Read Timugon Murut JUDIT 5 Bible Online

JUDIT 5 - Timugon Murut bible

JUDIT 5

¹I Golopirnis, panglima masawat saujor ru Asyur, nokorongog ra ulun ru Israil nakatampos koson mangayou. Inampangan nilo noyo ralan-ralan giu' ra kagunungan, nangikang ra ampin giu' ra tampak ru gunung am napaawang ra ompong giu' ra tana' limayak malangka'.

²I Golopirnis pana siminangit toojo. Piniau no ngaangai' tingganai ru Moab, ngaangai' panglima ru Amon am ngaangai' gabenor ru libung giu' ra gagawar ru nagas Raat Tanga'.

³Indagu io risilo, “Akau minayan giu' ra Kanaan. Ginio sabap ra tunungi' min aku intor ra bansa' ru Israil ondo' minayan giu' ra kagunungan no. Bandar-bandar ra ati ondo' inayanan nilai ti? Kula' kia suang ru pulalai nilo am ralalom atan kia sonor ru kaikangan am kuasa' nilo? Osoi kia raja' ondo' naningganai ra saujor no?

⁴Intor ra ngaangai' bansa' giu' ra kalasaan, kua kia ilo ayuk ondo' kalo minatong koson timinuum raki'?”

⁵I Akior, tingganai ru bansa' ru Amon, timinaam boo koson ragitio, “Kasaga' kono rumongog ra tunung kutu intor ra ulun ondo' minayan ra kagunungan mamaar ra nangkiman muno. Kalo magabau aku rirun.

⁶Ilo ti papag ru ulun ru Babilonia,

⁷ondo' nanatang ra kaulayan ru kinamatuaan nilai am sumamba ri Aki Kapuuno' Ondo' Masawat Kaga' ondo' nauligan nilo. Ilo pana pinagiru' boo intor ra pagun nilono sabap ra kalo masaga' sumamba ra dewa-dewa ru kinamatuaan nilono. Ilo pana nagiru' ra Misopotamia am nabuoi minayan ra giu' no.

⁹Kopongo raginio i Aki Kapuuno' nilono nanusub risilo mangiruan ra Misopotamia am mongoi ra pagun Kanaan. Liminayun ilo ra giu' am nasauk ra langkaya' sabap nompolonggom ra masuang mas, pirok am bibiag tinambiag.

¹⁰Bulintok pagun ru Kanaan no nalumpa' ra bitilan, minongoi ilo ra Misir am minayan ra giu' no buoi ilo nakaalap ra akanon. Giu' no riminuang ilo nasauk ra bansa' ondo' maayo, saboi kinasuang nilono kalo mauntob.

¹¹Raja' ru Misir pana tumalimpuun masisang risilo. Nabaya' ra laat ru guang raja' no napabagui toojo risilo ra napajajal kaga' mambaal ra bata. Ilo tinipagon toojo am inulipon.

¹²Kaa' nakiasi' ilo ri Aki Kapuuno' nilo, am namparatong Io ra karaat-karaat saboi ulun ru Misir kalo mokoorot. Paat ra ilo pinagiru' ru ulun ru Misir intor ra pagun raginio,

¹³i Aki Kapuuno' ru ulun ru Israil no napalasak ra Raat Malia' ra saang nilo,

¹⁴am naningganai risilo ra gagawar ru ralan sumaboi ra Sinai am Kadis-Barnia. Kopongo raginio ulun ru Israil napagiru' ra ngaangai' namagun ru tana' kaagisan.

¹⁵Ilo galama' minayan ra pagun ru ulun ru Amori, napaluus ra mamagun ru Gisbon, liminaup ra Sungoi Jordan, am minayan ra titikop ru libung kagunungan.

¹⁶Pinagiru' nilo ulun ru Kanaan, Piris, Jibusi, mamagun ru Sikgim am ngaangai' ulun ru Girgasi. Nabuoi ulun ru Israil minayan giu' ra libung kagunungan raginio.

¹⁷Masisang i Aki Kapuuno' nilo ra kalaatan, am buoi nilo kalo makatula Riso, makakaansayan ilo.

¹⁸Kaa' bulintok ra ilo kalo giminagaya' Riso, nakatuum ilo ra kakalaan maayo ralalom masuang pangayawan am pupus no inaut koson ra ulun rinakop ra pagun ru bansa' ra bokon. Baloi sambayangan ri Aki Kapuuno' nilono pinopol toojo nogondo' rata' no ra tana' am bandar-bandar nilo inayanan ru pantula' nilono.

¹⁹Sabap ra siminaguli' ilo ri Aki Kapuuno' nilono, ragino ti nakasaguli' ilo noyo intor ra pagun intok ilo pinantutuliar. Tumilayun ilo poyo ra kagunungan ondo' ra buoi ti kolondo' minayan. Jirusalim nasauk noyo ra longgom nilo saguli' am giu' ra bandar no mokoondo' ra Baloi ri Aki Kapuuno' nilo.

²⁰Ginio ra tuan, amon ulun ra giu' no makatula ri Aki Kapuuno' nilo, am amon mokoondo' takau ra kaaruan ra nambaal ilo noyo ra rondo' kalungkangan, moonsoi jumalog takau am mangayou risilo.

²¹Kaa' amon lakat poyo gumagaya' ilo ra susuban ri Aki Kapuuno' nilo, moonsoi poyo kalo mambaal kou ra atan-atan risilo. Amon mamulunsar kou risilo niayuk, saungon ilo ri Aki Kapuuno' nilo, am mauyu' takau giu' ra saang ru titikop ru tana'.”

²²Kopongo i Akior minindagu, ngaangai' ulun ondo' minigor ra liput ru kim giminolok kalo nangiou. Tingganai-tingganai maatang ri Golopirnis am ulun ru Moab am niayuk mamagun ru libung ru nagas mangitaak toojo maa' raginio potoyon i Akior no.

²³Konilo, “Kalo pana malaa' takau ra ulun ru Israil! Malawo ilo am kalo lair nambaal ra ampin ondo' maikang.

²⁴Ibok jalai takano, Panglima Golopirnis! Saujor muno makapuso risilo ra maluoi!”