Read Timugon Murut KAINGKUALAN 24 Bible Online

KAINGKUALAN 24 - Timugon Murut bible

KAINGKUALAN 24

¹Indagu boo TUHAN ri Musa, “Pagaloi ra gunung mongoi uma' Raki', mabaya' kou ri Arun, Nadab, Abigu am tulu' ngoopor tingganai ru Israil, am samba Raki' intor ra maalur.

²Okou ayuk sangulun makainggaar Raki'; bokon no kalo painggaaron, am mamagun kalo pogoloyon ra gunung ti.”

³Ugar i Musa am pambala' ra ulun no ra ngaangai' susuban am aturan ru TUHAN. Taam ngaangai' ulun ra nagagampan, “Baalon mai ngaangai' ondo' rinagu ru TUHAN.”

⁴Kopongo raginio tulisi' ri Musa ngaangai' susuban ru TUHAN. Riminondom ra suabon no, nambaal i Musa ra rondo' altar ra lonson toojo ru gunung no, am patirongo' mopor am ruo batu; moonong batu manguakil ra rondo' ra bansa' ru Israil.

⁵Panusub boo i Musa ra kukula' ngaulun mamulok koson mapataak ra taak simbalui koson mapabansuk ra guang ru TUHAN[32] am niayuk mapataak ra kukula' ngainan sapi' koson ra taak simbalui koson makibarakat ra TUHAN.[33]

⁶Inalap ri Musa sampiruo intor ra raraa' ru bibiag no am pasasaro' no ralalom ru mangkuk-mangkuk no, am sampiruo no poyo pinasasar no ra rasawat ru altar.

⁷Kopongo raginio alapo' ri Musa kitab nabantuan ondo' tinulisan ra susuban ru TUHAN, am ra bolos matangil binasa' no ginio ra ulun raginilo. Konilo, “Gumagaya' akai ra TUHAN am mambaal ra ngaangai' susuban Nano.”

⁸Alapo' boo ri Musa raraa' ralalom ru mangkuk-mangkuk no am pawaso' ra ulun no. Kono, “Gitio noyo raraa' ondo' mamiot ra nabantuan ru TUHAN am akau paat ra Io nangani' ra ngaangai' susuban ti.”

⁹Kopongo raginio i Musa, Arun, Nadab, Abigu am tulu' ngoopor ngaulun tingganai no nagaloi ra gunung,

¹⁰am kakito nilo i Aki Kapuuno' ru Israil. Minigor Io ra rasawat ru rondo' koson ra sulig intor ra batu nilam, ondo' motomou koson ra limbowon matawang.

¹¹Nakito noyo ru tingganai Israil no i Aki Kapuuno'; kabalu' pana raginio kalo pinuso No ilo. Kopongo raginio pangakan am panginum ilo.

¹²Indagu boo TUHAN ri Musa, “Ratong noyo Raki' ra rasawat ru gunung. Giu' no mangani' Aku rirun ra ruo batu pamatikan. Batu raginilo noyo pamatikan Ku ra ngaangai' ukum Kuno. Mangani' Aku ra ngaangai' ukum no koson mangila' ra ulun raginilo.”

¹³Ginio ra tampos i Musa am i Josua, mangindangan riso, am pagaloi i Musa[34] ra gunung matulai no.

¹⁴Nambilin i Musa ra tingganai ru Israil no, “Paginaa ragiti saboi ra akai makasaguli'. Soroi i Arun am i Gur ragiti mabaya' ramuyun. Osoi-osoi makapangkuatan, tumuum risilo koson makisalasai.”

¹⁵Pagaloi i Musa ra Gunung Sinai am natauban ru gaun gunung no.

¹⁶Sinda karatangan ru TUHAN timinuun ra rasawat ru gunung no. Nakito ginio ru ulun ru Israil koson ra apui manimbula' ra tampak ru gunung no. Natauban ru gaun gunung no buoi kaanaman. Paat ra orou ra katulu', intor ra gaun no pampiau TUHAN ri Musa.

¹⁸Parayus boo i Musa nagaloi ra gunung saboi io nakasubol ralalom ru gaun no. Soroi io ra giu' no buoi apat ngoopor ngoorou am apat ngoopor ngorondom.