Read Timugon Murut ESTER 2 Bible Online

ESTER 2 - Timugon Murut bible

ESTER 2

¹Kopongo kukula' buoi, kabalu' pana raja' kalo boo siminangit, lakat poyo makara' ru raja' binaal ru Andu' raja' Wasti am ondo' binaal nano riso.

²Sabap raginio kukula' ngaulun maminson ondo' mamaar ra raja' minindagu, “Kua kia kalo maguyum kou ra ralaa ondo' mantalur koson rirun?

³Musiti' kou mampalantik ra pagawai giu' ra ngaangai' wilayah ru pamarintaan, am susubo' ilo magibit ra ngaangai' ralaa mangantalur ra istana ruandu' giu' ra Susan, pusor bandar ti. Pataako' ilo ra alungin ri Igai, sida-sida ondo' nasauk ra tingganai ru sasambaloi ru istana ruandu'. Io magalung risilo am mangani' ra pamabasan ru kinapasau risilo.

⁴Mopongo raginio, musiti' kou mampili' sangulun ralaa ondo' kalaayan mu toojo, lantiko' io koson ra andu' raja' mamalit ra Andu' raja' Wasti.” Nangiou raja' ra pinson raginio, am binaal no.

⁵Giu' ra pusor bandar Susan, mokoondo' sangulun ru Jaudi ininggalanan ri Mordikai anak ri Jair. Io papag ri Kis am Simii intor ra bansa' ru Binjamin.

⁶Rinakop i Mordikai paat ra Jirusalim kinala ru Nibukadnijar, raja' ru Babilonia, Inibit i Mordikai ra Babilonia nababaya' ri Joyakin iono raja' ru Jiuda, am masuang poyo ulun rinakop ra bokon.

⁷I Mordikai mokoondo' ra pantukir ininggalanan ri Ester. Inggalan ru Ibrani nano i Gadasa. I Ester sangulun ralaa ondo' bulos nano mantalur am makainan ra moonsoi. Matuo ri Ester minatoi noyo, am io nasauk ra pinangkaanak ri Mordikai. Tinalaanak io koson ra anak ri Mordikai galama'.

⁸Kopongo susuban ru raja' no pinatanou, masuang ralaa inibit ra Susan, am i Ester soroi risilo ngai'. Inibit io ra istana, inalungan ri Igai, tingganai ru sasambaloi ru istana ruandu'.

⁹Maansayan kaga' i Igai magilong ri Ester am masaga' riso. Kinataki' ri Igai nangani' ri Ester ra pamabasan ru kinapasau am niayuk akanon ra linuntuk. Nangani' io ri Ester ra lamin ondo' moonsoi kaga' giu' ra ralalom ru istana ruandu' no. Nanusub niayuk i Igai ra tulu' ngaulun ralaa ondo' pinili' timpoko' intor ra istana raja' koson magayam ri Ester.

¹⁰Buoi ru ginio inopot ri Ester ra io sangulun ru Jaudi, sabap ra sinugut no pinson ri Mordikai.

¹¹Moonong orou mugar-ugar ri Mordikai giu' ra liliut tampilon ra saang ru istana ruandu' no koson makapandai ra ati kulaan baal ri Ester, am atan ondo' masauk riso.

¹²Buoi ru pamabasan ra kinapasau kaindalaman no sambilor: onom ngansila' ra umau mur, am onom ngansila' poyo ra umau mangaamis owou ra bokon. Kopongo raginio, moonong ralaa no mampapalit paumaan ra Raja' Agaswiros.

¹³Paat ra sangulun ralaa mingkual intor ra istana ruandu' koson paumaan ra raja', iowon io mambayang ra atan ayuk ondo' kasagaan nano.

¹⁴Ralaa no ibiton ra istana raja' paat ra mamai' ti, am suabon no ibiton io ra istana ra bokon alungin ri Saasgas, sida-sida ondo' magalung ra ruandu' parulug ru raja'. Ralaa raginio kalo boo paumaan ra raja' ondo' ak am raja' masaga' riso am mampiau riso ra manabit ra inggalan nano.

¹⁵Nasaboi boo paat ri Ester koson muma' ra raja'. I Ester iono anak ri Abiail, am pantukir ri Mordikai, ondo' nagalung riso koson ra anak nano galama'. Kaansayin i Ester ru moonong ulun ondo' nakakito riso. Pakasaboi paat nano, nambayang i Ester minaya' ra nanuluan am pinson ri Igai, sida-sida ondo' nasauk ra tingganai ru istana ruandu' no.

¹⁶Koon raginio noyo paat ra bilor katulu' ra pamarintaan ru Raja' Agaswiros, ginio ra sila' koopor, iono sila' Tibit, inibit i Ester paumaan ra Raja' Agaswiros giu' ra istana.

¹⁷Napabansuk i Ester ra guang am napakaansuk ra raja' nasailan intor ra ngaangai' ralaa ra bokon. Ginio ra io noyo ondo' kalaayan toojo ru raja'. Pinakaraun ru raja' karaun ru pamarintaan ra ulu ri Ester am nampasauk riso ra andu' raja' koson namalit ri Wasti.

¹⁸Kopongo raginio, nambaal raja' ra bunsag maayo koson mangurumat ri Ester am nampiau ra ngaangai' tingganai am pagawai nano. Pinatanou ru raja' orou tumangus[4] ra titikop ru pamarintaan am nantatayar ra masuang kaga' tangguang.

¹⁹Liliwa' raginio i Mordikai linantik ru raja' nasauk ra sangulun pagawai ru pagun.

²⁰Saboi ra paat raginio i Ester lakat poyo kalo nambala' ra osoi pana ra io ulun ru Jaudi. Nanginggalar i Mordikai riso mambala' ra osoi pana intor ru bansa' nano. Giminagaya' io ri Mordikai koson paat ra io lakat poyo lalaing am inalungan ri Mordikai.

²¹Paat ra sangarawan, paat ra i Mordikai nangandoi giu' ra istana, i Bigtan am i Tiris, iono ruo ngaulun sida-sida ondo' magalung ra kulobon mongoi ra lamin-lamin ru raja', maruol guang ra raja'. Ginio ra nangatang ilo koson mamatoi ra raja'.

²²Nakapandai i Mordikai ra inatang nilono am pambala' ra Andu' raja' i Ester. Nagindibok Andu' raja' Ester nambala' ra raja' intor ra atan ondo' napandayan ri Mordikai.

²³Paat ra baal raginio inimumuyan, napandayan toojo ra pambalaan raginio motopot; karuruo ngaulun no inukuman ra tairon. Kopongo raginio nanusub raja' maa' raginio baal raginio tulisin ra ralalom ru buuk panulisan rasmi ru pamarintaan.