Read Timugon Murut KAINGKUALAN 12 Bible Online

KAINGKUALAN 12 - Timugon Murut bible

KAINGKUALAN 12

¹Indagu TUHAN ri Musa am i Arun giu' ra pagun ru Misir,

²“Bulan ragitio masauk ra bulan kasaa' tayar ru bilor ra kalendar min.

³Posoboyo' noyo susuban ti ra ngaangai' ulun ru Israil: Paat orou koopor ra bulan ragitio moonong ungkuyon musiti' mampili' sanginan anak domba kapoam anak kambing akanon magulung ra sasambaloi nano.

⁴Amon ru boborok kaga' sasambaloi no koson mangai' ra sanginan bibiag, sasambaloi raginio mangakan ra bibiag no magulung ra pasambalayan nano ondo' mamaar toojo. Bibiag no musiti' tayaron maya' ra suang ru ulun ondo' mangakan.

⁵Pampilion kau ra sanginan domba kapoam sanginan kambing, kaa' musiti' gawayan bibiag no ondo' umur no sambilor, am ondo' kolondo' maruol nano.

⁶Musiti' min alungin bibiag no saboi orou ra koopor am apat sila' raginio. Tampilon ra mai' ti orou raginio, ngaangai' ulun ru Israil manimbalui ra bibiag raginio.

⁷Musiti' ilo mangalap koborok ra raraa' ru bibiag no am pakupilon ra karuruo lugu' ru kulobon am ra angob ru kulobon ru baloi, intok ilo mangakan ra bibiag no.

⁸Tampilon ra rondom no, kual ru bibiag no musiti' patunuon am akanon ra sayur mapait am niayuk ruti' kalo latakin ra ragi.

⁹Musiti' bibiag no tundunon patunuon, makaaya' ulu, kalayam am kalabuat nano. Akano' noyo kual ondo' matunuan no; pai' akano' kual ondo' makata' kapoam ondo' tonokon.

¹⁰Pai' tatango' koborok pana intor ra kual no saboi susuab no, amon makasuwo, solobon kual no saboi makai'.

¹¹Paat mangakan, musiti' kau makapambayang noyo ra bayang koson mugar; mangkasut kau noyo am mampaguut ra jujuga'. Musiti' kau magindibok mangakan. Ginio noyo pangiantakan Paska koson mangurumat Raki', TUHAN.

¹²Paat ra rondom raginio ongoyon Ku liputo' titikop ru pagun ru Misir, am mamatoi ra moonong anak ungkuyon katuaan, am niayuk moonong anak ungkuyon katuaan ru bibiag. Mangukum Aku ra ngaangai' dewa ra Misir; Aku noyo TUHAN.

¹³Raraa' ra lugu' ru kulobon ru baloi masauk ra tatandu' tayar intok inayanan min. Makito Ku raraa' no, sumail Aku ramuyun, am kalo mangukum ramuyun paat ra Aku mangukum ra ulun ru Misir.

¹⁴Musiti' kau mangiantak ra orou raginio koson pangiantakan ra TUHAN, koson mapakara' ramuyun ra atan ondo' baalon Kuno. Iantakon noyo orou raginio moonong bilor, ra sabuoi-buoi no.”

¹⁵Indagu TUHAN, “Buoi katuluan kalo makaakan kau ra ruti' linatakan ra ragi. Mangakan ayuk ra ruti' kalo linatakan ra ragi. Paat ra orou kasaa' musiti' kau mamatir ra ngaangai' ragi ondo' soroi ralalom baloi min. Amon ru mokoondo' sasangulun mangakan ra ruti' linatakan ra ragi buoi katuluan no, kalo boo karaan ulun no ra ulun Kuno.

¹⁶Paat ra orou kasaa', am igondo' poyo paat ra orou katulu', musiti' kau tumimung koson sumambayang. Paat ra orou-orou raginio kalo pongondoyon kau ra atan pana, kaa' akanon matampos min.

