Read Timugon Murut JUDIT 11 Bible Online

JUDIT 11 - Timugon Murut bible

JUDIT 11

¹Minindagu i Golopirnis ri Judit, “Pai' kalaa'; kalo pana magalabo kou. Kalo poyo igondo' aku kalaat ra osoi pana ondo' masaga' makiulipon ra Raja' Nibukadnijar, raja' ru titikop ru tana' ti.

²Amon ru bansa' mino giu' ra kagunungan no kalo nagasab raki', maaru' kalo masaga' aku makimampatoi risilo. Ngaangai' kapaganan raginio kinibit ru ilo galama'.

³Kaa' indagu noyo kua tatango' mu ilo am sumimpung ramon. Okou minatong ragiti mibayag kou galama'. Ikango' guang muno. Rondom raiti' mamimio kou; magulayun kou maayag.

⁴Kalo sangulun pana lumaat rirun. Ngaangai' mongoonsoi pamakuan rirun, koson pamakuan nilo ra ulipon ru Raja' Nibukadnijar.”

⁵Indagu boo i Judit ri Golopirnis, “Iowo' aku mindagu rirun, am kasaga' no rumongog ra ragu kutu. Mapasuku' aku rirun ra ondo' motopot no.

⁶Amon ru maya' kou ra pinson kuno, i Aki Kapuuno' pana mambaal ra rondo' ondo' makaimuag rirun am inatangan muno kalo masulang.

⁷Magibot aku sabap ra Raja' Nibukadnijar ondo' naayag am mapanggol, raja' ru titikop ru tana' ti ondo' nanusub rirun koson manalingapu ra ngaangai' ondo' naayag. Sabap ra binaal moonsoi muno, sala' ka ulun ayuk masauk ra ulipon nano, kaa' bibiag masigo, bibiagon am susuit pana maayag tayar ru Raja' Nibukadnijar am sasambaloi nano.

⁸Nokorongog akai noyo ra mapintar am mapandai kou toojo. Titikop ru tana' ti nakapandai ra okou panglima ondo' makanailian kaga' ra ngaangai' ru pamarintaan, matasik am urumaton sabap ra imumui muno ra pangayawan no.

⁹I Akior ondo' binayag ru ulun Bitulia nambala' ramon atan ondo' rinagu no ralalom pantutuuman maayo ru pambilin pangayawan muno.

¹⁰Amon ru kalo lioon mu atan ondo' rinagu ri Akior, kaa' lioo' noyo, sabap ra ngaangai' no motopot. Kolondo' sangulun pana makapangukum kapoam makapangala ra bansa' mai ondo' ayuk am amon ru makatula akai ri Aki Kapuuno' mai.

¹¹Kaa' kalo bulunsaron kou saboi lumugut kapoam kalo makasugut. Maaru' matoi bansa' maino, sabap ra nalandak ilo noyo ralalom ru tula. Pogonong ilo makatula, mapasingkual ilo ra sangit ri Aki Kapuuno'.

¹²Sabap ra nakai' ula' ra akanon nilo am natutusan kaga' ilo ra timug, namatas ilo noyo ra manimbalui ra biniag am mangakan ra akanon ondo' iningaan ru Ukum ri Aki Kapuuno'.

¹³Masaga' ilo mangakan ra gandum intor ra kumos kasaa' am sampiopor intor ra wain am umau ondo' pinaluntuk ra imam-imam ondo' mangandoi ra baloi sambayangan giu' ra Jirusalim. Sotopot no, ondo' ayuk am imam-imam, kolondo' sangulun pana makaakan ra akanon ondo' paluntukon no, mangambong raginio pana kalo.

¹⁴Kaa' ulun giu' ra Jirusalim niayuk minanggal noyo ra susuban ri Aki Kapuuno'. Mamagun ru bandar maino pana nangator noyo ra ulun sinusub ra Makama Ugama ra giu' koson makitaak ra pangiawan mambaal ondo' nogondo'.

¹⁵Kulimanin mopongo ilo makaalap ra pangiawan am mangakan ilo ra akanon ondo' sotopot no iningaan no, paat orou raginio niayuk pataakon ilo rirun am maalap mu ilo kapuso.

¹⁶Ginio sabap ra aku nagiru' intor ra bansa' kuno. Nanusub i Aki Kapuuno' raki' mongoi ragiti ra sumimpung rirun mambaal ra rondo'-rondo' ondo' mambaal ra ngaangai' ulun ondo' mokorongog no mangimuag.

¹⁷Pakatutun kou noyo, aku ti ulun ondo' gumagaya' ri Aki Kapuuno'. Orou rondom sumamba aku ri Aki Kapuuno' Ondo' Masawat Kaga'. Makaguang aku mayan ragiti. Moonong rondom mongoi aku ra limayak koson makiasi' ri Aki Kapuuno'. Mambala' Io raki' paat ra ulun ru Israil makatula noyo.

¹⁸Mapandayan ku ra mataki', matong aku mambala' raginio rirun. Okou pana makaingkual am ngaangai' saujor muno am kalo makimampatoi ulun ru Israil rirun.

¹⁹Maningganai aku rirun mansail ra Judia saboi giu' ra Jirusalim. Giu' ra tatanga' ru bandar no paayanon ku rondo' kurisi' turungan muno. Matingganai mu mamagun ru Jirusalim koson ra santimungan ru domba ondo' kolondo' magagalung. Kolondo' sanginan uku' pana ondo' baani magusig rirun. Nambala' noyo i Aki Kapuuno' ra ngaangai' no raki' ra kalo poyo masauk, am nanusub Io raki' koson mapasaboi rirun.”

²⁰Naansukan i Golopirnis am ulun-ulun mangingindangan nano nokorongog ra ragu ri Judit am nangimuag ilo ra kapintaran nano.

²¹“Maaru' io ruandu' mantalur kaga' am mapintar toojo ra titikop ru tana' ti,” kon nilo nansusunur.

²²I Golopirnis pana mindagu riso, “Moonsoi toojo ra nanusub i Aki Kapuuno' rirun mongoi ragiti maa' raginio makakamanangan akai am makapuso ra ulun ondo' nagasab noyo ra Raja' Nibukadnijar.

²³Okou sala' ka mantalur ayuk, kaa' mapandai mindagu. Amon ru suguton mu bantu' muno, i Aki Kapuuno' muno masauk ri Aki Kapuuno' kuno. Makaalap kou ra intok maatang ra istana ru Raja' Nibukadnijar am masauk ra mauligan kaga' ra titikop ru tana' ti.”