Read Timugon Murut JUDIT 7 Bible Online

JUDIT 7 - Timugon Murut bible

JUDIT 7

¹Orou ra sumunu' no, pinatampos ri Golopirnis ngaangai' saujor nano am pulalai-pulalai ra pagamung nano. Saujor nano masuang kakaga', intor ra pulalai ru saujor mantana' suang no 120,000 ngaulun am pulalai mangkuda suang no 12,000 ngaulun, kalo poyo nauntob pulalai mangindangan am ulun ondo' manalingapu ra kaukapan ru pangayawan. Sinusub ilo mongoi ra Bitulia koson mampagaau ra ngaangai' ralan giu' ra gunung am mamulunsar ra ulun ru Israil. Ilo pana minongoi

³am nangkim mamaar ra taur ru timug giu' ra limayak kalo maalur intor ra Bitulia. Minayan ilo ra libung ondo' malangka' kakaga', ondo' liminangka' intor ra mamaar ra Dotaim saboi ra Bilbaim, am timinagawar intor ra Bitulia saboi ra Kuamon ondo' intok no nantaluma' ra Limayak Isdrilon.

⁴Pakakito ra masuang kaga' saujor no, nangalaa' kaga' ulun ru Israil am nansusunur ra ilo galama', “Saujor-saujor no koson monolon ra ngaangai' no. Giu' ra titikop ru kagunungan, limayak-limayak am bulur-bulur ti kalo maukop ra akanon ru saujor ra kinasuang raginio.”

⁵Ngaangai' ulun ru Israil pana nansaan ra kinandoi mangayou nilo, nampaang ra apui pamulanu giu' ra rasawat ru manara-manara nilo am mantamung buoi ru rondom.

⁶Orou ra sumunu' no, miningkual i Golopirnis am ngaangai' pulalai mangkuda maa' raginio makakito ulun ru Israil giu' ra Bitulia.

⁷Minongoi io pagilong ra ngaangai' ralan mongoi ra bandar no am ngaangai' taur ru timug ondo' mangani' ra mamagun ra timug. Io pana nampaayan ra kukula' pulalai ru saujor koson mantamung ra intok-intok raginio, am kalupus raginio siminaguli' io ra pulalai nano.

⁸Kopongo raginio ngaangai' tingganai ru bansa' ru Idom am Moab nabaya' ra panglima-panglima intor ra nagas ru Raat Tanga' minatong muma' ri Golopirnis am indagu,

⁹“Kasaga' noyo rumongog ra pinson maiti maa' raginio saujor muno kalo matiu' ra karaat.

¹⁰Ulun ru Israil kalo lumansan kaga' ra kinandoi mangayou nilono, kaa' kagunungan ondo' inayanan nilo masawat, sabap ra gunung-gunung no mapagon oloyon.

¹¹Ginio sabap ra pai' noyo rampus pamulunsar, maa' raginio kolondo' malungganang ra saujor-saujor muno.

¹²Musiti' kou sumoroi ayuk giu' ra kim, am polosoo' ngaangai' saujor mayan ra nangkiman nilo. Susubo' noyo ulipon-ulipon muno mantamung ra ngaangai' taur ru timug giu' ra lonson toojo ru kagunungan,

¹³sabap ra giu' no pansagawan ru mamagun Bitulia no ra timug. Kulimanin amon ilo no maar matoi pinaason, pataakon nilo bandar nilo rirun. Liliwa' raginio akai am ulun maino magaloi ra tampak-tampak ru gunung maar ragiti. Mangkim akai ra giu' am mantamung, maa' raginio kolondo' ulun ondo' mangiruan ra bandar.

¹⁴Ngaangai' ulun, ruandu' am lalaing-lalaing sowongon mangaitilan. Mulu' poyo ra kalo poyo bulunsaron, parilangan ilo noyo ra ralan-ralan.

¹⁵Koson raginio ralan makapangukum kou risilo sabap gumuor ilo am kalo masaga' makirakop rirun ra bobonsoi.”

¹⁶I Golopirnis am ngaangai' pagawai nano masaga' ra inatangan raginio, am panusub io maa' raginio baalon mataki'.

