Read Timugon Murut TOBIT 6 Bible Online

TOBIT 6 - Timugon Murut bible

TOBIT 6

¹I Tobias pana minugar nabaya' ra malaikat. Minaya' uku' ri Tobias risilo. Narayus ilo minugar saboi ra timinolop mato ru orou, am pombolong maar ra Sungoi Tigris.

²Tuun i Tobias ra sungoi koson mambagu' ra kalayam nano. Pulusat ru papait ondo' maayo timinindak intor ralalom timug am kuminam manimpar ra kalayam nano. Golok io,

³am indagu malaikat no riso, “Rokopo' papait no! Pai' labusi'!” Rokopo' ri Tobias ginio am ralaato' no ra lantur.

⁴Indagu malaikat no, “Abui' papait no. Alapo' amparu, pusu' am angkayau no, am bulii' toojo, sabap ginio tatapis pamabas. Kaa' musiti' mu patirin suang ru tinai' no.”

⁵Abui' ri Tobias papait no. Kaingkual amparu, pusu' am angkayau no, tunui' no papait no. Santayaran no inakan am santayaran no inusian koson ra lutu'.

⁶Ilo ruo pana namparayus ra pangkiralanan saboi maar ra pagun Midia.

⁷Pangkuot i Tobias, “Rangan ku Ajaria, atan maruol ondo' maalap kababas ra amparu, pusu' am angkayau ru papait no?”

⁸Taam malaikat, “Amon solobon pusu' am angkayau ru papait no, lisun no makapangunjau ra riwato intor ra ulun subolon. Mugar ra mataki' riwato no, am kalo boo jojowon ulun no ra mantilayun.

⁹Amparu ru papait no pamabas ra ulun ondo' mato nano nakulaupan ru bulangkung mapulak. Amon paluiton amparu ru papait no ra mato nano am sampuyon, bulangkung no pana mairu', am mababas ulun no.”

¹⁰Paat ilo nakasaboi giu' ra pagun Midia, am maar noyo ra bandar Ikbatana,

¹¹indagu i Rapail, “Rangan ku Tobias!” Taam i Tobias, “Atan ginio?” Indagu i Rapail, “Musiti' to mombolong giu' ra baloi ri Raguil. Okou po ngai' riso. Rondo' ayuk anak nano; sangulun ralaa makainggalan ri Sara.

¹²Okou pabukat no ra mamaar kaga', am maaya' toojo koson maguot riso am manungkus ra ngaangai' kalangkayaan ru ama' nano. Ralaa raginio moonsoi guang, baani am mantalur kaga'. Ama' nano niayuk sangulun ondo' moonsoi guang.

¹³Rondom raiti' mansunur aku ra ama' nano, maa' raginio mangiou io rirun manangandu' ra anak nano, sabap okou no maaya' kaga'. Bunsag ru paguatan baalon takau malupus ito makasaguli' intor ra bandar Ragai. Nakapandai i Raguil ra okou no maaya' kaga' manangandu' ra anak nano. Ginio ra kalo maimpayan no panamung muno kapoam manaak ra anak nano ra ulun bokon, sabap amon impayin no, lumungkang io ra Ukum ri Musa am musiti' ukumin ra matoi. Ginio ra iningo' bilin kutu. Rondom no mansunur aku am i Raguil intor ra ralaa no, am atangon mai pantamungan min. Makasaguli' to intor ra Ragai, ibiton to io muli'.”

¹⁴Kaa' indagu i Tobias, “Rangan ku Ajaria, nakaining aku ra tunung ru katulu'-tulu' ngaulun ralaki nano ragili. Ngaangai' nilo minatoi giu' ra lamin pambalangan paat ra rondom parulugan ra kalo poyo makaparulug riso. Koon ru ulun, pinatoi ilo ru riwato.

¹⁵Kalo jamarin no i Sara, kaa' moonong ulun ondo' masaga' lumampit ri Sara potoyon paat raginio. Aku ti anak langkuir, am amon ru matoi aku, maaru' kalumpusan ru matuo kuno magibit ra patayan nilo. Mulu' poyo kolondo' anak nilo ra bokon koson mompolobong risilo.”

¹⁶Taam malaikat no, “Nalilianan mu noyo kia bilin ru ama' muli? Moogot io maa' raginio manambili' kou ra ralaa intor ra pabukat muno galama'. Iningo' toojo. Pai' lioo' riwato no. Tambilio' noyo ralaa no. Mangintopot aku ra rondom no pataakon i Sara masauk ra andu' muno.

¹⁷Paat ra okou mumpos ra lamin pambalangan, musiti' kou magibit ra santayaran ra pusu' am angkayau ru papait, am patampako' ra intok panalaban ra kaminyan. Owou no mongowou ra titikop ru lamin no. Amon maalok ginio ru riwato no, magiru' io am kalo boo minggaar ri Sara ra sabuoi-buoi no.

¹⁸Kaa' kalo poyo marulug kou ra andu' muno, musiti' akau ruo migor am makiasi' ra Tuhan Ondo' Masawat Kaga' maa' raginio makaasi' am magalung Io ramuyun. Pai' kalaa'. Intor ra talimpuun i ralaa no suput ru abuk muno. Mamayag kou riso am magibit riso ra baloi muno. Mangintopot aku ra okou am i Sara aniin ra anak masuang. Igondo' poyo, pai' kaimamang!”

¹⁹Kaining ri Tobias ragu ri Rapail ra pabukat no poyo i Sara tampilon ra ama' nano, makaguang io riso am masaga' maguot riso.