Read Timugon Murut KAINGKUALAN 15 Bible Online

KAINGKUALAN 15 - Timugon Murut bible

KAINGKUALAN 15

¹Parimbai boo i Musa am ulun ru Israil ra rimbai ti ra TUHAN, “Masaga' ku rimbayin TUHAN sabap ra namanang Io ra moonsoi kaga'; namatir Io ra kuda am ondo' kiminura' ra kuda ralalom ru raat.

² TUHAN manaung raki' ondo' maikang; Io noyo namayag raki'. Io i Aki Kapuuno' kuno, am mongompor aku Riso; Io i Aki Kapuuno' ondo' sambaan ri ama' i, am marimbai aku ra kinaayo Nano.

³TUHAN noyo mapanggol tumula', TUHAN noyo inggalan Nano.

⁴Namatir Io ra saujor ru Misir am kurita' kuda nilo ralalom ru raat; pagawai ru saujor ondo' moonsoi kaga' nolosor giu' ra Raat Galaga.[17]

⁵Raat ondo' napalinjob risilo, nolosor ilo ra lonor ru raat koson ra batu.

⁶Iou TUHAN, ikang Muno, makaimuag kaga', nanutuk Kou ra pantula' saboi natutuk kaga'.

⁷Ra kinaayo kaga' Muno, pinuso Mu pantula' Muno; sangit Muno nasimbuluk am nonolob risilo koson ra rami.

⁸Sinampui Mu raat saboi timug no siminimpor; timinolorog timug no koson ra rinding batu; lonor nano ra malandom kaga' no nasauk mapua'.

⁹Kon ru pantula', ‘Mangilou aku am mamparakop risilo; tatayaron ku kalangkayaan nilono, am timpokon ku alapon kuno; pajuloyon ku ilang kuno am mangalap ra ngaangai' longgom nilo.’

¹⁰Kaa' ra rondo' ayuk paminawo Muno, iou TUHAN, nolosor ulun ru Misir, nolosor ilo koson ra timah ralalom libut ru timug ra makalalaa' kaga'.

¹¹Iou TUHAN, osoi kia intor ra tuhan-tuhan ondo' koson Rirun? Osoi kia ondo' koson Rirun, matulai kaga'? Osoi kia ondo' makapambaal ra kaimuagan am baal ra makaimuag koson ra binaal Muno?

¹²Napatutui Kou ra kalindu' pamiris Muno, am nonolon tana' ti ra pantula' maino.

¹³Naningganai Kou ra ulun ondo' binayag Muno, sabap ra gagaya' Muno ra bantu' Muno. Ra ikang Muno ondo' maayo, naningganai Kou risilo mongoi ra tana' Muno ondo' matulai.

¹⁴Bansa'-bansa' ondo' mangining raginio monontol ra laa', ulun ru Palistin pinaliman ra monontol.

¹⁵Tingganai-tingganai ru Idom mangalaa', ulun ru Moab ondo' mangapanggol monontol; liminiot kinabaani ru ulun ru Kanaan.

¹⁶Talou am laa' lumumpa' risilo. Nakito nilo ikang Muno, iou TUHAN, kalo makalulu' ilo sabap ra matalou, saboi ulun Muno nansail ra saang nilo — ulun ondo' pinalabus Muno intor ra pangulipanan.

¹⁷Nagibit Kou risilo mumpos, am mapaayan risilo giu' ra gunung Muno, intok ondo' Okou, iou TUHAN, nampili' koson masauk ra ayanan Muno; Baloi ondo' binaal Muno galama'.

¹⁸Okou, iou TUHAN masauk ra raja' ra sabuoi-buoi no.”

¹⁹Nansail ulun ru Israil ra raat rasawat ru tana' ondo' mapua'. Kaa' pakasubol kurita' kuda am kuda ru ulun ru Misir, am niayuk mapaugar ra kurita' kuda ralalom ru raat, pasagulio' ru TUHAN timug no saboi nolosor ilo.

²⁰I Miriam boo, sangulun nabi, iono maayo ruandu' ri Arun, nangalap ra tamburing nano. Ngaangai' ruandu' pana minaya' napalamba' ra tamburing liliwa' mansayau.

²¹Rinimbayan ri Miriam ilo, “Rimbayi' min TUHAN sabap ra moonsoi kaga' kamanangan noowot Nano; Namatir Io ra kuda am ulun nangura' ra kuda ralalom ru raat.”

²²Kopongo raginio naningganai i Musa ra ulun ru Israil nangiruan ra Raat Galaga[18] am subol ra tana' kaagisan Syur. Nangkiralan ilo mansail ra tana' kaagisan no buoi kataluan ra kalo nakatuum ra timug.

²³Pakasaboi ilo boo ra rondo' intok inggalan no Mara,[19] kaa' timug ra giu' no mapait kaga' saboi kalo mainum. Ginio sabap ra intok no ininggalanan ra Mara.

²⁴Pasabutok mamagun ri Musa am pangkuot, “Atan boo inumon mai?”

²⁵Pakiasi' toojo i Musa ra TUHAN, am papakito TUHAN riso ra rondo' tataun. Patapungo' ri Musa tataun no ralalom ru timug, am kalo boo mapait timug no saboi mainum. Giu' ra intok no, nangani' TUHAN risilo ra ukum, am giu' no niayuk nangkinam Io risilo.

²⁶Indagu Io, “Amon ru totopot kau gumagaya' Raki', TUHAN i Aki Kapuuno' mino, am mambaal ra ngaangai' atan ondo' motopot ra pagilayan Kuno, am niayuk sumugut ra ngaangai' susuban Kuno, kalo mangukum Aku ramuyun ra maruol ondo' pinatiu' Kuno ra ulun ru Misir. Aku noyo TUHAN ondo' mamabas ramuyun.”

²⁷Pakasaboi ilo boo ra Ilim. Giu' no mokoondo' mopor am ruo taur ru timug am tulu' ngampuun kurma. Nangkim ilo maar ra timug ra giu' no.