Read Timugon Murut JUDIT 15 Bible Online

JUDIT 15 - Timugon Murut bible

JUDIT 15

¹Paat ra ulun giu' ra nangkiman nokorongog ra kasaukan raginio, naubong ilo

²am nonontol ra malaa'. Songongonsol ilo nangiruan ra nangkiman am nagigiru' minaya' ra ralan giu' ra limayak am giu' ra kagunungan.

³Saujor-saujor ondo' nangkim giu' ra kagunungan ra liput ru Bitulia niayuk nagigiru'. Ngaangai' saujor ru Israil pana timinuun nanguup ra ulun ru Asyur.

⁴I Ujia pana nangator ra ulun sinusub giu' ra bandar Bitomastaim, Bibai, Gobai, Kola am ra titikop wilayah ru Israil koson nampatanou ra atan ondo' nasauk noyo ra ngaangai' ulun, am niayuk koson mangulisok risilo maa' raginio maya' mangilou am niayuk mangala ra pantula'.

⁵Pakaapu ra bilin no, ngaangai' ulun ru Israil namulunsar ra ulun ru Asyur, am ulun ru Asyur pana binulunsar saboi liminugut giu' ra Goba. Ondo' niayuk mamagun ru Jirusalim am ulun ra bokon ondo' minayan giu' ra kagunungan minaya' panguup kalupus nokorongog intor ra ulun-ulun sinusub ra atan ondo' nasauk giu' ra nangkiman ru Asyur. Mamagun ru libung Giliad am Galilia nampaala ra najanjayan ra ulun ru Asyur am narayus nangilou risilo saboi ra liliut ru Damsyik am wilayah no.

⁶Mamagun ru Bitulia ra bokon no timinuun namulunsar ra nangkiman ru Asyur am nakaalap ra masuang rapu',

⁷am saujor-saujor ru Israil ondo' siminaguli' intor ra pangayawan nangalap ra suwo no. Rapu' ru ulun ru Asyur masuang kaga', saboi mamagun ru kampung-kampung am ngaangai' kampung giu' ra libung kabuluran niayuk nakaalap ra tayar intor ra kuliamos ginaau no.

⁸Tingganai Maayo Imam i Joyakim am Pasimpungan ru Tingganai Lair ru Israil pana minatong intor ra Jirusalim koson magilong ra sauk maayo ondo' binaal ru Tuhan ra ulun Nano. Masaga' ilo niayuk tumuum ri Judit am mapasaboi ra paringkuanangan riso.

⁹Pakasaboi ilo ra giu' no, nongompor ilo ngaangai' ri Judit ra ragu, “Okou katulayan ru Jirusalim! Bansa' takau Israil naansukan toojo rirun.

¹⁰Misasangulun, nokoowot kou noyo ra kamanangan tayar ru Israil. Nangiou i Aki Kapuuno' Ondo' Maayo Kaga' Kuasa' ra binaal muno. Gama' ru mambarakat Io rirun saboi pupus ru bayag muno.” Ngaangai' ru mamagun timinaam, “Amin!”

¹¹Talu ngoopor ngoorou buoi ru ngaangai' mamagun nantakou ra nangkiman ru ulun ru Asyur. Kim ri Golopirnis, ngaangai' kuliamos pirok nano, mangkuk-mangkuk nano, dipan-dipan nano am ngaangai' parabot nano tinaakan ri Judit. Inapu no ngaangai' no am pinasuang ra rasawat ru baghal nano. Kurita'-kurita' kuda nano pana pinatampos no am pasuango' niayuk kuliamos-kuliamos raginio.

¹²Ngaangai' ruandu' ru Israil minatong limpu ri Judit. Rinimbayan nilo io ra pangamparan am liminigo-ligo koson mangurumat riso. Nangalap i Judit ra bulisang-bulisang am tinayar-tayar no ra ruandu'-ruandu' ondo' minaya' riso.

¹³Io am rangan-rangan nano ra nampakai ra sasampak ondo' binaal intor ra raun jaitun ra ulu. Minugar i Judit giu' ra saang ru ngaangai' mamagun, naningganai ra ruandu'-ruandu' ondo' tatanga' lumigo'. Siminunu' risilo ngaangai' ungkuyon ru Israil nanasasampak ondo' binaal intor ra raun ra ulu am nanakinandoi pangayou naukop liliwa' narimbai ra rimbai pangamparan.

¹⁴I Judit pana narimbai ra rimbai paringkuanangan giu' ra saang ru ngaangai' ulun ru Israil ondo' siminaang am ngaangai' mamagun minaya' narimbai ra rimbai raginio.