Read Timugon Murut JUDIT 8 Bible Online

JUDIT 8 - Timugon Murut bible

JUDIT 8

¹Ragu napatasan ri Ujia no rinongog niayuk ri Judit anak ri Mirari, papag ri Oks, Jusup, Ojiil, Ilkia, Ananias, Gidion, Rapain, Agitub, Iliya, Ilkia, Iliab, Natanail, Salamiil, Sarasadai, am Israil.

²I Manasi ralaki ri Judit, intor ra sasambaloi am bansa' ondo' nogondo' ra andu' nano. Minatoi i Manasi paat ra mangkukumos.

³Paat magalung ra mangngandoi-mangngandoi giu' ra umo, nalausan io natiu' ra lasu' ru mato ru orou, am minatoi ra intok nambalangan giu' ra baloi nano ra Bitulia. Linobong io ra kalabangan ru gino ngai' pabukat giu' ra umo lolot ru Dotaim am Balamon.

⁴Talu ngambilor am apat ngansila' noyo i Judit napuor.

⁵Nambaal io ra baloi boborok giu' ra rasawat ru taap ru baloi nano[3] am ayan ra giu' no. Nambayang io ra konoon karung pulanu ra mangulir am bayang ru napuor.

⁶Buoi ru ginio nampali io, ondo' ayuk am paat ra ulun kalo makapampali, iono paat ra orou Sabat am orou kalo poyo raginio, paat ra Pangiantakan ra Sila' Bagu am orou kalo poyo raginio, am paat ra ngaangai' pangiantakan am orou maayo ru bansa' ru Israil.

⁷I Judit ti ruandu' ondo' mantalur kaga'. Ralaki nanatang riso ra mas am pirok, mangngandoi am ulipon, bibiag tinambiag am umo, am nagulayun i Judit minayan ra giu' no.

⁸Kolondo' sangulun pana minindagu ondo' kalo moonsoi intor ri Judit, sabap giminagaya' io toojo ri Aki Kapuuno'.

⁹Norongog ri Judit atan koson ulun siminangit toojo ri Ujia, sabap ra nagagai noyo guang nilo sabap ra kalo naukop ra timug. Norongog no niayuk ra nambantu' ra ibot i Ujia ra mamagun ra pataakon no bandar ra ulun ru Asyur malupus limo ngoorou.

¹⁰Judit pana nanusub ra mangngandoi nano ondo' napalansanan ra ngaangai' rapu' nano maparatong ra tingganai-tingganai ru bandar, iono i Ujia,[4] Gabris am i Garmis maa' raginio matong ra baloi nano.

¹¹Bulintok ilo matong, indagu i Judit, “Akau tingganai ru bandar Bitulia, rongogo' noyo ragu kutu. Kalo matanda' minindagu koson raitii' ni ra mamagun ru bandar ti. Nagibot kau noyo sabap ri Aki Kapuuno' ra mampataak ra bandar ti ra pantula' takau amon ru kalo mangindangan Tuhan no ritakau ralalom limo ngoorou.

¹²Kalo matimpok itakau koson mangkinam ri Aki Kapuuno' koson ra binaal min ra orou raiti', am koson sumigulu masawat poyo intor ri Aki Kapuuno' ralalom manalingapu ra baal-baal ru ulun.

¹³Atan koson akau masaga' mangkinam ra Tuhan Ondo' Maayo Kaga' Kuasa'! Kalo poyo kia makaarati' kau niayuk?

¹⁴Kalo makatutun takau ralalom guang ru ulun kapoam makapandai ra pamaguangan ru ulun. Ati kulaan lair mangurio am makatutun ra pamaguangan ri Aki Kapuuno'! Natutunan takau lair kia i Aki Kapuuno' Namangun? Kalo. Gino poyo pai' boo papasingkual ra sangit ru Tuhan, i Aki Kapuuno' takau.

¹⁵Amon ru mamatas Io ra kalo mangindangan ritakau ralalom buoi limo ngoorou, lakat poyo makapamayag Io ritakau ra sasanggilan ayuk Io masaga'. Kapoam iou lair masaga' Io mopoloso ritakau pusoon ra saang ru pantula'.

¹⁶Kaa' pai' noyo baalo' gogoton tayar ru Tuhan i Aki Kapuuno' takau. Karaan min kia Io koson ritakau saboi maalap ra lolob kapoam majajalan?

