Read Timugon Murut JUDIT 14 Bible Online

JUDIT 14 - Timugon Murut bible

JUDIT 14

¹I Judit pana mindagu boo i risilo, “Pabukat kau, rongogo' noyo pinson kutu. Alapo' noyo ulu ti am piliko' ra rasawat ru timbok ru bandar.

²Pilio' min noyo sangulun intor ramuyun koson maningganai ra ngaangai' ungkuyon ondo' makaandar mampatoi. Iosusuab ti musiti' ilo mansaan ra kinandoi pangayou am tingganayon ru ulun raginio mansusunu' mingkual ra bandar, ilain ayuk koson mongoi ra limayak koson mamulunsar ra pulalai mantamung ra saang ru Asyur. Kaa' pai' topot-topot tumuun.

³Mantatamung ru Asyur mangalap ra kinandoi pangayou am magisimbul mongoi ra nangkiman koson mangkarat ra saujor-saujor. Saujor-saujor masimbul mongoi ra kim ri Golopirnis kaa' kalo matuum nilo io. Ngaangai' saujor nilo posongonsol am lumugut liliwa' akau jumalai mamulunsar risilo.

⁴Akau am ulun ru Israil ra bokon no makapangilou am mamatoi risilo paat ra ilo lumugut.

⁵Kaa' kalo poyo raginio, susubo' noyo i Akior ulun ru Amon no mongoi ragiti. Moogot aku makapandai ru nakaulig io kia ri Golopirnis, ulun ondo' nagasab noyo ra ulun ru Israil am nangator noyo ri Akior minongoi ritakau maa' raginio mapuso io mabaya' ritakau.”

⁶Ilo pana nampiau ri Akior intor ra baloi ri Ujia. Paat ra io matong am nakakito ra ulu ri Golopirnis tinanggal ru sangulun intor risilo, nalausan io.

⁷Indangano' nilo nanaguli' riso, am igulatur io boo ra kalayam ri Judit. “Gama' ru urumaton kou ru moonong pabukat ra tana' ru Judia,” kono, “am gama' ru moonong bansa' monontol ra malaa' paat mokorongog ra inggalan muno.

⁸Tunungo' noyo atan ondo' binaal muli.” Giu' ra saang ru ulun masuang ondo' liminimpu, nambala' i Judit ri Akior ra ngaangai' ondo' binaal nali, intor io nangiruan ra bandar saboi paat raginio.

⁹Kakai' minindagu, inuma' i Judit ra anggak ondo' mosongou saboi titikop bandar mamintanou ra golos naansukan.

¹⁰Pokorongog ra ngaangai' ondo' binaal ri Aki Kapuuno' ru Israil, nangintopot i Akior ra sotopot-topot ru guang. Sinunatan io am nasauk ra ulun ru Israil. Koson niayuk ra papag nano saboi ra orou raiti'.

¹¹Paat tumawang, nampilik ulun ru Israil ra ulu ri Golopirnis giu' ra timbok ru bandar. Bala ungkuyon ru Israil nansaan ra kinandoi pangayou, am pulalai ka pulalai boo miningkual mongoi ra pipilon ru gunung.

¹²Pakakito ra baal raginio, ulun ru Asyur nambala' ra pagawai-pagawai, am nambala' ilo poyo ra tingganai nilo.

¹³Tingganai nilo pana minongoi ra kim ri Golopirnis am indagu ri Bagoas, “Karato' panglima! Ulipon-ulipon no baani timinuun intor ra gunung koson mamulunsar ritakau. Masaga' ilo toojo pusoon.”

¹⁴I Bagoas pana siminubol am pagitapap ra tuma' ru tabir ru kim ri Golopirnis. Indos no lakat poyo i Golopirnis nombolong narumak ri Judit.

¹⁵Sabap ra kolondo' taam, sinukiap ri Bagoas tabir am subol ra lamin pambalangan. Nakito no inan ri Golopirnis pariluya' ra kolondo' ulu ra sulig.

¹⁶Nampalarut i Bagoas. Giminolok io, namparilak ra bayang nano am nampalakui nantangi'.

¹⁷Subol io ra kim ri Judit, kaa' kalio ruandu' no. Io pana miningkual boo am pompogolok ra mamagun,

¹⁸“Naruung takau! Sangulun ruandu' ru Israil napakauyu' ra titikop pamarintaan ru Raja' Nibukadnijar. Ilai' noyo, naaba' i Golopirnis ra giu' no am kolondo' boo ulu!”

¹⁹Pokorongog ra baal raginio, namparilak pagawai-pagawai no ra bayang nilo sabap ra nalumpus toojo. Ngaangai' ru nangkiman nokorongog ra golok am larut ondo' mosongou kaga'.