Read Timugon Murut KAINGKUALAN 2 Bible Online

KAINGKUALAN 2 - Timugon Murut bible

KAINGKUALAN 2

¹Paat ragili sangulun ungkuyon intor ra bansa' ru Liwi nanangandu' ra sangulun ruandu' intor ra bansa' raginio niayuk.

²Naganak boo ruandu' no ra sangulun anak ungkuyon. Kakito no ra mapara' bonsoi ru lalagang no, bunio' no lalagang no buoi talu ngansila'.

³Kaa' kalo mabuni no ra mabuoi poyo. Ginio ra alap io rondo' bakul ondo' binaal intor ra sakot galaga am sinalitan no ra tiir, maa' raginio kalo masubol ru timug. Pabantaa' no lalagang nano ralalom bakul no, am patampako' no ra tatanga' ru sakot galaga ra kiing ru sungoi.

⁴Minigor maayo ruandu' ru lalagang no maalur-alur intor ra giu' no koson magilong ra atan kasaukan ru lalagang no.

⁵Paat raginio tumuun anak ruandu' ru raja' ra sungoi koson mariu', liliwa' ulipon-ulipon ruandu' nano mugar-ugar ra kiing ru sungoi. Kakito ru anak ruandu' ru raja' no bakul pinaunor ra sakot galaga. Nanusub io ra sangulun ulipon ruandu' mongoi pangalap ra bakul no.

⁶Ukabo' ru anak ruandu' ru raja' bakul no am kakito no sangulun lalagang ungkuyon mantangi'. Makaasi' anak ruandu' ru raja' no ra lalagang no am indagu, “Gitio sangulun intor ra lalagang ru Ibrani.”

⁷Pangkuot boo maayo ruandu' ru lalagang no ra anak ruandu' ru raja' no, “Anak ruandu' ru raja', masaga' kou kia amon ru maguyum aku ra sangulun ruandu' Ibrani mapatiti' ra lalagang ti?”

⁸Taam anak ruandu' ru raja' no, “Iou, ongoi no.” Ugar boo ralaa no am piawo' no ina' galama' ru lalagang no.

⁹Indagu anak ruandu' ru raja' no riso, “Alapo' lalagang ti am patitio' raki', ayupin tokou.” Alapo' boo ru ruandu' no lalagang no am patitio' no.

¹⁰Paat ra anak no maayo noyo, ibito' ru ruandu' no anak no ra anak ruandu' ru raja', am anak no koson pinangkaanak ayuk boo ru anak ruandu' ru raja' no. Indagu io, “Inggalanin ku ri Musa,[3] sabap ra inasakan ku io intor ra timug.”

¹¹ Paat ri Musa nasukor noyo, ingkual io koson mongoi pagilong ra ulun ru Ibrani ondo' rondo' bansa' riso. Nakito no ati kulaan ilo jinajalan mangandoi ra maagat. Nakito niayuk ri Musa ra napalamba' sangulun Misir ra sangulun Ibrani ondo' rondo' bansa' ri Musa galama'.

¹²Pulolowo' ri Musa liliut, am ilai' no kolondo' sangulun pana nakakito riso, potoyo' no ulun ru Misir no am bunio' no baangkai no ralalom ru agis.

¹³Suabon ragili ongoi poyo i Musa ra giu' no, kakito no boo ruo ngaulun Ibrani mansangor. Kuati' ri Musa ulun ondo' makasala no, “Kua lambaa' mu ulun ondo' mogondo' ra bansa' muno galama'?”

¹⁴Taam ulun no, “Osoi napasauk rirun ra mangnguasa' am akim mai? Potoyon mu kia aku koson okou namatoi ra ulun ru Misir i?” Malaa' am mangkara' i Musa, “Maaru' napandayan noyo ru ulun binaal kuli.”

¹⁵Kaala' boo raja' ra nasauk no, kinam io maguyum ra ralan koson mamatoi ri Musa, kaa' nagiru' noyo i Musa ra pagun ru Midian am ayan ra giu'. Paat ra rondo' orou, panturung i Musa maar ra rondo' tulubong.

¹⁶Imam giu' ra Midian, inggalan no i Jitro makaanak ra ruandu' tulu' ngaulun. Ratong katulu' ngaulun anak ruandu' ri Jitro mongoi sagou, am suangi' pambulian-pambulian ra timug koson painumon ra domba am kambing ru ama' nilo.

¹⁷Kaa' ratong kukula' ngaulun magagalung am pagiruo' nilo tulu' ngaulun ralaa no. Indangano' boo ri Musa ralaa-ralaa no am painumo' bibiag tinambiag nilo.

¹⁸Pakauli' ralaa-ralaa no, pangkuot ama' nilo, “Kua mataki' kaga' akau minuli' orou raiti'?”

¹⁹Taam ilo, “Sangulun bansa' ru Misir nangindangan ramon intor ulisoon ru magagalung ra bokon. Sinagawan no akai am napainum ra bibiag tinambiag takau.”

²⁰“Ati ulun i raino?” Kuot ri Jitro ra anak-anak nano. “Kua iruani' min io? Ongoyo' min kimaiti' io mangakan mabaya' ritakau.”

²¹Nangiou boo i Musa mayan ra giu' no. Paganduo' ri Jitro anak ruandu' nano, i Jipora ri Musa.

²²Naganak i Jipora ra sangulun anak ungkuyon. Indagu i Musa, “Aku ti ulun bansa' ru bokon ra pagun ti, ginio boo ra inggalanin ku anak ti i Girsom.”[4]

²³Bilor kabilor raiti patoi raja' ru Misir, kaa' ulun ru Israil lakat poyo maguros sabap ra inulipon am golok ilo makiindangan. Golok nilo nakasaboi ri Aki Kapuuno'.

²⁴Naining ri Aki Kapuuno' golok ru ulun ru Israil, am nakara' No nabantuan Nano ri Abragam, i Isak am i Jakub.

²⁵Nakakito i Aki Kapuuno' ra ulun-ulun ru Israil no inulipon am mampalio ra baal nilo.[5]