Read Timugon Murut JUDIT 10 Bible Online

JUDIT 10 - Timugon Murut bible

JUDIT 10

¹Nopongo nakiasi' ri Aki Kapuuno' ru Israil,

²miningkakat i Judit, nampiau ra mangngandoi ruandu' nano, am tuun ra baloi intok kaindalaman no mayan paat ra orou Sabat am orou bunsagan.

³Iruo' no konoon karung pulanu ra mangulir am bayang ru napuor nano, am pariu' am pangkupil ra umau mangaamis owou ondo' moonsoi kaga'. Surayo' no abuk nano am bongkoso' ra ribin. Pambayang io boo ra bayang ru munsag ondo' bayangon paat i Manasi, ralaki nano lakat poyo naayag.

⁴Nangkasut am nalimpor io ra moonsoi kaga', sinsing am anting-anting am niayuk golong ra kalindu' am kalayam. Ilain mantalur io kaga', saboi makabunduk ra guang ru moonong ungkuyon ondo' magilong riso.

⁵Nanusub i Judit ra ulipon ruandu' nano magibit ra kantungan kungkung makasuang ra wain am rarapu' makasuang ra umau. Suangi' no boo rondo' kantungan ra rondo' salinut ru tapung gandum, kinawa' kinapua', am kukula' ngampila' ruti' ondo' binaal sumugut ra aturan ru ugama ru Jaudi. Ngaangai' ru linutu' no linopot no, am pinatanggalan no ra mangngandoi ruandu' nano.

⁶Karuruo ngaulun ruandu' no pana miningkual mongoi ra kulobon garabang Bitulia am nakakito ri Ujia, Gabris am Garmis mantamung ra giu' no.

⁷Nakito nilo i Judit ondo' nalimpor noyo am nangalig ra bayang, am nakasioro' toojo ra kinantalur nano. Ragu nilo riso,

⁸“Gama' ru i Aki Kapuuno' ru kinamatuaan takali mambarakat rirun am mambaal ra inatangan muno makaampos ra kasugutan ru Jirusalim am kamanangan ru Israil.”

⁹Igugulatur i Judit am pakiasi' ri Aki Kapuuno', am indagu risilo, “Susubo' noyo ulun mangukab ramon ra kulobon. Raino baalon kuno atan ondo' sinunur takau noyo.” Sinusub buayoi-buayoi nangukab riso ra kulobon garabang,

¹⁰am i Judit am mangngandoi ruandu' nano pana nangiruan ra bandar no. Nangurio ulun ru giu' no riso liliwa' io tumuun intor ra gunung sumuku' ra limayak, saboi ra io kalo boo makito.

¹¹Rinayus ru karuruo ngaulun ruandu' no ugar nilo giu' ra limayak, saboi natuum ru saujor Asyur ondo' tatanga' nagalung.

¹²Rinakop i Judit am kuati' nilo, “Atan bansa' min? Ati intor am ati angayan?” “Aku ti ulun ru Ibrani,” taam nano, “kaa' nagiru' aku intor ra bansa' kuno sabap ra polosoon kau ri Aki Kapuuno' mamuso risilo.

¹³Ragino muma' aku ri Golopirnis, panglima masawat ru saujor min, koson mapasuku' ra tanou maatang. Makapanulu' aku ra ralan ondo' musiti' janjangon maa' raginio maalap kaparinta titikop ru libung ragitio ra kolondo' mailus ra sangulun pana intor ra ulun nano.”

¹⁴Ulun ra giu' no nakasioro' ra kinantalur ri Judit no. Pokorongog ra tunung no, indagu ilo,

¹⁵“Naayag kau sabap ra mataki' minatong ragiti koson muma' ra panglima mai. Ongoi no ra kim nano ragino niayuk. Kukula' ngaulun ramon mantamung am mapasuku' ramuyun ra panglima.

¹⁶Pai' kau kalaa' amon ru muma' kau riso. Paraguo' min ayuk riso atan ondo' rinagu min noyo ramon. Maaru' moonsoi pamakuan ramuyun.”

¹⁷Ilo pana nampili' ra maatus ngaulun koson mantamung ri Judit am mangngandoi ruandu' nano mongoi ra kim ri Golopirnis.

¹⁸Tanou ra rinatangan ri Judit pinabala' intor ra kim ka kim, am intor ra ngaangai' nangkiman ru Asyur, minatong ulun liminimpu. Liliwa' i Judit naginaa ra liwar ru kim ri Golopirnis saboi paumposon, linimpuan io ru masuang saujor ru Asyur.

¹⁹Nakasioro' ilo nagilong ra kinantalur nano am mampaguang ati kulaan bulos ru ulun bansa' ru Israil no. “Osoi kia makapagasab ra bansa' ondo' makaruandu' ondo' mantalur kaga'?” pasakuot ilo ra rondo' am bokon. “Moonsoi poyo potoyon takau ngaangai' ungkuyon no; amon ru kalo, mamparuung ulun ru Jaudi ra titikop ru tana' ti.”

²⁰Kopongo raginio ingkual kukula' ngaulun magalung galama' ri Golopirnis am ulipon-ulipon nano am inataran nilo i Judit mumpos ra ralalom ru kim.

²¹Tatanga' i Golopirnis miniluluya' ra pambalangan nano ragana' ru tailon ondo' binaal intor ra gantian matanggilung am gantian mas am niayuk linimpor ra jamrud am batu mongologo.

²²Bulintok binalaan intor ri Judit, luat i Golopirnis am ongoi ra tampilon ra saang ru kim nano, nagulu ulipon-ulipon nano ondo' nagibit ra lampung intor ra pirok.

²³Paat ri Judit riminapil ra saang ri Golopirnis am ulipon-ulipon nano, nangimuag ilo ra kinantalur nano. Igugulatur i Judit ra saang ri Golopirnis, kaa' ulipon-ulipon nano nangindangan napaingkakat ri Judit.