Read Timugon Murut KAINGKUALAN 29 Bible Online

KAINGKUALAN 29 - Timugon Murut bible

KAINGKUALAN 29

¹“Gitio noyo ondo' matanda' muno baalon koson patimpokon i Arun am anak-anak nano maa' raginio makapangandoi Raki' ayuk koson ra imam. Alap ra sanginan anak sapi' gawayan am ruo ngainan anak domba gawayan ondo' kalo najamaran.

²Alap ra tapung ondo' moonsoi kaga', kaa' kolondo' ragi, pambaal noyo ra ruti'. Santayaran ra ruti' no baalon latakin ra umau jaitun, am santayaran poyo kolondo' ra umau jaitun, am santayaran poyo baalon ra ruti' malilis ondo' kupilin ra umau.

³Pasuangon ngaangai' ruti' no ralalom ru bakul am pataakon ngaangai' no Raki' paat ra pataakon min sapi' gawayan am ruo ngainan domba gawayan koson ra taak simbalui.

⁴“Ibito' i Arun am anak-anak nano ra kulobon ru Kim Kuno am paugaro' upacara pambaguan ra inan risilo.

⁵Mopongo ginio pambayangon i Arun ra bayang ru imam: Bayang maawar, sukub ondo' bayangon manili ra efod, efod am utau am abot no.

⁶Pasampakon serban ra ulu nano, am takinin ra bubunga' ondo' makabatik ra ‘Patimpokon ra TUHAN’ ra serban no.

⁷Mopongo ginio alapon umau ru upacara am pasasaron ra rasawat ru ulu nano ra koson patimpokon io.

⁸“Mopongo ginio, susubon anak-anak ri Arun no matong am pambayangon ilo ra sukub;

⁹pogoboton ilo niayuk ra abot, am pansigalon ilo. Ginio noyo ralan muno ra patimpokon i Arun am anak-anak nano. Musiti' ilo am papag nilo mangandoi Raki' ayuk koson ra imam ra sabuoi-buoi no.

¹⁰“Mopongo ginio ibiton sapi' gawayan ra saang ru Kim Kuno. Susubon i Arun am anak-anak nano mapabanta' ra kalindu' nilo ra tampak ru ulu ru sapi' gawayan no.

¹¹Simbaluyon sapi' no ra saang Kuno, ra saang ru kulobon umpasan ra Kim.

¹²Alapon koborok raraa' ru sapi' gawayan no, am kupilin ra kalindu' muno raraa' no ra sangau-sangau ru altar no. Mopongo ginio pasasaron suwo ru raraa' no ra ragana' ru altar.

¹³Mopongo raginio, alapon ngaangai' lomok ru kalabuat ru sapi' no, am tampilon moonsoi kaga' ra angkayau, am karuruo bubua' am lomok no; ngaangai' no solobon ra rasawat ru altar koson pataakon Raki'.

¹⁴Kaa' kual, kungkung am tinai' ru sapi' gawayan no solobon ra liwar ru pangkiman. Ginio noyo taak ra sinimbalui koson pangampunan ra tula ru imam-imam.

¹⁵“Alapon sanginan intor ra domba gawayan no, am susubon i Arun am anak-anak nano mapabanta' ra kalindu' nilo ra tampak ru ulu ru domba no.

¹⁶Simbaluyon domba gawayan no, am raraa' no pawason ra kaapat-apat sapapa' ru altar.

¹⁷Puputulon domba no ra kukula' ngaputul. Baguin kalabuat am paa no, am ngaangai' no pabantaan ra rasawat ru ulu ru domba gawayan no am pinutul ra bokon no.

¹⁸Solobon ngaangai' domba gawayan no rasawat ru altar koson taak akanon.

¹⁹“Alapon sanginan poyo domba gawayan iono domba paat ra upacara patimpokon. Susubon i Arun am anak-anak nano mapabanta' ra kalindu' ra tampak ru ulu ru domba gawayan no.

²⁰Simbaluyon domba gawayan no. Alapon boo koborok raraa' no am pakupilon ra talingo ra pamiris ri Arun am anak-anak nano, am ra pangina' ru kalayam ra pamiris nilo. Pawason suwo ru raraa' no ra kaapat-apat sapapa' ru altar no.

²¹Alapon koborok raraa' ondo' rasawat ru altar am koborok umau ru upacara, am patakison ngaangai' no ri Arun am bayang nano, am niayuk ra anak-anak nano am ra bayang nilo. Gitio ralan ra i Arun, anak-anak nano am bayang nilo patimpokon Raki'.

²²“Alapon lomok ru domba gawayan no, iku' ondo' mokolomok, lomok ru kalabuat, tampilon moonsoi kaga' ra angkayau, karuruo bubua' am lomok no, am niayuk paa ru domba ra pamiris.

²³Intor ra bakul ru ruti' ondo' nakataak Raki', alapon rondo' intor ra moonong salinut ru ruti' no: Rondo' binaal intor ra umau jaitun, rondo' binaal ra kolondo' umau jaitun, am rondo' ruti' malilis.

