Read Timugon Murut JUDIT 6 Bible Online

JUDIT 6 - Timugon Murut bible

JUDIT 6

¹Bulintok golok ru ulun masuang ra libung ru pantimungan no nakalinos noyo, minindagu i Golopirnis ri Akior ra saang ru ngaangai' mamagun libung ru nagas am ulun ru Moab. Koson ragitio ragu nano,

²“Akior, okou am saujor ginajian muno intor ra Ipraim, osoi kia okou ti, saboi tumilu koson ra nabi? Mambilin kou ramon maa' raginio kalo mangayou ra ulun ru Israil, ondo' sabap no ayuk ra saungon ilo ri Aki Kapuuno' nilo! Kolondo' i Aki Kapuuno' ondo' ayuk am Raja' Nibukadnijar! Mangator Io ra saujor nano am mamuso ra ulun ru Israil intor ra tana' ti. Kalo makaindangan i Aki Kapuuno' nilono risilo.

³Kaa' itakau, ulipon ru Raja' Nibukadnijar, maluoi mangala risilo. Ngaangai' ru saujor nilo koson sangulun ayuk ritakau. Bai-bai nilo makapangampin ra pulalai nangkuda takau.

⁴Suruin takau ilo pababayaa'. Gunung-gunung sangiruayak raraa' nilono am limayak-limayak mososok ra baangkai nilono. Kalo makaanggal ilo ritakau am luuson koyoo'. Ginio noyo susuban ru Raja' Nibukadnijar nanguasa' ra titikop ru tana' ti, am ragu nano kalo malubat ayuk.

⁵Akior, okou sangulun ginajian ayuk intor ra Amon. Ra okou mindagu koon raginio magibit ayuk ra kapio muno galama'. Kalo boo makito mu aku saboi ra aku matong mangukum ra papag ru ulun nagiru' intor ra Misir no.

⁶Paat ra aku sumaguli', potoyon kou ru saujor-saujor kuno, am baangkai muno paribontoi ra ulun ondo' minatoi.

⁷Ragino ibiton kou ru ulipon-ulipon kuti ra kagunungan am tatangon ra rondo' intok ru bandar giu' ra pipilon ru gunung.

⁸Matoi kou mabaya' ra ulun ra giu' no.

⁹Ngaangai' ondo' raguon kutu masugut. Pangintopot no! Kalo pana magalabo kou, Akior! Sala' ka kia lumansan kou ra bandar no kalo maalap mai?”

¹⁰Kopongo raginio nanusub i Golopirnis ra ulipon-ulipon nano ondo' nangandoi ra kim nano koson mamparakop ri Akior, ibiton io giu' ra Bitulia am pataakon io ra ulun ru Israil.

¹¹I Akior pana rinakop am inibit intor ra nangkiman no mongoi ra limayak. Intor ra giu' no inibit io giu' ra kagunungan saboi ra taur ru timug ragana' ru bandar Bitulia.

¹²Pakakito risilo, mamagun ru bandar giu' ra tampak ru gunung no nansaan ra kinandoi mangayou am miningkual. Nosonong ulun ondo' nagibit ra kinandoi mangayou pampuong nomobol ra saujor ri Golopirnis ra batu, saboi kalo nakaaloi ilo ra rasawat.

¹³Siminili kalalaat ulun ru Asyur ra lonson toojo ru gunung. Tinatang nilo i Akior binangkil giu' ra lonson toojo ru gunung, am ongoi saguli' ri Golopirnis.

¹⁴Kopongo raginio timinuun ulun ru Israil intor ra Bitulia am bugali' i Akior am niayuk nagibit riso ra bandar. Inataran io ra saang ru ngaangai' tingganai ru bandar,

¹⁵ondo' paat ragili tiningganai ri Ujia anak ri Mika intor ra bansa' ru Simion, i Gabris anak ri Gotoniil am i Garmis anak ri Milkiil.

¹⁶Nanimung ilo ra ngaangai' tingganai ru ulun giu' ra bandar no. Bala ru ruandu' am buayoi niayuk timininong ra pantuuman raginio. I Akior pana inibit ra saang ru mamagun ondo' timinimung no, am nangkuot i Ujia riso intor ra atan ondo' nasauk.

¹⁷Tinunung ri Akior risilo atan ondo' rinagu noyo ralalom pantuuman maayo ru ulun maminson ri Golopirnis, atan ondo' rinagu nano galama' giu' ra saang ru saujor-saujor ru Asyur, am ati kulaan i Golopirnis minindagu ra timbalos alapon nano ra ulun ru Israil.

¹⁸Pokorongog raginio, kubu samba ulun ru Israil ri Aki Kapuuno' am pakiasi',

¹⁹“Iou Tuhan i Aki Kapuuno' Ondo' Masawat Kaga', ilai' noyo kinalimbau ru ngaangai' ulun no. Pakaasi' noyo ra bansa' Muno ondo' inasaban, am ilai' noyo ulun longgom Muno.”

²⁰Ilo pana napabansuk ri Akior am nongompor riso sabap ra binaal nano.

²¹Kopongo pantuuman no, inibit ri Ujia i Akior giu' ra baloi nano. Nampasulung boo ra akanon ra ngaangai' tingganai ru ulun no. Buoi ru rondom nakiasi' ilo makiindangan ri Aki Kapuuno' ru Israil.