Read Timugon Murut JUDIT 12 Bible Online

JUDIT 12 - Timugon Murut bible

JUDIT 12

¹Nanusub i Golopirnis ra ulipon-ulipon nano nagibit ri Judit mongoi ra mija' pagakanan ondo' rinontop ra kuliamos pirok am nansulung ra akanon am wain ondo' paluntukon ri Golopirnis riso.

²Kaa' marara' i Judit, kono, “Mangakan aku ayuk ra akanon ondo' inibit kutu. Amon ru mangakan aku ra akanon raginio, mausung aku.”

³“Kaa' ati kulaan amon ru linutu' muno makai'?” kuot ri Golopirnis. “Ati paguyuman mai ra akanon muno? Nangkiman ragiti kolondo' ulun ru Israil.”

⁴Taam i Judit, “Magibot aku sabap ra painawo muno, ra kalo makai' linutu' kuno ra akanon ti ra kalo poyo mamakai i Aki Kapuuno' raki' koson mapaugar ra inatangan Nano.”

⁵Ulun-ulun mangingindangan ri Golopirnis pana nangator ri Judit ra rondo' kim. Nombolong io ra giu' no, am paat ra lakat poyo molondom kiminarat io.

⁶Napasaboi io ra bilin ri Golopirnis maa' raginio paugaron io mongoi ra limayak koson makiasi'.

⁷Nanusub i Golopirnis ra magagalung nano galama' mampaugar ri Judit. Talu ngoorou buoi ri Judit minayan ra nangkiman no am moonong rondom mongoi ra limayak maar ra intok pantamungan ra Bitulia koson mariu' giu' ra taur ru timug.

⁸Makapariu', makiasi' io ra Tuhan i Aki Kapuuno' maa' raginio tuluin ralalom inatangan nano sabap ra kasugutan ru ulun Nano.

⁹Makapambaal ra upacara pamasawan, sumaguli' i Judit ra nangkiman am mayan ra kim nano saboi mopongo pagakanan ra rondom.

¹⁰Paat ra orou ondo' kaapat nambaal i Golopirnis ra bunsag tayar ru ulipon-ulipon nano ayuk. Saujor-saujor ondo' tatanga' mangandoi kalo piniau.

¹¹Ragu ri Golopirnis ri Bagoas, pagawai ondo' nanalingapu ra ngaangai' ondo' pakuan galama' nano, “Ongoyo' noyo kimaiti' ruandu' Ibrani ondo' inalungan muno maa' raginio matong ra kim kutu koson mangakan am manginum mabaya' ramon.

¹²Makauyuyu' kaga' koson kabuoyon kasimbatan makimangkubayau ra ruandu' koson raginio. Amon ru kalo makapangambi' aku riso, maaru' kuritin aku.”

¹³I Bagoas pana nangiruan boo ri Golopirnis am ratong ri Judit. “Ruandu' mantalur,” kono, “kasaga' no matong mataki' ra kim ru panglima masawat koson manginum am magagayam koson ra ruandu'-ruandu' ru Asyur ondo' mayan ra istana Raja' Nibukadnijar. Gitio rondo' pangurumatan maayo.”

¹⁴Taam i Judit, “Kalo maaya' aku mangimpai ra kimait muno. Maringkaagou aku mambaal ra atan ondo' kasagain nano. Baal raginio masauk ra kaansukan kuno buoi ra aku maayag.”

¹⁵I Judit pana mingkakat boo am pambayang ra bayang nano ra moonsoi kaga'. Mangngandoi ruandu' nano nagulu ugar am paapino' permaidani intor ra bulu anak domba ondo' noowot ri Judit intor ri Bagoas koson panturungan paat ra mangakan ra saang ri Golopirnis.

¹⁶Siminubol i Judit ra ralalom ru kim am panturung ra ralimbou ru permaidani. Paat nakakito ra ruandu' no, nabunduk guang ri Golopirnis am kalo mokoorot guang nano koson makimarulug riso. Sotopot no intor ra orou kasaa' io nakakito ra ruandu' no, maguyum io ra kaluagan koson mangambi' riso.

¹⁷“Ibok manginum am magagayam mabaya' ramon,” kono ri Judit.

¹⁸“Ra guang maringkuanang, tuan,” taam ri Judit. “Gitio noyo orou ondo' kaansukan kaga' ru bayag kutu.”

¹⁹Kaa' nangakan am nanginum ayuk i Judit ra atan ondo' pinasulung ru mangngandoi nano.

²⁰Maansayan kaga' i Golopirnis magilong ri Judit saboi masuang kaga' inum no ra wain. Buoi ru bayag nano kalo igondo' nakakai' ra wain koson ra kinasuang raginio ra songorou.