¹⁷Pulalai ru ulun ru Amon am 5,000 ngaulun ru Asyur napabanding ra kim nilono giu' ra limayak koson manalingaau ra taur timug ru mamagun ru bandar.

¹⁸Ulun ru Idom am ulun ru Amon nagaloi ra kagunungan am nangkim ra giu' no nantuma' ra bandar Dotaim. Kukula' ngaulun risilo inataran ra rabugus ru sirangon, tampilon ra Igribil maar ra Gusa ondo' intok raginio giu' ra kiing ru Sungoi Mokmur. Pulalai Asyur ra bokon nangkim giu' ra limayak. Intok raginio nososok nilo, sabap ra kim am kaukapan ru pangayou nilono masuang kakaga'.

¹⁹Ulun ru Israil pana nampiau ri Aki Kapuuno' nilo koson makiindangan. Mapalo noyo guang nilo sabap ra linibunan ru pantula' intor ra nosonong pisuk am kalo lair makapagiru'.

²⁰Ngaangai' saujor ru Asyur, pulalai saujor mantana', mangkurita' kuda mangayou am pulalai mangkuda, napalibun ra Bitulia buoi talu ngoopor am apat ngoorou saboi bandar no nakaayan ra timug. Ngaangai' balang ru timug

²¹am tulubong-tulubong lumasak galing, saboi timug inumon musiti' tukuon am kolondo' sangulun pana makainum saboi mopopok.

²²Kolondo' boo lulu' ru anak-anak; ruandu' am ulun mamulok sowongon saboi nangalausan ra ralan-ralan ru bandar am giu' ra kulobon garabang. Ngaangai' nilo kalo makalulu'.

²³Ngaangai' boo mamagun ru bandar, ungkuyon, ruandu' am anak-anak minuma' ri Ujia am tingganai-tingganai ru bandar. Golok ilo ra bolos matangil,

²⁴“Gama' ru mangakim i Aki Kapuuno' ramuyun sabap naparatong ra kapio maayo ramon am kalo masaga' makimobonsoi ra ulun ru Asyur.

²⁵Ragino kolondo' masaga' mangindangan ritakau! Pinataak noyo ri Aki Kapuuno' itakau ti ra ralalom ru kuasa' nilo. Kolondo' boo lulu' takau am matipatoi ra pinaason.

²⁶Piawo' noyo ulun ru Asyur ragino! Polosoon noyo ra itakau ti rokopon nilo. Polosoon noyo i Golopirnis am saujor nano mangalap ra bandar ti am mantakou.

²⁷Moonsoi poyo masauk takau ra ulun rinakop. Polosoon noyo saukon takau ra uliponon, gama' ayuk marayus takau maayag, am kalo pana makakito ra anak andu' takau matoi.

²⁸Limbowon am tana' masauk ra sasi' ramuyun, koson niayuk ri Aki Kapuuno' takau, Tuhan ru kinamatuaan takali ondo' mangukum ritakau sabap ra tula nilai am poyo tula takau galama'. Gama' ru kapio raginio kalo lumumpa' ritakau ra orou raiti'!”

²⁹Ngaangai' ulun ra giu' no pana tumalimpuun manulaboi am makiasi' ra Tuhan i Aki Kapuuno' ra bolos matangil.

³⁰I Ujia pana mindagu risilo, “Pai' kagagai guang, pabukat kau! Moonsoi inaanin takau limo ngoorou poyo koson magilong ru makaasi' ritakau Tuhan i Aki Kapuuno' takano, sabap ra kalo noyo mangiruan Io ritakau.

³¹Kaa' amon malupus limo ngoorou kolondo' indangan, baalon ku atan ondo' rinagu mino.”

³²I Ujia pana nanusub ra ngaangai' ulun no mugar. Ngaangai' ungkuyon siminaguli' ra intok pantamungan ru sigagama' giu' ra timbok ru bandar am manara, am ruandu'-ruandu' am lalaing-lalaing sinusub muli' ra baloi nilo. Ngaangai' mamagun ru bandar no mangiluk guang am mangalaut.