¹³Jirusalim, sinda muno mapaang kaga' tayar ra titikop ru tana' ti. Intor ra maalur matong bansa'-bansa' rirun koson sumamba ra Tuhan i Aki Kapuuno'. Kalindu' nilo nototop ra taak tayar ru Raja' Ondo' Masawat Kaga'. Papag ka papag maansukan ulun sabap okou, am inggalan muno koson ra bandar pinili' ru Tuhan maingal ra sabuoi-buoi no.

¹⁴Ulason noyo ngaangai' ondo' lumasang rirun, ondo' manungkob am momopol ra timbok-timbok muno, ondo' mamunsai ra manara-manara muno am monolob ra baloi-baloi muno. Kabarakat noyo ra sabuoi-buoi no ngaangai' ulun ondo' mangurumat rirun.

¹⁵Pakaansuk am kaanggak noyo, okou Jirusalim, sabap ra mamagun muno ondo' nambaal ra motopot. Muli' ilo intor ra namatiran am marimbai mongompor ra Tuhan. Pakaansuk noyo ulun ondo' motogom rirun am ondo' maansukan magilong ra kaansayan muno.

¹⁶Pakaansuk noyo ulun ondo' mantangi' sabap ra kaimbalaan muno, sabap makakito ilo ra bansuk muno am maansukan ra sabuoi-buoi no. Mongompor aku ri Aki Kapuuno', Raja' Ondo' Matulai,

¹⁷sabap ra baalon saguli' Jirusalim masauk ra ayanan Nano ra mantilayun. Jirusalim, mapara' bansuk ru guang kuno, paat makito ru papag kuno kaantakan muno am maringkuanang ra Raja' Ondo' Masawat Kaga'. Kulobon garabang muno intor ra jamrud am nilam, timbok muno intor ra batu parmata. Manara-manara muno intor ra mas am kubu-kubu muno intor ra mas kopoyo. Ralan-ralan muno inangkupan ra batu dalima' am batu-batu parmata ra mongologo.

¹⁸Intor ra kulobon-kulobon garabang muno morongog rimbai ra mangaansukan am intor ra baloi-baloi muno ulun sapipiau, ‘Koompor noyo Tuhan! Koompor noyo i Aki Kapuuno' ru Israil!’ Ulun ondo' binarakat ri Aki Kapuuno' Ondo' Matulai mongompor Riso ra sabuoi-buoi no.”