Read Timugon Murut TOBIT 4 Bible Online

TOBIT 4 - Timugon Murut bible

TOBIT 4

¹Paat orou raginio niayuk nakara' ri Tobit ruit pinabulian nali ri Gabail giu' ra Ragai, giu' ra pagun Midia.

²Kon ru guang nano, “Kinitaak ku noyo ra Tuhan maa' raginio matoi aku ayuk. Moonsoi piawon ku anak kuno i Tobias am tunungin ku ra ruit no ra aku kalo poyo matoi.”

³I Tobit pana nampiau ri Tobias am indagu, “Buayoi kuno, malupus ra aku matoi, lobongon aku ra bobonsoi. Urumato' ina' muno am alungi' io buoi ru bayag nano. Mopongo ra io matoi, lobongon ra sapapa' kuno. Karaan ra naimbolo' io paat maapang am naganak rirun. Ginio ra pirot no koson mapabansuk ra guang ru ina' muno, am pai' pantipagon riso ra paliso muno.

⁵“Buayoi kuno, karaan Tuhan i Aki Kapuuno' muno buoi ru bayag muno. Pai' pakatula am pai' anggal ra susuban-susuban Nano. Masalok kou mambaal ra ondo' moonsoi am motopot, am pai' kou labit ra kalaatan,

⁶sabap ulun ondo' mambaal ra ondo' motopot makaampos ralalom ngaangai' pirot nilo.

⁷“Pangani' no ra taak pangindangan ra mataau ra osoi ondo' gumagaya' ri Aki Kapuuno'.[3] Pai' pansagulian guang paat manaak ra taak pangindangan. Amon kalo kailion mu ulun musikin, kalo niayuk kailion kou ri Aki Kapuuno'.

⁸Pangani' no ra taak pangindangan maya' ra mataakan muno. Sumuang linonggom muno, sumuang poyo ondo' musiti' muno aniin koson ra taak pangindangan. Kaa', kabalu' pana paginakanan muno sanganu, pai' kalaa' mangani',

⁹sabap ra okou mangani' no mambuli ra rapu' ondo' mologo ra paat ru kapaganan.

¹⁰Motopot ra mambaal ra moonsoi ra ulun musikin iono baal ondo' kasagain ri Aki Kapuuno' Ondo' Masawat Kaga'. Baalo' noyo ginio, am makalabus kou intor ra kalandaman ru kapatayan.

¹²“Buayoi kuno, alungi' inan muno ra ruandu'-ruandu' mantalan ra inan. Ondo' maatang, musiti' kou manambili' ra andu' intor ra bansa' takau galama', sabap ra papag itakau ti ru nabi-nabi. Pai' anduo' ulun ondo' sala' ka intor ra bansa' takau. Karaa' noyo ra kinamatuaan takau i Nuu, i Abragam, i Isak am i Jakub, ngaangai' no naguot ra pabukat nilo. Nambarakat i Aki Kapuuno' risilo saboi masuang anak nilo am papag nilo nanugul ra tana' ru Israil.

¹³Ginio ra tagami' pabukat-pabukat muno. Pai' kalimbau manambili' ra sangulun ralaa ra popolos nilo koson alapon mu ra andu'. Kalimbawan magibit ra kasindualan maayo am kapusaan, koson niayuk ra katiaran mangkinibit ra kamusikinan am bitilan.

¹⁴“Bayarin gaji' ru ulun mangngandoi muno moonong orou, am pai' guuto' ruit no saboi ra suabon no. Amon mangurumat kou ri Aki Kapuuno', moonsoi balos No rirun. Buayoi kuno, alungi' paliso muno moonong paat. Kasalok tumimbalos ra matanda' koson ra ulun masawat kaga' inigilaan.

¹⁵Atan ondo' okou galama' kalo masaga', pai' mu baalo' ra ulun bokon. “Pai' majanjayan kaga' manginum ra wain am pai' kou indalom magauk.

¹⁶“Intor ra akanon muno, pangani' ra ulun ondo' maitilan, am intor ra bayangon muno, pangani' ra ulun musikin. Atan ondo' kalabaan muno pangani' no koson ra taak pangindangan. Paat ra akau mangani' ra taak pangindangan, pangani' ra mabanis guang am mataau.

¹⁷“Paat ra matoi sangulun ondo' motopot, sulungin ra akanon ondo' lumatapan ra sasambaloi nano,[4] kaa' pai' baalo' ginio ra ulun makatula.

¹⁸“Pakibilin ra moonong ulun mapintar, am pai' jojowo' bilin ondo' mokoonong.

¹⁹“Omporo' noyo Tuhan, i Aki Kapuuno' muno ra moonong paat. Pakitaak noyo Riso maa' raginio maningganai ra bayag muno, am maa' raginio ngaangai' inatangan muno am baalon muno makaampos. Ra gino ngai' ru bansa'-bansa' ra bokon kolondo' ondo' mangapu ra bilin ri Aki Kapuuno'. Io noyo puun ru ngaangai' bilin ondo' moonsoi. Kaa' amon masaga' Io, mapatuun Io niayuk ra ulun giu' ra intok ru kapatayan. Karaa' toojo ngaangai' panuluan kutu; pai' saboi mokoondo' malilianan muno.

²⁰“Raino masaga' tokou balain ragili pinabulian ku ruit masuang ri Gabail anak ri Gabria giu' ra bandar Ragai ra pagun Midia.

²¹Raino nasauk takau ra musikin, kaa' kalo pana magalabo kou. Amon gumagaya' kou ri Aki Kapuuno', minggalur ra ngaangai' tula am mambaal ra kasagaan ru Tuhan, i Aki Kapuuno' muno, mokoowot kou ra masuang rapu'.”