Read Timugon Murut TOBIT 14 Bible Online

TOBIT 14 - Timugon Murut bible

TOBIT 14

¹Ra ragu-ragu raginio namupus i Tobit ra rimbai mongompor nano

²Umur ri Tobit 62 ngambilor paat io nobolou. Pakakito poyo saguli', moonsoi bayag nano. Nambaal io ra masuang moonsoi am nagulayun nongompor ri Aki Kapuuno' am niayuk nantunung ra katulayan Nano. Umur ri Tobit nakasaboi 112 ngambilor am minatoi ra kalinuos. Linobong io giu' ra Niniwi ra upacara ondo' sotopot no.

³Kalo poyo minatoi, pampiau i Tobit ra anak nano i Tobias am indagu riso,

⁴“Buayoi kuno, ibito' ngaangai' anak muno am ongoi noyo ra pagun Midia. Mangintopot aku ra sangkinolor poyo bandar Niniwi ti ukumin ri Aki Kapuuno', koson ra rinagu noyo ru Nabi Nagum. Ngaangai' ondo' rinagu noyo ru nabi-nabi ri Aki Kapuuno' giu' ra Israil intor ra Niniwi am Asyur maaru' masauk. Moonong ragu suguton. Ngaangai' ondo' rinagu ri Aki Kapuuno' saukon ra paat no. Kalo lumungkang i Aki Kapuuno' ra bantu' Nano. Giu' ra Midia mamimio poyo ramuyun intor ra giu' ra Asyur kapoam giu' ra Babil. Pabukat-pabukat takau ondo' lakat poyo soroi giu' ra Israil pantutuliaron am auton intor ra pagun ondo' moonsoi no mongoi ra intok pamatiran. Titikop pagun Israil masauk ra tana' kaagisan. Samaria am Jirusalim masauk ra bandar ondo' mangasiluk. Baloi ri Aki Kapuuno' makai' kosolob am nalunsai-nalunsai no polosoon ra kukula' buoi.

⁵Kaa' makaasi' i Aki Kapuuno' ra ulun Nano poyo am magibit risilo muli' ra pagun Israil. Baalon nilo saguli' Baloi ri Aki Kapuuno' kaa' kalo moonsoi koson ragili, paat maukop ra maagu no. Paat raginio ngaangai' bansa' ru Israil sumaguli' intor ra pamatiran. Punaan bandar Jirusalim moonsoi koson ragili. Baloi ri Aki Kapuuno' baalon saguli' giu' ra bandar no koson ra rinagu ru nabi-nabi.

⁶Ngaangai' bansa' ra tana' ti pana tumalikur intor ra tula. Mangurumat ilo ri Aki Kapuuno' Ondo' Rondo' ayuk am Motopot, am mamatir ra sinungkalalaing nilo ondo' totopot mampalayau. Ngaangai' bansa' ra titikop ru tana' ti mongompor ri Aki Kapuuno' ondo' mantilayun am mambaal ra kasagaan Nano.

⁷Paat raginio mamayag i Aki Kapuuno' ra ngaangai' bansa' ru Israil ondo' gumagaya' Riso. Matong am tumimung ilo giu' ra Jirusalim. Pataakin risilo tana' ri Abragam no, am maayag ilo ra giu' no ra mamimio ra sabuoi-buoi no. Ngaangai' ulun ondo' motogom ri Aki Kapuuno' ra totopot no maansukan. Kaa' ulun malaat am ondo' makatula liomon intor ra tana' ti.

⁸Ginio ra iningo' bilin kutu, akau anak ku ngai'! Musiti' kau mangandoi ri Aki Kapuuno' ra guang mapasau, am baalon noyo atan ondo' kasagaan Nano. Ilaan noyo anak-anak min maa' raginio mambaal ilo ra moonsoi am masaga' mangindangan ra ulun musikin. Niayuk, maa' raginio mangkara' ilo ri Aki Kapuuno' am masalok mongompor ra Tuhan ra guang mapasau am ngai' ru ikang. Tobias anak kuno, ugar no iruani' bandar Niniwi ti. Pai' layun ragiti. Mopongo mu molobong ina' muno ra sapapa' kuno, musiti' kou mataki' mugar. Pai' ayan sorondom pana ra mabuoi poyo ra wilayah ru bandar ti. Malaat pagun ti am nototop ra makauyuyu'. Mamagun nano kalo makaliman ra mauyu'.

¹⁰Karaa' noyo atan koson pinamakuan ri Nadab ri Agikar, kamaman nano galama' ondo' napatuu' riso! Linobong i Agikar ra naayag poyo. Kaa' nambalos i Aki Kapuuno' ri Nadab ra kalaatan nano galama'. Mingkual i Agikar mongoi ra sinda, am i Nadab tumuun ralalom ru kalandaman mantilayun sabap masaga' io mamatoi ri Agikar. Nakalabus i Agikar intor ra landak ru kapatayan ondo' pinaatang ri Nadab riso, sabap masaga' i Agikar mangindangan ra ulun musikin. Kaa' i Nadab galama' naratu' ralalom ru landak ru kapatayan am pinatoi.

¹¹Ginio ra anak ku ngai', nakito min galama' atan ampos ru binaal moonsoi am atan ampos ru binaal malaat. Topot ra kalaatan makaampos ra kapatayan. Kaa' raino malawo aku no.” I Tobit pana pinaluya' ra intok pambalangan nano am minatoi. Linobong io ra ondo' sotopot no.

¹²Kopongo andu' ri Tobit minatoi, linobong io ra sapapa' ru ralaki nano. I Tobias am anak andu' nano pana minugar minongoi ra Ikbatana giu' ra Midia, am siminimpung ri Raguil, iwan ri Tobias.

¹³Nangurumat am nagalung i Tobias ri Raguil am i Idna ondo' matutuo noyo suku' ilo minatoi. Linobong ilo giu' ra Ikbatana. Nanungkus i Tobias ra kalangkayaan ri Raguil, koson ra io nanungkus noyo ra kalangkayaan ri Tobit ama' nali.

¹⁴Minatoi i Tobias giu' ra Ikbatana koson ra ulun urumaton kaga' paat ra umur 117 ngambilor.

¹⁵Ra kalo poyo minatoi, nakarampot io nangining ra tanou nalunsayan ru bandar Niniwi am nakakito ra mamagun nano inibit koson ra ulun rinakop mongoi ra pagun Midia ri Siaksaris, raja' Midia. Nongompor i Tobias ri Aki Kapuuno' sabap nangukum Io noyo ra mamagun ru Niniwi am Asyur. Binaal ri Aki Kapuuno' no nambaal riso maansukan am maringkuanang ra Tuhan buoi ru bayag nano.