Read Timugon Murut TOBIT 9 Bible Online

TOBIT 9 - Timugon Murut bible

TOBIT 9

¹Piawo' boo ri Tobias i Rapail am indagu riso,

²“Rangan ku Ajaria, moonsoi mongoi kou tuum ri Gabail giu' ra bandar Ragai. Ibito' apat ngaulun mangngandoi am ruo ngainan unta. Pataako' ri Gabail surat inono' ti maa' raginio makataak no ruit no rirun. Kimaiti' niayuk io sumaang ra bunsag paguatan mai.

³Nakapandai kou ra untotobon ru ama' kuli orou saboi aku makauli'. Mangiluk io kaga' amon ru mabuoi aku. Nakapandai kou niayuk ra jinajalan aku ri Raguil mayan ragiti, am kalo maalap ku ra lungkang susuban nano.”

⁵I Rapail pana minugar nabaya' ra apat ngaulun mangngandoi am ruo ngainan unta mongoi ra bandar Ragai giu' ra pagun Midia, am ayan ra baloi ri Gabail. Pataako' no ri Gabail surat inono' no. Io pana nantunung ra i Tobias anak ri Tobit bagu ayuk naguot, am piniau i Gabail sumaang ra bunsag paguatan no. Untobo' no kantungan-kantungan ru ruit ondo' lakat poyo mokoondo' ra meterai, am posokoyo' ngaangai' no ra tampak ru unta-unta.

⁶Suabon no riminondom ilo kaga' minugar minongoi ra bunsag paguatan. Pakasaboi ra baloi ri Raguil, natuum nilo i Tobias tatanga' nangakan. Nalingas i Tobias ingkakat am panabi' ri Gabail. Balasi' ri Gabail tabi' no ra nalamawan, am ruangi', “Anak ra moonsoi kaga' guang, koson kou ra ama' muli ondo' moonsoi am mataau! Gama' ru mambarakat i Aki Kapuuno' Ondo' Masawat Kaga' no rirun am andu' muno am niayuk iwan muno. Koompor noyo i Aki Kapuuno', sabap makito ku bulos ri Tobit pantukir kuli!”