²⁴Pabantaan ngaangai' ruti' ti ra kalindu' ri Arun am anak-anak nano, am susubon ilo mapataak ra ngaangai' no Raki' koson taak paluntukon.

²⁵Alapon boo ngaangai' ruti' no intor risilo am solobon rasawat ru altar, rasawat ru taak simbalui koson mapabansuk ra guang Kuno,[42] koson taak akanon.

²⁶“Alapon kubab ru domba gawayan no am pataakon Raki' koson taak paluntukon. Kubab ru domba gawayan no tayar muno.

²⁷“Ralalom upacara patimpokon ru imam, kubab am paa ru domba gawayan ondo' pakayon ralalom upacara patimpokon no musiti' pataakon Raki' koson taak paluntukon am pasuayon tayar ru imam-imam.

²⁸Gitio noyo kapatasan Kuno ra kalo boo makulau: Paat ra matong ulun Kuno mapataak ra taak simbalui koson makibarakat ra TUHAN,[43] musiti' kubab am paa ru bibiag no pataakon ra imam-imam. Tampilon raginio noyo taak intor ra ulun Kuno Raki', TUHAN.

²⁹“Bayang ru imam longgom ri Arun musiti' patungkuson ra anak-anak nano ru matoi io, maa' raginio mabayang nilo ginio paat ra patimpokon.

³⁰Anak ri Arun ondo' malit ri Arun ra imam, am mumpos ra Kim Kuno koson mangandoi ralalom Lamin Pansunuran, musiti' mambayang raginio buoi katuluan.

³¹“Alapon kual ru domba gawayan ondo' pinakai ra patimpokon ri Arun am anak-anak nano, am tonokon kual no ra intok mapasau.

³²Musiti' i Arun am anak-anak nano mangakan ra kual ru domba no am niayuk suwo ru ruti' ralalom ru bakul, giu' ra kulobon ru Kim ru saang Kuno.

³³Musiti' akanon nilo atan ondo' pinakai ralalom upacara pangampunan ra tula paat ra patimpokon risilo. Imam ayuk mangakan ra akanon no sabap ra akanon no mapasau.

³⁴Amon ru susuab ti ra suabon no, lakat poyo soroi kual kapoam ruti' ondo' kalo makai' kaakan, akanon no musiti' solobon am kalo maakan sabap ra akanon no mapasau.

³⁵“Paugaron upacara patimpokon ri Arun am anak-anak nano buoi katuluan koson ra nanusuban Kuno rirun.

³⁶Moonong orou musiti' kou mapataak ra sanginan sapi' gawayan koson taak simbalui koson mangampun ra tula. Taak simbalui ti mapakapasau ra altar. Kupilin boo altar no ra umau jaitun koson mapakapasau raginio.

³⁷Baalon ginio moonong orou buoi katuluan. Ginio ra mapasau boo ngaangai' altar no, am atan ayuk ondo' makatiu' ra altar no musiti' pataakon ra TUHAN, am atan ayuk ondo' makakambong ra altar no mausung sabap ra kaikangan ru kapasawan ru ginio.”[44]

³⁸“Moonong orou saboi ra mantilayun, musiti' kou mapataak ruo ngainan anak domba makaumur sambilor koson taak simbalui ra rasawat ru altar no.

³⁹Musiti' sanginan anak domba pataakon tampilon ra susuab ti am sanginan poyo tampilon ra mai' ti.

⁴⁰Pabayaan ra anak domba ondo' kasaa', pataakon sakilogram tapung gandum ra moonsoi kaga', ondo' linatakan ra salito umau jaitun kopoyo. Pasasaron salito wain koson ra taak.

⁴¹Pataakon boo anak domba ondo' karuo tampilon ra mai'. Pabayaan ra anak domba no, pataakon tapung gandum, umau jaitun am wain ondo' suang no nogondo' koson ra tampilon ra susuab ti. Ginio noyo taak akanon Raki', TUHAN am owou no mapabansuk ra guang Kuno.

⁴²Koson ra mantilayun, taak simbalui koson mapabansuk ra guang Kuno[45] musiti' pataakon ra saang Kuno giu' ra kulobon ru Kim Kuno. Giu' no tumuum Aku ra ulun Kuno am mindagu rirun.

⁴³Giu' no tumuum Aku ra ulun ru Israil, am sinda ondo' kukuliat intor ra saang Kuno mapakapasau ra intok no.

⁴⁴Mapakapasau Aku ra Kim am altar no, am patimpokon Ku i Arun am anak-anak nano koson mangandoi Raki' ayuk koson ra imam.

⁴⁵Mayan Aku sumimpung ra ulun ru Israil, am masauk Aku ri Aki Kapuuno' nilo.

⁴⁶Makapandai ilo ra Aku noyo TUHAN i Aki Kapuuno' nilo ondo' nagibit risilo miningkual intor ra Misir, maa' raginio makaayan Aku risilo. Aku noyo TUHAN i Aki Kapuuno' nilo.”