¹⁷Kalo! Kaa' musiti' takau makiindangan ri Aki Kapuuno' am makapaginaa saboi Io mamayag ritakau. Amon ru matimpakan Io, momporongog Io ra kitaakon takau.

¹⁸Kolondo' sangulun pana intor ra bansa' kapoam pabukat takau, bansa' kapoam mamagun ru bandar takau ondo' sumamba ra sinungkalalaing binaal ru ulun koson ra ondo' binaal ru kinamatuaan takali.

¹⁹Ginio sabap ri Aki Kapuuno' nopoloso risilo makaili' ra kalaan maayo; pinatoi ilo am tinakawan ra ngaangai' no ru pantula'.

²⁰Kaa' sabap ra kalo sumamba takau ra atan-atan ondo' ayuk am Tuhan no, makakalansanan takau ra kalo mangimpai Io ritakau kapoam osoi pana intor ra bansa' takau.

²¹Amon ru gaawon bandar takati ru pantula', titikop libung ru Judia magaau am Baloi ri Aki Kapuuno' takau giu' ra Jirusalim talingaawon. Kaa' musiti' takau papalansanan ra kajamalan ru Baloi ri Aki Kapuuno' no ra painawo takau.

²²Pinalansanan noyo ritakau amon ru pabukat-pabukat takau potoyon, bansa' takau rokopon am tana' tungkuson takau pusoon. Tauyuon am asabin takau ru bansa' ondo' mangulipon ritakau.

²³Amon ru uliponon takau ru pantula', kalo urumaton nilo itakau; am poyo i Aki Kapuuno' takano mompoloso ritakau mauyu'.

²⁴Ginio sabap ra musiti' takau mapaintutun ra bayag ru pabukat-pabukat takau am nasip ru Baloi ri Aki Kapuuno' am niayuk altar lumansan ritakau.

²⁵Tatanga' Tuhan i Aki Kapuuno' takano mangkinam ritakau koson Io nangkinam ra kinamatuaan takali, am musiti' takau maringkuanang sabap raginio.

²⁶Karaa' ayuk ati kulaan Io nangkinam ri Abragam am i Isak, am atan boo sauk ri Jakub paat ra orou io nagalung ra domba ri Laban, kamaman nano giu' ra Misopotamia.

²⁷Nangkinam i Aki Kapuuno' risilo koson mangkinam ra gagaya' nilo. Koson raginio niayuk Io nangimbolo' ritakau ondo' mamaar Riso koson mampakara' ritakau, am sala' ka mansuli'.”

²⁸Indagu boo i Ujia ri Judit, “Ngaangai' ondo' rinagu muno moonsoi am kolondo' sangulun pana makaansang.

²⁹Gitio pai' ru kasaa' muno ayuk minindagu ra kapintaran muno. Intor ra boborok poyo nakapandai akai ra mokoondo' kou ra pangaratian ra motopot am pamaguangan ondo' moonsoi.

³⁰Kaa' ulun takau maar noyo matoi ra pinaason. Nampajajal ilo ritakau nabantu' koson raginio am nagibot ondo' kalo maalap mai kalungkang.

³¹Koson boo ragino, sabap ra okou ulun ondo' gumagaya' toojo ra Tuhan, kasaga' noyo makiasi' tayar ru bansa' takau. Maaru' Tuhan maparatu' ra rasam saboi lunggau-lunggau takau masuangan am kalo boo sowongon takau.”

³²“Rongogo' noyo,” kon ri Judit. “Mokoondo' baalon kuno ondo' tunungon ru bansa' takau ra matutungkus.

³³Rondom no akau talu ngaulun musiti' mantamung giu' ra kulobon garabang ru bandar maa' raginio aku am mangngandoi kuno makapangiruan ra bandar. Nabantu' kau noyo ra mapataak ra bandar ti malupus limo ngoorou. Kaa' kalo poyo makasail paat raginio, mamakai Tuhan no raki' koson mamayag ra bansa' ru Israil.

³⁴Pai' pangkuot ra atan ondo' baalon kuno. Amon ru mopongo ngaangai' no, tunungon ku.”

³⁵Indagu i Ujia am tingganai-tingganai ra bokon no riso, “Tumoojo ra mugar! Gama' ru Tuhan i Aki Kapuuno' takau mangindangan rirun mangukum ra pantula' takano.”

³⁶Ilo pana nangiruan ra babaloi giu' rasawat ru taap no am saguli' ra intok alungin ru sigagama'.