Read Timugon Murut ESTER 9 Bible Online

ESTER 9 - Timugon Murut bible

ESTER 9

¹Kasaboi boo orou ra koopor am talu ru sila' Adar, iono orou ondo' inaru' koson papaugaran ra ragu ru raja' no. Ginio noyo orou ondo' inaanin ru pantula' ru ulun ru Jaudi koson manguasa' ra bansa' raginio. Kaa' sala' boo, ulun ru Jaudi no boo ondo' nangala risilo.

²Giu' ra intok ru ulun ru Jaudi ra moonong bandar,[9] timinimung ilo am namulunsar ra osoi ayuk ondo' kuminam mampajamar risilo. Bansa'-bansa' ra ati ayuk malaa' risilo saboi kolondo' sangulun pana baani mampagabu' risilo.

³Ngaangai' tingganai ru wilayah pana — gabenor, ulun ru kaupisan am uakil ru raja' — nanungka' ra ulun ru Jaudi sabap ra malaa' ilo ri Mordikai.

⁴Giu' ra titikop ru pamarintaan no, nakapandai ulun ra i Mordikai sangulun ondo' makakuasa' ra istana, am ra kuasa' nano giminaai kaga'.

⁵Ginio ra ulun ru Jaudi makapambaal ra atan ayuk ra pantula' nilo. Namulunsar ulun ru Jaudi ra ilang am niayuk namatoi risilo.

⁶Giu' ra Susan ayuk, giu' ra pusor bandar no, namatoi ulun ru Jaudi suang 500 ngaulun.

⁷Gino ngai' ru ulun ondo' pinatoi iono mopor ngaulun anak ungkuyon ri Gaman anak ri Gamidata, pantula' ru ulun ru Jaudi no. Ilo no am i Parsandata, Dalpon, Aspata, Porata, Adalia, Aridata, Parmasta, Arisai, Aridai am i Waijata. Kabalu' pana koon raginio, ulun ru Jaudi kalo nampagaau ra rapu' ru ulun.

¹¹Paat ra orou raginio niayuk, suang ru ulun ondo' pinatoi giu' ra Susan pinabala' ra raja'.

¹²Nambala' raja' ra Andu' raja' Ester, “Giu' ra Susan ayuk 500 ngaulun noyo pinatoi ru ulun ru Jaudi, nakaaya' mopor ngaulun anak ungkuyon ri Gaman. Mapara' boo poros poyo ru pampatayan ondo' maaru' lair masauk giu' ra wilayah-wilayah! Raino atan poyo gogoton muno? Raguo' noyo, aniin tokou.”

¹³Indagu i Ester, “Amon mangiou kou raja', iowo' ulun ru Jaudi giti ra Susan mambaal poyo ra susuab no atan ondo' binaal nilo orou raiti'. Baangkai ru anak-anak ungkuyon ri Gaman no musiti' tairon ra lugu' pampatairan.”

¹⁴Nangani' raja' ra susuban koson manugut ra kitaakon ri Ester. Surat susuban no iningkual giu' ra Susan am baangkai ru ngaangai' anak ungkuyon ri Gaman tinair.

¹⁵Paat ra orou koopor am apat ru sila' Adar, ulun ru Jaudi giu' ra Susan timinimung saguli' am namatoi ra suang 300 ngaulun poyo giu' ra bandar no. Ragino ti niayuk kalo nampagaau ilo ra rapu' ru ulun.

¹⁶Ulun-ulun ru Jaudi giu' ra wilayah-wilayah niayuk timinimung am nagisaung ra inan. Kinala nilo pantula' am namatoi ra suang 75,000 ngaulun ondo' masisang risilo, kaa' kalo ginaau nilo rapu' ru ulun.

¹⁷Kasaukan raginio nasauk paat ra orou koopor am talu ra sila' Adar. Suabon no, paat ra orou koopor am apat, kolondo' boo pamatayan. Nangiantak ilo ra orou raginio ra minunsag.

