Read Timugon Murut KAINGKUALAN 16 Bible Online

KAINGKUALAN 16 - Timugon Murut bible

KAINGKUALAN 16

¹Ngaangai' ulun ru Israil minugar intor ra Ilim. Paat ra orou koopor am limo ralalom sila' karuo intor ilo nangiruan ra Misir, nakasaboi ilo ra tana' kaagisan Sin nangkilolot ra Ilim am Sinai.

²Ngaangai' nilo pasabutok ri Musa am i Arun giu' ra tana' kaagisan no.

³Konilo ri Musa am i Arun, “Moonsoi poyo ru minatoi akai pinatoi ru TUHAN giu' ra Misir. Maa' giu' no ra makaturung akai, am niayuk mangakan ra kual, am kula' pana suang ru akanon gogoton mai. Kaa' nagibit kou ramon mongoi ra tana' kaagisan ti maa' raginio ngaangai' akai matoi ra bitilan.”

⁴Indagu TUHAN ri Musa, “Raino maparatu' Aku ramuyun ngaangai' ra akanon intor ra limbowon. Moonong orou ulun musiti' mingkual manimung ra ruti' kaukapan ra songorou. Ralan ragitio makapangkinam Aku ra ulun Kuno, maa' raginio mapandayan Ku ru gagayaan nilo susuban Kuno kapoam kalo.

⁵Paat ra koonom ngoorou, musiti' ilo manimung ra akanon no induo ruli' suang no am manampos raginio.”

⁶Ginio ra kon ri Musa am i Arun ra ngaangai' ulun ru Israil, “Tampilon ra mai' ru raiti' makapandai kau ra TUHAN raginio noyo ondo' nagibit ramuyun mingkual intor ra Misir.

⁷Tampilon ra susuab ti makakito kau ra sinda ru katulayan ru TUHAN. Naining No noyo butok min Riso; iou, Riso, sabap ra mapaugar akai ayuk ra susuban Nano.”

⁸Kon boo ri Musa, “Mangani' TUHAN ramuyun ra kual koson akanon tampilon ra mai' ti, am kula' suang ruti' kasagaan mino tampilon ra susuab ti, sabap ra naining No noyo mapara' boo masalok kau mambutok Riso. Sotopot no, butok mino sala' ka ra akai, kaa' ra TUHAN.”

⁹Indagu i Musa ri Arun, “Susubo' ilo ngaangai' matong muma' ra TUHAN, sabap ra naining No noyo butok nilo.”

¹⁰Tatanga' i Arun mindagu risilo ngaangai', ponontong ilo tampilon ra tana' kaagisan, am pulusat ru sinda katulayan ru TUHAN makito ralalom ru gaun.

¹¹Indagu TUHAN ri Musa,

¹²“Naining Ku noyo butok ru ulun ru Israil. Ragui' ilo, ra tampilon ra mai' ti makaalap ilo ra kual ra akanon, am tampilon ra susuab ti makaalap ilo ra ruti' masuang ondo' gogoton nilo. Ginio ra makapandai ilo ra Aku noyo TUHAN i Aki Kapuuno' nilo.”

¹³Tampilon ra mai' ti, masuang kaga' tantarau matong ra nangkiman nilo saboi natikop ngaangai' nangkiman. Tampilon ra susuab ti, mokobolobou boo ra liput ru nangkiman.

¹⁴Mairu' bolobou no, rondo' ondo' malilis koson ra sisi' am malumot koson ra bolobou ondo' kiminotog soroi ralimbou ru tana' kaagisan.

¹⁵Pakakito ulun ru Israil raginio, kalo makapandai ilo atan ginio. Pasakuot ilo ra rondo' am bokon, “Atan kia ginio?” Indagu i Musa risilo, “Gitio noyo akanon pinataak ru TUHAN ramuyun ra akanon.

¹⁶Nanusub TUHAN maa' raginio moonong ulun manimung ra akanon no ra kula' suang ru kaukapan, iono suang ruo ngalito tayar ru moonong sambaloi.”

¹⁷Nambaal ulun ru Israil raginio; mokoondo' nanimung nasailan intor ra ruo ngalito am mokoondo' poyo ondo' nanimung nantutus intor raginio.

