Read Timugon Murut KAINGKUALAN 22 Bible Online

KAINGKUALAN 22 - Timugon Murut bible

KAINGKUALAN 22

¹“Amon ru mantakou sasangulun ra sapi' kapoam domba, am simbaluyon kapoam talanon, musiti' aligin no sanginan sapi' ra limo ngainan sapi', am sanginan domba aligin no ra apat ngainan domba.

²Musiti' ulun no mangalig ra atan pana ondo' tokowon nano. Amon ru kolondo' io ra atan pana, musiti' io talanon koson ra ulipon pambayar ra atan ondo' tinakou nano. Amon ru ondo' tinakou nano sapi', kaladai kapoam domba, am nakito ra lakat poyo maayag soroi ra ulun no, musiti' aligin no moonong sanginan bibiag ra ruo ngainan bibiag. “Amon ru marakop sangulun mantatakou paat ra mangaloi ra baloi tampilon ra rondom, am matoi io, kolondo' sala ru ulun namatoi no. Kaa' amon ru masauk gitio ra tampilon matawang, makasala ulun namatoi ra mantatakou no.

⁵“Amon ru polosoon ru sasangulun bibiag tinambiag nano mongkotop ra sakot giu' ra umo kapoam umo ru anggur, am bibiag tinambiag no sajajawot am mangakan ra tinanom[29] giu' ra umo ru ulun bokon, musiti' tatangan ra bibiag tinambiag no mambayar ra kalubatan ra ampos ra moonsoi kaga' intor ra umo kapoam umo ru anggur nano galama'.

⁶“Amon ru mansuru sasangulun ra umo nano, am sumunsung apui no ra malalaat am rumalat ra umo ru ulun bokon saboi monolob ra gandum ondo' tatanga' tumuu' kapoam gandum ra binangkos noyo, musiti' ulun nansuru no mambayar ra kalubatan.

⁷“Amon ru mangiou sasangulun mambuli ra pakibuliin koson ra ruit kapoam kuliamos mologo, am tinakou ginilo intor ra baloi nano, musiti' mantatakou no mambayar induo ruli', amon ru marampatan io.

⁸Kaa' amon ru kalo marampatan mantatakou no, musiti' ulun nakibulian no ibiton ra intok sambayangan, am magibot ra kalo nantakou io ra kuliamos pinabulian riso no.

⁹“Tayar ru moonong pansangaran intor ra rapu', iou ra sapi', kaladai, domba, konoon kapoam kuliamos ra nangatatak, karuo ngaulun ondo' nangakun ra tatangan raginilo musiti' ibiton ra intok sambayangan. Ulun ondo' tuluon ri Aki Kapuuno' ra makasala, musiti' mambayar ra induo ruli' ra tatangan toojo.

¹⁰“Amon ru mangiou sasangulun magalung ra kaladai, sapi', domba kapoam bibiag tinambiag ru ulun bokon, am matoi bibiag tinambiag no, mapilatan kapoam ginaau ru pantula' kaa' kolondo' ulun nakatainu;

¹¹ralalom baal ru ginio, musiti' ulun ondo' nagalung ra bibiag no mongoi ra intok sambayangan am magibot sabap ra inggalan ru TUHAN ra kalo nantakou io ra bibiag no. Amon ru sala' ka io nantakou ra bibiag no, musiti' tatangan ra bibiag no magantung ra kalubatan, am ulun ra nagalung no kalo pana mambayar ra kalubatan;

¹²kaa' amon ru tinakou bibiag no, musiti' io mambayar ra kalubatan ra tatangan no.

¹³Amon ru sinaam bibiag tinambiag no ru bibiag masigo, musiti' ulun no mapakito ra suwo ru bungul ru bibiag no ra tatangan no koson ra inono'. Ralalom baal ru ginio kalo pana mambayar io ra kalubatan tayar ru bibiag no.

¹⁴“Amon ru magira' sasangulun ra sanginan bibiag, am napilatan kapoam minatoi bibiag no paat ra tatangan no kalio ra intok kasaukan no, musiti' ulun nagira' no mambayar ra kalubatan.

¹⁵Kaa' amon ru baal raginio nasauk paat ra tatangan no soroi ra giu' no, kalo pana mambayar ulun no ra kalubatan. Amon ru siniwaan bibiag no, kalubatan no nabayaran noyo ra pambayar ra siwa'.”

¹⁶“Amon ru manganja' sangulun ungkuyon ra sangulun ralaa ondo' kolondo' poyo tamung, am narulug riso, musiti' ungkuyon no mambayar ra mulo, am anduon no io.

¹⁷Kaa' amon ru kalo mangiou ama' ru ralaa no ra ungkuyon no maguot ra anak nano, musiti' ungkuyon no mambayar ra ruit suang ru mulo ru sangulun ralaa ra ama' no.

¹⁸“Potoyo' moonong ruandu' ondo' mapandai kaga' ra sihir.

¹⁹“Potoyo' moonong ulun ondo' makimampaa' ra bibiag.

²⁰“Osoi mapataak ra taak simbalui ra tuhan-tuhan ra bokon, ondo' ak am Aku, TUHAN, musiti' ulun no ukumin ra matoi.

²¹“Pai' kalaat am pai' ulipono' ulun bansa' ru bokon; karaa', galing i akau pana ulun bansa' ru bokon giu' ra pagun ru Misir.

²²Pai' kalaat ra napuor kapoam anak nailusan ra matuo.

²³Amon ru malaat kau risilo, Aku, TUHAN mangiou ra kitaakon nilo paat ra ilo makiindangan Raki'.

²⁴Sumangit Aku am mamatoi ramuyun ralalom pangayawan. Mangapuor andu' min am anak min kolondo' ama'.

²⁵“Amon ru mapaira' kau ra ruit ra sangulun musikin ra popolos ru ulun Kuno, pai' ikanuo' koson ra ondo' mapaira' ra ruit ondo' makitaak ra bunga' ru ruit.

²⁶Amon ru mangalap kau ra sukub ru sasangulun koson ra pangampin ra ira' nano, musiti' min pasagulion sukub no ra kalo poyo tumolop mato ru orou,

²⁷sabap ra sukub ondo' soroi riso koson pampalasu' ra inan nano. Amon ru kalo pasagulion sukub no, kolondo' boo alapon no ra bajang. Amon ru makiindangan io Raki', iningon Ku io sabap ra Aku ti makaasi'.

²⁸“Pai' ibati' i Aki Kapuuno',[30] am pai' pagulas ra tingganai mino.

²⁹“Paat ra ondo' inaru', papataak no Raki' ra santayaran intor ra gandum, wain am umau jaitun mino. “Pataako' Raki' anak ungkuyon katuaan mino,

³⁰Pataako' Raki' anak ungkuyon kasaa' ru sapi' am domba min. Polosoon noyo anak ungkuyon ra kasaa' ru bibiag tinambiag no soroi ra indung nano buoi katuluan, am paat ra orou ra kabalu' pataako' Raki' anak ungkuyon ra kasaa' ru bibiag tinambiag no.

³¹“Akau noyo ulun Kuno. Ginio ra kalo makaakan kau ra kual ru atan pana bibiag ondo' minatoi ra sinaam ru bibiag masigo; taaki' ra uku' kual no.”