Read Timugon Murut TOBIT 8 Bible Online

TOBIT 8 - Timugon Murut bible

TOBIT 8

¹Kopongo nangakan am nanginum, nasaboi paat no mombolong, am atari' ru matuo ri Sara i Tobias ra lamin kaalangan ondo' tinampos no.

²Nakara' ri Tobias bilin ri Rapail, am alapo' no pusu' am angkayau ru papait intor ra ralalom ru kantungan inibit nano, am patampako' ra intok panalaban ra kaminyan.

³Owou ru papait no mapajajou ra riwato, saboi nagiru' io ra Misir.[5] Kaa' ilowo' io ri Rapail am rokopo' io ra giu' no am indibaki' bangkilo' kalindu' am kalayam nano.

⁴Paat sikaruo ayuk i Tobias am i Sara ra lamin ondo' nakaput, luat i Tobias intor ra nambalangan am indagu ra andu' nano, “Tirong no, antuob. Ibok pakiasi' to makimasi' am makialung ra Tuhan.”

⁵I Sara pana timinirong am pakiasi' ilo makialung ri Aki Kapuuno'. Pakiasi' i Tobias koson ragitio, “Koompor Kono, iou Aki Kapuuno' ru kinamatuaan maili! Gama' ru omporon inggalan Muno ra sabuoi-buoi no ru ngaangai' binaal Muno giu' ra suruga' am ra tana' ti.

⁶Okou nambaal ri Adam; pinataak Mu riso i Awa masauk ra andu' nano koson mangindangan am manungka' riso; nasauk ilo ra kinamatuaan ru ngaangai' ulun. Mindagu Kou, ‘Kalo moonsoi amon ru misasangulun ulun no; pataakon Ku riso mangindangan ondo' maaya'.’

⁷Iou Tuhan, raino alapon ku ra andu' i Sara, ra ngaangai' kabanisan ru guang, am sala' ka sabap ra guang kumambil. Kasaga' no makaasi' ramon ruo ngaulun, maa' raginio masimpung akai saboi ra matutuo.”

⁸Nagampan ilo mindagu, “Amin,”

⁹am pombolong buoi ru rondom.

¹⁰Rondom raginio tirong i Raguil. Piawo' no ulun-ulun mangngandoi nano, am pabaya' ilo minongoi pangkali ra lobong, sabap kinara' no, “Ati lair minatoi i Tobias, am alapon takau ra kakuritan ru ulun.”

¹¹Pakapangkali ra luang, umpos ri Raguil ra baloi am indagu ra andu' nano,

¹²“Susubo' mangngandoi ruandu' mumpos koson magilong ru lakat poyo maayag i Tobias. Amon ru minatoi io noyo, moonsoi lobongon takau io ra kalo poyo mapandayan ru ulun.”

¹³Ilo pana nanusub ra mangngandoi ruandu' magibit ra lampung am mangukab ra kulobon koson magilong ru lakat poyo maayag i Tobias kapoam kalo. Pakaumpos mangngandoi no, ilai' no karuo-ruo no tatanga' nokororot.

¹⁴Indibok io miningkual am pambala' ri Raguil am i Idna ra lakat poyo maayag ri Tobias am kalo napilatan.

¹⁵Ilo pana nongompor ri Aki Kapuuno' Ondo' Masawat Kaga'. “Koompor Kono, iou Aki Kapuuno'! Gama' ru mongompor ulun Muno Rirun ra sabuoi-buoi no; gama' ru mongompor ilo Rirun ra guang ondo' totopot mapasau.

¹⁶Koompor Kono sabap napabansuk raki'; maayo kimasi' Muno ramon; makito atan ondo' kalaanan kuno kalo nasauk.

¹⁷Koompor Kono, iou Tuhan, sabap ra makaasi' Kou ra karuo-ruo anak langkuir no. Pakaasi' no am alungi' no ilo, maa' raginio magulayun ilo maayag ra maansukan ralalom ru togom.”

¹⁸Panusub i Raguil ra ulun-ulun mangngandoi nano namumpun ra luang ru lobong no ra kalo poyo sumirang mato ru orou.

¹⁹Kopongo raginio panusub i Raguil ra andu' nano nambaal ra masuang ruti'. Io galama' minongoi ra intok napalabusan ra bibiag tinambiag nano am saguli' ra nagibit ruo ngainan sapi' gawayan am apat ngainan domba gawayan. Nanusub io ra ulun-ulun mangngandoi nano nanimbalui ra bibiag tinambiag no am momongo ra bunsag paguatan.

²⁰Io pana nampiau ri Tobias am indagu riso, “Ayan no ragiti buoi ruo ngaminggu' koson mangakan am manginum mabaya' ramon. Polosoo' anak kuno maansukan sabap naimbolo' io kaga'.

²¹Mopongo raginio makapangalap kou sampiruo intor ra rapu' kuno am muli' ra baloi ru ama' muno ra maayag. Rapu' kuno ra sampiruo poyo masauk ra longgom muno niayuk malupus ra aku am i Idna matoi. Kaikango' noyo guang muno! Raino aku ama' muno am i Idna ina' muno, am okou anak mai koson ri Sara.”