¹⁸Pakapaat ra ilo manuku', mapandayan ra ulun ondo' nanimung masuang kalo nasailan, am ulun ondo' nanimung koborok kalo tupo nairuruan. Moonong ulun nanimung ra kinasuang ru kaukapan nano.

¹⁹Kon ri Musa risilo, “Kolondo' osoi pana makapambuli ra akanon kabalu' ra koborok pana saboi susuab no.”

²⁰Kaa' mokoondo' popolos risilo ondo' kalo mampalio ra ragu ri Musa no, am nambuli santayaran ra akanon no. Suabon no ra iosusuab, uloron am malaat owou ru akanon no, sangit boo i Musa risilo.

²¹Moonong susuab ti manimung ilo ra akanon no, kinasuang ra kaukapan. Makapangit mato ru orou, akanon ondo' soroi ra tana' no matunang.

²²Paat ra koonom ngoorou manimung ilo ra akanon induo ruli' suang no, apat ngalito suang no tayar ru moonong ulun. Ngaangai' tingganai ru ulun no matong am mambala' ra baal raginio ri Musa.

²³Kon ri Musa risilo, “Nanusub TUHAN ra susuab no orou tangusan, orou matulai patimpokon Riso. Paat orou raiti' solobo' atan ondo' masaga' min solobon, am tonoko' atan ondo' masaga' min tonokon. Ondo' suwo no, moonsoi pasuayon am buliin tayar ru susuab no.”

²⁴Koson ra nanusuban ri Musa, nambuli ilo ra suwo ru akanon no saboi ra suabon no; kalo moonos am kalo uloron akanon no.

²⁵Kon ri Musa, “Akano' noyo akanon ti ra orou raiti', sabap ra orou raiti' orou Sabat, orou tangusan ondo' patimpokon ra TUHAN. Kalo makaalap kau ra akanon ra bokon giu' ra liwar ru nangkiman.

²⁶Musiti' kau manimung ra akanon buoi kaanaman, kaa' paat ra orou katulu', orou tangusan no, kolondo' akanon timungon.”

²⁷Paat ra orou katulu' ingkual kukula' ngaulun ra ulun no koson manimung ra akanon, kaa' kalo nokoowot ra atan-atan.

²⁸Indagu boo TUHAN ri Musa, “Kula' poyo buoi min kalo gumagaya' ra susuban Kuno?

²⁹Karaa' noyo ra Aku, TUHAN nangani' ramuyun ra orou tangusan. Ginio sabap ra paat ra orou ra koonom mangani' Aku ramuyun ra akanon ondo' sama' koson karuaan. Paat ra orou ra katulu' musiti' moonong ulun mayan ra intok ru sigagama', am kalo iruanin baloi nano.”

³⁰Ginio ra kalo mangandoi ilo ra orou ra katulu'.

³¹Ininggalanan ru ulun ru Israil akanon no ra manna.[20] Babaal no koson ra unor mongoborok batik mapulak am liman no koson ra biskut ondo' binaal ra ruu' maningot.

³²Kon ri Musa, “Nanusub TUHAN ritakau mambuli kasanganu ra manna tayar ru papag takau, maa' raginio makakito ilo ra akanon ondo' tinaakan ru TUHAN ritakau giu' ra tana' kaagisan, paat ra Io nagibit ritakau mingkual intor ra Misir.”

³³Indagu i Musa ri Arun, “Alapo' rondo' rarapu' am suangi' ra ruo ngalito manna, am pabantaa' rarapu' no ra saang ru TUHAN, koson buliin tayar ru papag takau.”

³⁴Pabantaa' ri Arun rarapu' no ra saang ru Kaban Nabantuan ra buliin, sumugut ra susuban ru TUHAN ri Musa.

³⁵Nangakan ulun ru Israil ra manna buoi apat ngoopor ngambilor polos ilo nakasaboi ra tana' ru Kanaan, intok pamagunan nilo. (

³⁶Tukuan ru kuliamos mapua' ondo' kaindalaman pinakai ru ulun paat ragili, makasuang ruo ngoopor ngalito.)