Read Timugon Murut TOBIT 2 Bible Online

TOBIT 2 - Timugon Murut bible

TOBIT 2

¹Paat ra pamarintaan ru Raja' Isaradon, uli' aku ra baloi am simpung saguli' ra andu' kuno i Anna am anak kuno i Tobias. Paat ra pangiantakan Pentekosta, ondo' niayuk sabiton ra Pangiantakan Tulu' Ngaminggu', manturung aku mangakan ra akanon ru bunsag.

²Paat nagilong ra akanon masuang kaga' ra rasawat ru mija', indagu aku ri Tobias, “Buayoi kuno, ongoi no paguyum ra gino ngai' ru pabukat takau ra bandar ti, sangulun ondo' musikin am gumagaya' toojo ra Tuhan. Kimaiti' io mongoi akan ragiti. Inaanin tokou saboi kou makasaguli'.”

³Ongoi i Tobias paguyum ra sangulun pabukat ondo' musikin. Kaa' mataki' io siminaguli' am indagu, “Ama'! Ama'!” “Atan?” Kaku nangkuot. “Mokoondo' ra ulun takau pinatoi! Sinikak io am baangkai nano pinatiran am lakat poyo nakabanta' giu' ra pasar.”

⁴Pulali' aku ingkakat am iruani' mija' no am kalo nangakan ra akanon no. Alapo' ku boo baangkai, am palangano' ku ra ralalom rondo' baloi, sabap ra paat mokotolop mato ru orou bagu no molobong ku.

⁵Uli' aku am pariu'. Kopongo raginio pangakan aku ra guang mangiluk.

⁶Makara' ku ragu-ragu ru Nabi Amos intor ra bandar Bitil: “Pangiantakan mino makulau masauk ra panguliran am ngaangai' rimbai mino masauk ra sulaboi.” Aku pana nantangi'.

⁷Pokotolop mato ru orou, ongoi aku pangkali ra luang, am lobongo' baangkai no.

⁸Kinuritan aku ru pasambalayan am indagu, “Inuyum kono ragili ra potoyon sabap nompolobong kou ra baangkai, am amon ru kalo nagiru' kou, lair kopo patoi. Binaal mu poyo raino ti. Kalo kia malaa' kou?”

⁹Rondom raginio niayuk nariu' aku, am ingkual ra liliut mongoi koolong maar ra timbok. Rondom raginio malasu' kaga', saboi kalo sinilian ku bulos.

¹⁰Kalo nakapandai aku giu' ra timbok no, tuma' ru rasawat kuli, makapilit. Tatai' nano lakat poyo malaalasu' nakasubo ra mato kuti. Salula' boo bulangkung mapulak ra mato kuti. Tuum aku ra duktur, malupus sangulun mongoi ra sangulun, kaa' piroton tapisi', gumaai japul ru mato kuti, saboi pupus no nalingon aku kobolou. Apat ngambilor buoi ra kalo makakito aku. Pabukat-pabukat kuno malumpus guang magilong ra baal kuno. Buoi ru ruo ngambilor inalungan aku ri Agikar saboi minanding io ra libung Ilumais.

¹¹Pakabanding i Agikar, andu' kuno i Anna, koson kasuangan ru ruandu' ra bokon musiti' mangandoi koson mambaal ra konoon.

¹²Masauk boo ra konoon, atarin no ra ulun nakibaal no, am bayarin. Sangarawan ragili, bulintok mambusak nopongo no rondo' konoon, am atari' no boo ra ulun nakibaal no. Iningkoos io bayari', rinuangan ra anak ru kambing alapon ra kana'.

¹³Pakasaboi ra baloi, tumalimpuun anak kambing no mampagala'. Piawo' ku andu' kuno am kuati', “Ati intor ru kambing no? Tinakou mu kia? Pasagulio' ra tatangan no! Kalo makaakan takau ra ondo' tokowon.”

¹⁴Taam andu' kuno, “Kambing ti pinaruang tupo ra pinambayar no.” Kaa' kalo mangintopot aku. Binaal ru andu' kuno nampakauyu' kaga' raki'. Nanusub aku riso mapasaguli' ra kambing no ra tatangan no, kaa' minansang io. “Raino makito paliso muno ra sotopot no!” ra io giminolok. “Ati boo bonsoi muli? Ati boo binaal moonsoi muli?”