¹⁸Kaa' ulun ru Jaudi giu' ra Susan nangiantak ra pangiantakan paat ra orou koopor am limo, sabap ra paat ra orou koopor am talu am koopor am apat ilo namatoi ra pantula', am paat ra koopor am limo bagu no liminonggo' ilo namatoi ra pantula'.

¹⁹Ginio sabap ra ulun ru Jaudi ondo' minayan giu' ra bandar mongoborok mangiantak ra orou koopor am apat ra sila' Adar ra munsag. Paat orou raginio mantataak ilo ra akanon ra rondo' am bokon.

²⁰Kopongo raginio tinulisan ri Mordikai kasaukan raginio. Nangator io ra surat ra ngaangai' ulun ru Jaudi, ondo' mamaar am poyo ondo' maalur, giu' ra titikop pamarintaan ru Pirsia.

²¹Nanusub io risilo mangiantak ra orou koopor am apat am orou koopor am limo ra sila' Adar paat ra moonong bilor.

²²Koon raginio baal no sabap ra paat orou raginio noyo ilo nangala ra pantula', saboi kangilukan am kasilukan nilo nakulau nasauk ra kaansayan am kaansukan. Ginio ra musiti' ilo mangiantak ra orou-orou raginio ra bunsag am pagakanan am niayuk mantataak ra akanon ra rondo' am bokon, mangayup ra ulun musikin.

²³Sinugut ru ulun ru Jaudi susuban ri Mordikai no, am pangiantakan no pana nasauk boo ra pangiantakan kabilaran.

²⁴I Gaman anak ri Gamidata, papag ri Agag am pantula' ru ulun ru Jaudi, nangundi' noyo ondo' sinabit ra “purim”, koson mangaru' ra orou koson pamatayan ra ulun ru Jaudi. Inaru' no noyo koson mamuso risilo intor ra tana' ti.

²⁵Kaa' minuma' i Ester ra raja', am nangingkual raja' ra susuban tinulisan, saboi inantungan i Gaman ra kinibit ru inatang malaat nano ra ulun ru Jaudi. Io am anak-anak ungkuyon nano tinair ra lugu' pampatairan.

²⁶Ginio sabap ra pangiantakan no ininggalanan ra Purim. Ginio sabap ra surat ri Mordikai am ngaangai' ondo' nailian ru ulun ru Jaudi,

²⁷nambaal ilo ra aturan risilo am papag nilo, am osoi ayuk ondo' nasauk ra ulun ru bansa' ru Jaudi musiti' mangiantak ruo ngoorou no ra moonong bilor, koson ra ondo' inaru' noyo ri Mordikai.

²⁸Nambaal ilo ra rondo' aturan, ra moonong sasambaloi ru Jaudi intor ra ngaangai' ru sukor ra matong, giu' ra ngaangai' wilayah am bandar, musiti' mangkara' koson mangiantak ra pangiantakan Purim ra sabubuoi no.

²⁹Liliwa' raginio, nabaya' ra surat ri Mordikai, Andu' raja' Ester anak ri Abiail nanulis ra surat karuo, ondo' mampakuasa' toojo ra suang ru surat ri Mordikai intor ru Purim.

³⁰Surat no inataran ra ngaangai' ulun ru Jaudi, am ralin nano inataran ra 127 wilayah giu' ra pamarintaan ru Pirsia. Surat no binaya' ra pakiasian maa' raginio bansa' ru Jaudi masalok ralalom ru kaansayan am mamimio.

³¹Surat no magangat maa' raginio ilo am papag nilo mangiantak ra pangiantakan Purim paat ra orou ondo' inaru', koson ra ilo mangkara' paat mampali am paat mangulir. Koon raginio noyo ondo' nanusuban ri Mordikai am Andu' Raja' Ester.

³²Susuban ri Ester ondo' nangaru' ra aturan intor ra pangiantakan Purim no tinulisan ra ralalom rondo' naskhah rinulun.