Read Timugon Murut JUDIT 13 Bible Online

JUDIT 13 - Timugon Murut bible

JUDIT 13

¹Paat mampayung rondom noyo, naringkaagou ulipon-ulipon no nangiruan ra intok no. Angabi' boo ri Bagoas kim intor ra liwar maa' raginio ulipon-ulipon ri Golopirnis kalo makasubol. Sabap ra ngaangai' nilo najanjayan inum am naagui, am minongoi pombolong.

²Tinatang i Judit sangulun ralalom kim nabaya' ri Golopirnis ondo' nakaluya' nagauk ra pambalangan nano.

³Nanusub i Judit ra mangngandoi ruandu' nano migor ra liwar ru lamin pambalangan am maginaa ra giu' no saboi io mingkual koson ra buoi ti. Baal no koson raginio sabap minindagu io noyo riso am niayuk ri Bagoas ra mugar io mongoi pakiasi' koson kaindalaman.

⁴Paat raginio ngaangai' nakaugar noyo; soroi i Judit am i Golopirnis ayuk ralalom ru lamin pambalangan. Minigor i Judit ra sapapa' ru nambalangan ri Golopirnis am nakiasi' ralalom ru guang, “Iou Tuhan, i Aki Kapuuno' Ondo' Maayo Kaga' Kuasa', indangano' aku mambaal ragitio sabap ra katulayan ru Jirusalim.

⁵Ragino nasaboi noyo paat mamayag ra bansa' pinili' Muno. Indangano' aku mapaugar ra inatangan ti koson mamuso ra pantula' ondo' mompololob ramon.”

⁶Inggaari' boo ri Judit ulu ri Golopirnis am alapo' ilang ri Golopirnis.

⁷Mininggaar io poyo toojo, am guuto' no abuk ri Golopirnis am indagu, “Iou Tuhan i Aki Kapuuno' ru Israil, anii' aku ra kaikangan raino niayuk.”

⁸Pinsani' no toojo namiris ra liog ri Golopirnis saboi induo, am raginio inggului' no ulu ri Golopirnis.

⁹Linuir no inan ri Golopirnis intor ra nambalangan, am alapo' no boo tailon intor ra lugu'-lugu' no. Kopongo raginio ingkual io am pataako' ulu ri Golopirnis no ra mangngandoi ruandu' nano,

¹⁰ondo' napasubol raginio ra ralalom ru kantungan ru akanon. Kopongo raginio karuruo ngaulun ruandu' no nabaya' minintor koson ra kaindalaman paat ilo masaga' makiasi'. Pakaugar nansail ra nangkiman ru Asyur, liminaup ilo ra limayak am nagaloi ra pipilon ru gunung saboi ra kulobon garabang ru Bitulia.

¹¹Paat lakat poyo maalur-alur, nampiau i Judit ra mantatamung ra garabang no, “Ukabi' kulobon! Ukabi' kulobon! I Aki Kapuuno' mabaya' ritakau! Orou raiti' nanulu' Io ra Io lakat poyo mamakai ra kaikangan Nano ra Israil ti koson manggal ra pantula'-pantula' takano!”

¹²Paat ulun ra giu' no nokorongog ra bolos nano, nalingas ilo timinuun ra kulobon garabang am nampiau ra tingganai-tingganai ru bandar no.

¹³Ngaangai' ru ulun, matutuo am mamulok nasimbul minongoi ra kulobon garabang. Kolondo' sangulun pana nangkara' ra nakasaguli' noyo i Judit. Nangukab ilo ra kulobon garabang am nanguma' ri Judit am niayuk mangngandoi ruandu' nano. Ilo pana nampaang ra unur ru apui maa' raginio masinda, am minigor liminimpu ri Judit am ulipon nano.

¹⁴Golok i Judit, “Omporo' i Aki Kapuuno', omporo' Io! Omporo' i Aki Kapuuno' ondo' nagulayun makaasi' ra Israil ulun Nano. Rondom raiti' nampaluus io ra pantula' takau ondo' pinabala' galing raki'.”

¹⁵Io pana nangingkual ra ulu ri Golopirnis intor ra kantungan am pakitono' no ra ulun ra giu' no. Kono, “Gitio ulu ri Golopirnis, panglima masawat ru saujor Asyur, am gitio tailon intor ra nambalangan nano, intok io nakaluya' ra nagauk. Pinuso io ru Tuhan ondo' pinabala' galing ra sangulun ruandu'.

¹⁶Sabap ra Tuhan ondo' naayag, magibot aku ra kalo nakaguut i Golopirnis raki'. Sotopot no nasinggayawan io ra bulos kutu saboi nakatuum ra patayan nano. Kalo nalampit kapoam napakauyu' raki', sabap buoi raginio nagulayun Tuhan nanindung raki'.”

¹⁷Ngaangai' mamagun ru bandar nangimuag. Igugulatur ilo sumamba ri Aki Kapuuno' am nababaya' nakiasi', “Aki Kapuuno' mai, koompor noyo Okou. Orou raiti' kinala Mu ngaangai' pantula' ru bansa' mai.”

¹⁸Indagu boo i Ujia ri Judit, “Nambarakat noyo i Aki Kapuuno' Ondo' Masawat Kaga' no rirun nasailan ngaangai' ruandu' ra tana' ti. Koompor noyo Tuhan i Aki Kapuuno' ondo' nambaal ra limbowon am tana' ti! Nangila' Io rirun paat nanginggulu' ra ulu ru panglima ru pantula' takau.

¹⁹Pangintapatan muno ri Aki Kapuuno' magulayun karaan ru ngaangai' ulun ondo' mangkara' ra kuasa' Nano.

²⁰Gama' ru sabap ra binaal moonsoi muno manaak i Aki Kapuuno' rirun ra pangurumatan ra sabuoi-buoi no am malabaan kou ra barakat Nano, sabap ra magulayun kou gumagaya' Riso. Paat ra bansa' takau inasaban, kalo pagantangan kou miningkual am napataak ra painawo muno maa' raginio kalo maluus takau.” Ngaangai' ulun timinaam, “Amin, Amin!”