Read Timugon Murut TOBIT 7 Bible Online

TOBIT 7 - Timugon Murut bible

TOBIT 7

¹Pakasaboi ilo ra bandar Ikbatana, indagu i Tobias, “Rangan ku Ajaria, rayuso' aku atari' ra baloi ri Raguil pabukat kuno.” Malaikat no pana nangator riso ra giu' no. Napaat nilo i Raguil tuturung maar ra kulobon ru liliut ru baloi nano. Panabi' i Ajaria am i Tobias ri Raguil, am balasi' no tabi' nilai ra minindagu, “Pabukat kau, ibok umpos! Kaansayan matong ra baloi mai.” Ibito' ri Raguil ilo mumpos ra baloi nano,

²am indagu ri Idna, “Mansalu toojo tuu' bagu no ra pabukat kuli i Tobit.”

³Indagu i Idna risilo, “Pabukat kau, ati intor min?” Taam i Tobias am i Rapail, “Ulun akai ru Israil intor ra bansa' Naptali, intor ra bansa' pinatiran giu' ra bandar Niniwi.”

⁴Pangkuot poyo i Idna, “Makaulig kau kia ri Tobit pabukat mai?” Taam ilo, “Makaulig akai riso.” Pangkuot i Idna, “Ati kulaan boo riso i?”

⁵Taam ilo, “Lakat poyo naayag am maligag.” Ruangi' boo ri Tobias, “I Tobit ama' kuno.”

⁶Kaining ginio, bigor i Raguil am alok ri Tobias liliwa' nantangi' ra kaansukan. Io pana mindagu, “Gama' ru mambarakat i Aki Kapuuno' rirun anak kuno. Ama' muno sangulun moonsoi am matanda'. Mangiluk toojo ra ulun maayag ra moonsoi am masaga' mangindangan no nobolou!” Ganggali' no i Tobias liliwa' mantangi'.

⁷Andu' nano i Idna am anak nilo i Sara minaya' pantangi'.

⁸Inuma' ri Raguil ra maansukan i Tobias am i Rapail. Nanimbalui io risilo ra domba gawayan.

⁹Pakapariu' karuo-ruo tambului no am tumurung ra mangakan, indagu i Tobias ri Rapail, “Rangan ku Ajaria, kitaako' ri Raguil maa' raginio pataakon no anak nano masauk ra andu' kuno.”

¹⁰Naining ri Raguil ragu-ragu no am indagu io ri Tobias, “Akan no am inum no, am rumamai noyo ra rondom raiti'. Okou no maaya' kaga' manangandu' ri Sara. Kalo pataakon ku ra ulun bokon, sabap okou pabukat kuno ra mamaar kaga'. Kaa' musiti' aku mambala' rirun ra ondo' sotopot no.

¹¹Pinawatan ku noyo io nakapansusunu' ra tulu' ngaulun, ngaangai' no pabukat mai. Kaa' ngaangai' nilo minatoi sigagama' paat ra rondom kasaa' marulug. Raino akan no am inum no. Alungin kau ruo ru Tuhan.”

¹²Taam i Tobias, “Kalo mangakan am manginum aku ra kalo poyo tumaam kou.” Nangiou i Raguil. Kono, “Iou. Pataakon ku io rirun sumugut ra Ukum ri Musa. Inaru' noyo paguatan ti ri Aki Kapuuno' Ondo' Masawat Kaga', am apuo' noyo io koson ra andu' muno. Intor raino nakapagirot kau, rondo' am bokon, am pataakon i Sara rirun ra sabuoi-buoi no. Gama' ru Tuhan Ondo' Masawat Kaga' magalung ramuyun ra rondom raiti' maa' raginio maayag. Gama' ru makaasi' Io ramuyun am moonsoi rirun!”

¹³Piawo' boo ri Raguil anak nano. Pakaumpos io, guuto' ri Raguil kalindu' ri Sara am patutuyo' no ri Tobias am ra barakat nano, “Alapo' noyo io ra andu' muno sumugut ra inaru' ru Ukum ri Musa. Ibito' noyo io ra matanda' ra baloi ru ama' muno. Gama' ru manaak i Aki Kapuuno' Ondo' Masawat Kaga' no ramuyun ra kaayagan moonsoi.”

¹⁴Panusub boo i Raguil ra andu' nano i Idna mangalap sampila' karatas rinulun ondo' lakat poyo kolondo' tulisan. Tulisi' no ra karatas no nabantuan ru paguatan ondo' mambala' ra napataak io ri Sara no ri Tobias saukon ra andu' nano sumugut ra inaru' ru Ukum ri Musa. Kopongo raginio bagu no nangakan am nanginum ilo.

¹⁵Piawo' boo ri Raguil andu' nano am indagu riso, “Tomposo' rondo' lamin am paumposo' i Sara.”

¹⁶Panampos i Idna ra lamin koson ra susuban ru ralaki nano, am paumposo' i Sara ra giu' no. Tumalimpuun io mantangi' sabap ra anak nano, am piiri' no lomou ru mato nano, am indagu ri Sara,

¹⁷“Sara, kaikang no. Mangintopot aku raino ti aniin kou ru Tuhan Ondo' Masawat Kaga' ra kaansukan tayar ru pasualion ra kalumpusan. Kaikango' noyo guang muno!” Iruani' boo ri Idna lamin no.