¹⁷Iantakon noyo Pangiantakan Ruti' Kalo Linatakan ra Ragi, sabap ra paat ra orou raginio magibit Aku ra bansa' mino mingkual intor ra Misir. Iantakon noyo orou raginio koson pangiantakan ra moonong bilor koson ra sabuoi-buoi no.

¹⁸Musiti' kau mangakan ra ruti' kalo linatakan ra ragi, intoron ra rondom ru orou ra koopor am apat sila' kasaa' saboi ra rondom ru orou ra karuo ngoopor am rondo'.

¹⁹Buoi katuluan, kalo paulion ragi ra baloi min, sabap ra osoi ayuk mangakan ra ruti' linatakan ra ragi, io no ulun bansa' ru bokon kapoam ulun ru Israil, kalo boo karaan io ra ulun Kuno.”

²⁰

²¹Pampiau i Musa ra ngaangai' tingganai Israil am indagu risilo, “Moonong ulun intor ramuyun musiti' mangalap sanginan anak domba kapoam sanginan anak kambing tayar ru sasambaloi sigagama'. Simbaluyon boo bibiag no maa' raginio tayar ru sasambaloi mino makapangiantak ra Paska.

²²Alap sabangkos Isop am pososopon ralalom mangkuk ondo' makasuang[12] ra raraa' ru bibiag no, am pakupilon ra lugu' ru kulobon am angob ru kulobon ru baloi mino. Kolondo' sangulun pana paingkualon intor ra baloi saboi ra susuab ti.

²³Paat ra liputon ru TUHAN titikop ru pagun ru Misir koson mamatoi ra ulun ru Misir, makito ru TUHAN raraa' ra lugu' ru kulobon am angob ru kulobon ru baloi min, sumail Io am kalo mangiou ra Malaikat ru Kapatayan mumpos ra baloi mino koson mamatoi ramuyun.

²⁴Musiti' akau am anak mino gumagaya' ra kaulayan ti ra sabuoi-buoi no.

²⁵Paat ra akau mumpos ra pagun ondo' binantu' ru TUHAN ramuyun, musiti' min paugaron kaulayan ti.

²⁶Amon ru mangkuot anak mino, ‘Atan kia arati' ru upacara ti?’

²⁷Musiti' min taamon ra, ‘Gitio noyo taak simbalui Paska koson mangurumat ra TUHAN, sabap ra nansail Io ra baloi ru ulun ru Israil giu' ra Misir. Namatoi Io ra ulun ru Misir, kaa' nopoloso ritakau maayag.’ ” Igulatur boo ulun ru Israil ra sumamba.

²⁸Kopongo raginio ugar ilo am baalo' atan ondo' nanusuban ru TUHAN ri Musa am i Arun.

²⁹Paat ra tanga' rondom raginio pinatoi ru TUHAN ngaangai' anak ungkuyon katuaan giu' ra Misir, inintaran ra anak ungkuyon ru raja' ondo' manungkus ra kurisi' pamarintaan polos ra anak ungkuyon katuaan ru ulun inaput ralalom pangaputan ragana' ru tana'. Ngaangai' anak ungkuyon katuaan ru bibiag pana pinatoi.

³⁰Rondom raginio raja' am ngaangai' pagawai nano, am niayuk ngaangai' ulun ru Misir nangakarat. Tangi' mosongou maining ra titikop ru pagun ru Misir, sabap ra giu' ra moonong baloi makapinatayan ra anak ungkuyon.

³¹Rondom raginio niayuk, pampiau raja' ri Musa am i Arun am indagu, “Ugar noyo, akau am ngaangai' ulun ru Israil! Iruani' noyo pagun kutu! Ongoi noyo sambayang ra TUHAN mino, koson ra kinitaak mino.

³²Ibito' noyo domba, kambing am sapi' mino am iruani' noyo intok ragitio. Pakiasi' noyo ra barakat ra tayar kuno niayuk.”

