Read Timugon Murut ESTER 4 Bible Online

ESTER 4 - Timugon Murut bible

ESTER 4

¹Pokorongog i Mordikai ra ngaangai' ondo' nasauk noyo, rinilak no bayang nano koson ra tatandu' mangiluk. Nambayang io ra konoon karung, tinaukan ulu nano ra kaau, am minugar-ugar giu' ra bandar liliwa' nantangi' ra matangil am malumpus.

²Pupus no nakasaboi io giu' ra kulobon garabang ru istana, kaa' kalo siminubol io, sabap ra ulun ondo' nambayang ra karung kalo iowon sumubol.

³Giu' ra moonong wilayah, ra ati ayuk ragu ru raja' no binasa', ulun ru Jaudi manulaboi am malumpus. Nampali ilo, nantangi' am nampalaa; am masuang ra gino ngai' ilo ondo' nambayang ra karung am liminangan ra rasawat ru kaau.

⁴Paat ra ruandu'-ruandu' mangngandoi am sida-sida ondo' mangandoi ri Ester nambala' riso ra atan ondo' binaal ri Mordikai, magalabo kaga' i Ester. Nangator io ri Mordikai ra bayang maa' raginio kalo mambayang io ra karung, kaa' marara' i Mordikai mangapu raginio.

⁵Kopongo raginio nampiau i Ester ri Atak, sangulun ra sida-sida giu' ra istana ondo' pinangandoi ru raja' koson mangandoi ri Ester. Nanusub i Ester ri Atak mangkuot ri Mordikai ra atan ondo' tatanga' masauk am kua pambaal io raginio.

⁶Minongoi i Atak ri Mordikai giu' ra padang ru bandar, giu' ra saang ru kulobon garabang ru istana.

⁷Nambala' i Mordikai riso ra ngaangai' ondo' nailian nano, am kula' suang ru ruit pirok ondo' binantu' ri Gaman koson pasubolon ra ralalom ru intok pambulian ra rapu' ru raja', mopongo ngaangai' ulun ru Jaudi potoyon.

⁸Nangani' io ri Atak ra ralin ru surat ru raja' ondo' pinatanou noyo giu' ra Susan, ondo' mokoondo' ra susuban koson mamuso ra ngaangai' ulun ru Jaudi. Nanusub i Mordikai ri Atak nagibit ra surat no ri Ester am nambala' ra sinail baal raginio riso. Nangitaak niayuk i Mordikai maa' raginio muma' i Ester ra raja' am makimasi' ra tayar ru bansa' nano.

⁹Kopongo raginio minongoi i Atak ri Ester am nampasaboi ra bilin ri Mordikai riso.

¹⁰Kaa' nanusub i Ester ri Atak sumaguli' ri Mordikai ra bilin ragitio,

¹¹“Osoi ayuk, ungkuyon kapoam ruandu', ukumin ra potoyon, amon ru mumpos io muma' ra raja' giu' ra istana, giu' ra liliut tampilon ra ralalom, ra kalo piawon ru raja' galama'. Ginio noyo undang-undang, am ngaangai' ulun, ondo' ulun maminson ra raja' am poyo mamagun, makapandai ra baal raginio. Mokoondo' rondo' ralan ayuk koson lumabus intor ra undang-undang raginio, iono paat ra raja' mampatutui ra jujuga' mas nano ra ulun ondo' matong uma'. Kaa' sansila' noyo raja' kalo nampiau raki'.”

¹²Kopongo i Mordikai nakaapu ra bilin ri Ester no,

¹³nangator io ra pampakaraan ragitio ri Ester, “Pai' pangkara' ra maa' kou maayag poyo intor ra ulun ru Jaudi ra bokon sabap ayuk ra minayan kou giu' ra istana.

¹⁴Amon ru mongkoror kou ayuk ra koon ragitio baal ti, maaru' ulun ru Jaudi makaapu ra indangan intor ra suruga' am bayagon ilo, kaa' okou galama' matoi am sasambaloi ru ama' muno maluus. Osoi makapandai, maaru' lair koson ra bulintok ragitio noyo okou pinili' masauk ra andu' ru raja'!”

¹⁵Kopongo raginio nangator i Ester ra bilin ragitio ri Mordikai,

¹⁶“Susubo' ngaangai' ulun ru Jaudi giti ra Susan ti tumimung. Susubo' ilo mampali am makiasi' ilo ra tayar raki'. Pai' pangakan kapoam panginum ra atan-atan pana buoi talu ngoorou am talu ngorondom. Aku galama' am ralaa-ralaa magayam kuno pana mambaal raginio. Mopongo raginio muma' aku ra raja', kabalu' pana binaal raginio manggal ra undang-undang. Amon ru musiti' aku matoi sabap ra baal raginio, polosoon aku no matoi!”

¹⁷Kopongo raginio minugar i Mordikai intor ra giu' no am nambaal ra ngaangai' ondo' binilin ri Ester.