Read Timugon Murut KAINGKUALAN 23 Bible Online

KAINGKUALAN 23 - Timugon Murut bible

KAINGKUALAN 23

¹“Pai' potonowo' tanou ra magabau, am pai' indangan ra ulun ondo' makasala am mangani' ra inono' kalo motopot.

²Pai' pagibaya' ra kasuangan ulun paat ra ilo mambaal ra kalaatan kapoam mapatumbalik ra katimpakan am mangani' ra inono' kalo motopot.

³Pai' pamparuung paat ra sangulun musikin bisaraan giu' ra makama.

⁴“Amon ru nainamot ra nakatuum kau ra sapi' kapoam kaladai ru pantula' mino nalabus, pasagulio' bibiag no ra tatangan no.

⁵Amon ru kaladai ru pantula' mino naratu' sabap ra inibit nano maagat, indangano' io manirong ra kaladai no; pai' ugar ra kalo mangindangan.

⁶“Pai' talingaawo' katimpakan intor ra ulun musikin ondo' matong mapabala' ra makama.

⁷Pai' pambaal ra panguwan magabau, am pai' kinibiti' ulun kalo makasala ukumin ra matoi, sabap ra mangukum Aku ra ulun ondo' mambaal ra kalaatan koson raginio.

⁸Pai' apuo' taak pangambi', sabap ra taak pangambi' no mopobolou ra ulun ra atan ondo' motopot am mampalubat ra ulun kalo makasala.

⁹“Pai' kalaat ra ulun bansa' ru bokon; nakaili' kau nasauk ra ulun bansa' ru bokon, sabap ragili pana ulun bansa' ru bokon kau giu' ra Misir.”

¹⁰“Buoi onom ngambilor mantanom kau ra umo am manimung ra atan ondo' ampos no.

¹¹Kaa' paat ra bilor ra katulu' musiti' tana' no polosoon. Buoi ru bilor raginio kalo panimungon kau ra ampos ru atan pana ondo' tumuu' galama' ra umo min. Polosoon noyo alapon ru ulun musikin, am suwo no tayar ru bibiag masigo. Baalo' niayuk ginio ra umo ru anggur am puun ru jaitun mino.

¹²“Pangandoi kano buoi kaanaman ralalom saminggu', kaa' paat ra orou ra katulu' kalo pongondoyon kau, maa' raginio ulipon mino am niayuk ulun bansa' ru bokon ondo' mangandoi ramuyun, am niayuk bibiag tinambiag min makatangus.

¹³“Iningo' noyo ngaangai' bala' ondo' pinasaboi ru Aku, TUHAN ramuyun. Pai' pakiasi' ra tuhan-tuhan ra bokon; am mulu' poyo ra pai' noyo sabito' inggalan ru tuhan-tuhan no.”

¹⁴“Moonong bilor, baalo' noyo talu pangiantakan koson mangurumat Raki'.

¹⁵Ralalom ru bulan Abib, baalo' noyo Pangiantakan Ruti' Kalo Linatakan ra Ragi sumugut ra ralan ondo' nanusuban Kuli, sabap ra ralalom ru bulan raginio akau nangiruan ra Misir. Pai' pangakan ra ruti' ondo' linatakan ra ragi buoi katuluan ru pangiantakan no. Moonong ra akau matong sumambayang Raki', musiti' kau magibit ra taak.

¹⁶“Iantako' noyo Pangiantakan Kapangaan Nanantab am mapataak ra ampos ru tinanom ondo' kasaa' kumoson. “Iantako' noyo Pangiantakan Mangkalukub ra Raun bulintok ra raun tumutu', paat ra akau manimung ra ampos ru umo ru anggur am ampos ru umo ru kikinawa'.

¹⁷Moonong bilor, paat ra talu pangiantakan no, ngaangai' ungkuyon matong musiti' sumambayang Raki', TUHAN i Aki Kapuuno' min.

¹⁸“Pai' papataak ra ruti' ondo' linatakan ra ragi paat ra okou mapataak Raki' ra bibiag koson ra taak simbalui. Lomok ru bibiag ondo' pataakon Raki' buoi ru pangiantakan ragitio kalo posoroyon polos ra susuab ru suabon no.

¹⁹“Moonong bilor, ibito' noyo ampos kasaa' ondo' moonsoi kaga' intor ra tinanom mino ra baloi ru TUHAN i Aki Kapuuno' mino. “Pai' ansako' anak ru domba kapoam anak ru kambing ra gatas ru indung nano.”

²⁰“Manusub Aku ra malaikat Kuno sumigulu ramuyun koson mangampin ramuyun ralalom pangkiralanan am magibit ramuyun ra intok ondo' tinampos Ku noyo.

²¹Iningo' noyo am gagayaa' io. Pai' guor riso sabap ra io no sinusub Kuno. Kalo mangampun io ra guor koson raginio.

²²Kaa' amon ru gumagaya' kau riso am mambaal ra ngaangai' susuban Kuno, mangayou Aku gumula' ra ngaangai' pantula' mino.

²³Sumigulu malaikat Kuno ramuyun am niayuk magibit ramuyun mongoi ra pagun ru ulun ru Amori, Git, Piris, Kanaan, Giwi am Jibusi; pusoon Ku ilo.

²⁴Pai' samba ra tuhan-tuhan nilono. Pai' tiluo' ralan nilo sumambayang. Pusoo' noyo tuhan-tuhan nilono am pandako' lugu'-lugu' batu ondo' alapon nilo sumambayang.

²⁵Amon ru sumamba kau Raki', TUHAN i Aki Kapuuno' min, mambarakat Aku ramuyun ra akanon am inumon, am mamuso ra ngaangai' maruol mino.

²⁶Giu' ra pagun min, kolondo' ruandu' mairuan kapoam tabanang. Aniin Ku akau ra umur maawar.

²⁷“Saukon Ku bansa' ondo' manggal ramuyun malaa' Raki'. Maparatong Aku ra kaubangan ra bansa' gulaan mino, am mangkinibit Aku ra ngaangai' pantula' tumalikur am magiru' intor ramuyun.

²⁸Jojowon Ku pantula' paat ra akau jumalai;[31] pagiruon Ku ulun ru Giwi, Kanaan am Git.

²⁹Kalo pagiruon Ku ilo ngaangai' ra buoi ru sambilor, sabap ra baal ragitio makasauk ra tana' no mokoloso am bibiag masigo sumuang kaga'.

³⁰Pagiruon Ku ilo ra taganakon saboi sama' suang min mayan ra tana' no.

³¹Aruon Ku balitan ru pagun min intor ra Teluk Akaba mongoi ra Sungoi Iprat, am intor ra Raat Tanga' polos ra tana' kaagisan. Mangani' Aku ramuyun ra kuasa' ra mamagun ru pagun no, am pagiruon min ilo ra akau jumalai.

³²Pai' pambaal ra nabantuan risilo kapoam tuhan-tuhan nilono.

³³Pai' min paayano' ilo ra pagun min, maa' raginio kalo sumamba kau ra tuhan-tuhan nilono am makatula Raki'. Amon ru sumamba kau ra tuhan-tuhan nilono, makasubo kau ra landak ru kapatayan.”