Read Timugon Murut KAINGKUALAN 14 Bible Online

KAINGKUALAN 14 - Timugon Murut bible

KAINGKUALAN 14

¹Indagu boo Tuhan ri Musa,

²“Susubo' noyo ulun ru Israil sumaguli' am mangkim ra tuma' ru bandar Pi-Agirot, nangkilolot ra bandar Migdol am Raat Galaga,[14] mamaar ra bandar Baal-Jipon.

³Tantamon ru raja' Misir ra tumanggau ulun ru Israil ra pagun ti am malaa' mansail ra tana' kaagisan.

⁴Mangkinibit Aku ra raja' ru Misir bambalingatan saboi mangilou io ramuyun; kamanangan Kuno ra raja' no maparatong ra pangurumatan Raki'. Makapandai boo ulun ru Misir ra Aku noyo TUHAN.” Nambaal ulun ru Israil ra atan ondo' nanusuban risilo.

⁵Kabalai' raja' ru Misir ra nagigiru' ulun ru Israil, nababaya' raja' no ra pagawai nano nangulau ra pangkaraan, am indagu, “Atan binaal takau? Nopoloso takau ra ulun ru Israil nagigiru' saboi natatakan takau ra inulipon.”

⁶Panampos raja' ra kurita' kuda nano koson mangayou, am niayuk saujor nano.

⁷Ugar raja' ra ngaangai' kurita' kuda nano, nakaaya' onom ngaatus kurita' kuda ra moonsoi kaga' ondo' sinakayan ru panglima ru saujor no.

⁸Nangkinibit TUHAN ra bambalingatan raja', saboi nangilou raja' ra ulun ru Israil ondo' tatanga' pangkiralanan mangiruan ra intok no ra kamanangan.[15]

⁹Saujor ru Misir nababaya' ra ngaangai' kuda, kurita' kuda am mapaugar, nangilou ra ulun ru Israil am nanunu' risilo ra intok nangkiman nilo giu' ra kiing ru Raat Galaga,[16] mamaar ra Pi-Agirot am Baal-Jipon.

¹⁰Pakakito ulun ru Israil ra raja' am saujor ru Misir matong koson manggal risilo, kalaa' ilo am pampalaa ra TUHAN ra makiindangan.

¹¹Indagu ilo ri Musa, “Kolondo' kia lobong giu' ra Misir saboi nagibit kau ramon ra tana' kaagisan koson matoi? Ilai' noyo atan ondo' nasauk sabap ra okou nagibit ramon miningkual intor ra Misir!

¹²Kalo poyo minintor takau, minindagu akai noyo ra masauk baal ragitio. Nambala' akai noyo rirun maa' raginio kalo mampajajou ramon, am mopoloso ramon marayus masauk ra inulipon ru ulun ru Misir. Moonsoi poyo masauk akai ra inulipon ra giu' i ka matoi ra tana' kaagisan ti.”

¹³Taam i Musa, “Pai' kalaa'! Ikang kano! Ilai' atan ondo' baalon ru TUHAN koson mamayag ramuyun ra orou raiti'; kalo boo makito min ngaangai' ulun ru Misir no.

¹⁴Ra akau noyo TUHAN ondo' makimagula'. Kalo pana mambaal kau ra atan-atan.”

¹⁵Indagu TUHAN ri Musa, “Kua pampalaa kou makiindangan? Susubo' noyo ulun ru Israil marayus mugar.

¹⁶Kakato' jujuga' muno am patutuyo' ra rasawat ru raat. Timug ru raat malapak, am makaugar ulun ru Israil mansail ra raat rasawat ru lonor no ondo' mapua'.

¹⁷Mangkinibit Aku ra ulun ru Misir bambalingatan kaga' saboi mangilou ilo ra ulun ru Israil, am poyo ralalom ru raat pana. Kamanangan Kuno ra raja' ru Misir, saujor nano, kurita' kuda nano am mapaugar ra kurita' kuda nano maparatong ra pangurumatan Raki'.

¹⁸Paat ra kalaan Ku ilo, makapandai ulun ru Misir ra Aku noyo TUHAN.”

¹⁹Malaikat ri Aki Kapuuno' ondo' soroi ra saang ru saujor Israil manding ra tinaulian. Lugu' ru gaun soroi ra saang nilo niayuk manding

²⁰ra pangkilolot ru saujor ru Misir am ulun ru Israil. Gaun no maparatong ra kalandaman ra ulun ru Misir kaa' mangani' ra sinda ra ulun ru Israil, saboi buoi ru rondom karuo-ruo pulalai no kalo makapaginggaar ra rondo' am bokon.

²¹Patutuyo' ri Musa kalindu' nano rasawat ru raat, am mangkinibit TUHAN ra angin sirangon sumiob ra mapuor saboi lumugut timug ru raat. Nagangin buoi ru rondom am nangulau ra raat nasauk ra tana' mapua'. Nalapak timug ru raat,

²²am mansail ulun ru Israil ra raat ra rasawat ru tana' ondo' mapua', liliwa' timug tampilon pamiris am kait koson ra rinding masawat ru timug.

²³Ulun ru Misir nabaya' ra kuda, kurita' kuda am mapaugar ra kurita' kuda nangilou ra ulun ru Israil saboi ra tanga' ru raat.

²⁴Paat ra tumawang orou, intor ra lugu' ru apui am lugu' ru gaun, nagilong TUHAN ra saujor ru Misir, am mampajajou risilo.

²⁵Nangkinibit Io ra luda' ru kurita' kuda nilo maimpong saboi mapagon mugar. Indagu ulun ru Misir, “Sumumbung TUHAN ra ulun ru Israil koson manggal ritakau. Ibok no pagiru' takau intor ragiti!”

²⁶Indagu TUHAN ri Musa, “Patutuyo' noyo kalindu' muno ra rasawat ru raat, am sumaguli' timug no am mompolosor ra ulun ru Misir am kurita' kuda am niayuk mapaugar ra kurita' kuda nilo.”

²⁷Ginio ra patutuyo' ri Musa kalindu' nano rasawat ru raat. Katawang orou, saguli' timug koson ra kaindalaman. Kuminam ulun ru Misir magiru' intor ra raat, kaa' napalinjob TUHAN risilo.

²⁸Saguli' timug no am napalinjob ra ngaangai' kurita' kuda am mapaugar no, am niayuk ngaangai' saujor ru Misir ondo' nangilou ra ulun ru Israil ra tanga' ru raat; kolondo' sangulun pana naayag.

²⁹Kaa' ulun ru Israil nansail ra raat ralimbou ru tana' ondo' mapua', liliwa' timug tampilon pamiris am kait nasauk ra rinding masawat ru timug.

³⁰Paat ra orou raginio, namayag TUHAN ra ulun ru Israil intor ra ulun ru Misir. Nakito ru ulun ru Israil baangkai ru ulun ru Misir nakaasak ra nagas.

³¹Pakakito ulun ru Israil ra nangala TUHAN ra ulun ru Misir ra kuasa' ondo' maayo, malaa' ilo ra TUHAN; mangintopot ilo ra TUHAN am ulipon Nano i Musa.