³³Nangulisok ulun ru Misir ra ulun ru Israil mangiruan ra pagun nilo ra mataki'. Indagu ulun ru Misir, “Matoi akai ngai' amon ru kalo iruanin min intok ragitio.”

³⁴Ginio ra suangi' ru ulun ru Israil mangkuk nilo ra ruti' makata' kalo linatakan ra ragi, lopoto' ra konoon, am saani' linopot no.

³⁵Nambaal ulun ru Israil ra atan ondo' nanusuban ri Musa. Nakitaak ilo ra kuliamos limpor ondo' binaal intor ra mas am pirok, am niayuk konoon intor ra ulun ru Misir.

³⁶Nangkinibit TUHAN ra ulun ru Misir mangurumat ra ulun ru Israil saboi nangani' ulun ru Misir ra ngaangai' kitaak ru ulun ru Israil. Am koon raginio noyo nampagaau ulun ru Israil ra kalangkayaan ru ulun ru Misir.

³⁷Ugar noyo ulun ru Israil ra mantana' intor ra bandar Ramsis mongoi ra bandar Sukot. Suang nilo 600,000 ngaulun ungkuyon, kalo nakaaya' ruandu' am lalaing.

³⁸Nagibit ilo masuang sapi', domba am kambing. Masuang ulun bansa' ru bokon niayuk minaya' risilo.

³⁹Nangansak ilo ra ruti' kalo linatakan ra ragi intor ra ruti' makata' ondo' inibit nilo intor ra Misir. Pinagiru' ilo intor ra giu' no ra namulali', saboi kalo nakapanampos ra lutu' kapoam nakapangansak ra ruti' kalo linatakan ra ragi.

⁴⁰Buoi ru ulun ru Israil minayan ra Misir 430 ngambilor.

⁴¹Kaukop bilor ra ka 430, ngaangai' bansa' intor ra ulun ru TUHAN nangiruan ra pagun ru Misir.

⁴²Rondom raginio nararayus TUHAN nantamung koson magibit risilo mingkual intor ra pagun ru Misir. Rondom raginio pinatimpok toojo ra TUHAN koson sabuoi-buoi no koson ra rondom paat ra musiti' ulun ru Israil mantamung.

⁴³Indagu TUHAN ri Musa am i Arun, “Gitio noyo kaulayan ra Pangiantakan Paska: Ulun bansa' ru bokon kalo makaakan ra akanon Paska.

⁴⁴Kaa' ulipon ondo' binali min makaakan ra akanon no, amon ru sinunatan io noyo.

⁴⁵Ulun minayan ayuk ra buoi kapoam mangngandoi ondo' pinangandoi kalo makaakan ra akanon Paska.

⁴⁶Ngaangai' akanon Paska no musiti' akanon ralalom baloi, intok ru akanon no tinampos. Kalo paibitin akanon no mingkual. Pai' pandako' rondo' pana bungul ru bibiag no.

⁴⁷Ngaangai' ulun ru Israil musiti' mangiantak ra pangiantakan ti.

⁴⁸Ulun ondo' kalo sinunatan kalo makaakan ra akanon no. Amon ru makaminayan ramuyun ulun bansa' ru bokon am moogot mangiantak ra Paska koson mangurumat ra TUHAN, pagulu galing musiti' min sunatin ngaangai' ungkuyon ralalom tayar ru sasambaloi ru ulun no. Tauli boo karaan io ra ulun ru Israil toojo am makaaya' ra pangiantakan no.

⁴⁹Kaulayan ra nogondo' masauk niayuk ra ulun ru Israil am ulun bansa' ru bokon ondo' minayan ramuyun.”

⁵⁰Ngaangai' ulun ru Israil gumagaya' ra kaulayan no am mambaal ra atan ondo' nanusuban ru TUHAN ri Musa am i Arun.

⁵¹Paat orou raginio magibit TUHAN ra ngaangai' bansa' ru Israil mingkual intor ra Misir.