Read Timugon Murut KAINGKUALAN 3 Bible Online

KAINGKUALAN 3 - Timugon Murut bible

KAINGKUALAN 3

¹Paat ragili nagalung i Musa ra domba am kambing ri Jitro iwan nano, imam giu' ra pagun ru Midian. Paat ra io magibit ra bibiag tinambiag no sumandaup ru tana' kaagisan, nakasaboi io ra Gunung Sinai, gunung ra matulai.

²Giu' no minintalang malaikat ru TUHAN ri Musa ralalom ru apui ondo' manimbula' ra tatanga' ru bulungkut. Nakito no bulungkut ti manimbula', kaa' kalo nosolob.

³“Makaimuag!” Mangkara' i Musa, “Kua ra bulungkut no kalo mosolob? Moonsoi inggaarin ku.”

⁴Paat ra nakito ru TUHAN ra minggaar i Musa, pampiau Io riso intor ra tanga' ru bulungkut no, “Musa! Musa!” Taam i Musa, “Iou, giti aku.”

⁵Indagu TUHAN, “Pai' inggaar. Paguso' kasut muno, sabap ra intok binigaran muno matulai,

⁶Aku ti i Aki Kapuuno' ondo' sambaan ru kinamatuaan muli, i Aki Kapuuno' ri Abragam, ri Isak am ri Jakub.” Ginio ra silii' ri Musa bulos nano sabap ra malaa' io magilong ri Aki Kapuuno'.

⁷Indagu boo TUHAN, “Nakito Ku noyo kaimbalaan ru bansa' Kuno giu' ra Misir. Naining Ku noyo ilo naguros makilabus intor ra ulun-ulun nangulipon no. Sotopot no nakatutun Aku noyo ra ngaangai' kaimbalaan nilo.

⁸Ginio ra tumuun Aku mongoi pampalabus risilo intor ra ulun ru Misir, am magibit risilo mingkual intor ra pagun no am mongoi ra rondo' pagun ondo' mapila', langkaya' am malabung. Paat ragitio pagun no inayanan ru ulun ru Kanaan, Git, Amori, Piris, Giwi am Jibusi.

⁹Sotopot no naining Ku noyo golok ru ulun Kuno am nakito Ku ati kulaan ru ulun ru Misir nangulipon kaga' risilo.

¹⁰Raino manusub Aku rirun mongoi uma' ra raja' ru Misir maa' raginio matingganai mu ulun Kuno mingkual intor ra pagun ru raja' no.”

¹¹Kaa' indagu i Musa ri Aki Kapuuno', “Osoi kia aku ti? Kalo makakau' aku muma' ra raja' am magibit ra ulun ru Israil mingkual intor ra Misir.”

¹²Indagu i Aki Kapuuno', “Mabaya' Aku rirun. Paat ra maibit mu noyo ulun ru Israil mingkual intor ra Misir, sumambayang kau samba Raki' ra gunung ti. Ginio noyo inono' ra Aku nanusub rirun.”

¹³Kaa' indagu i Musa, “Amon ru makatuum aku ra ulun ru Israil am mindagu risilo, ‘I Aki Kapuuno' ru kinamatuaan min nanusub raki'’, mangkuot ilo, ‘Osoi kia inggalan nali?’ Atan moonsoi paraguon kuno risilo?”

¹⁴Indagu i Aki Kapuuno' ri Musa, “Aku noyo AKU.[6] Gitio noyo ondo' musiti' muno paraguon risilo, ‘Io ondo' nanabit ra Io noyo AKU nanusub noyo raki' mongoi ramuyun.’

¹⁵Balai' ulun ru Israil ra AKU, TUHAN i Aki Kapuuno' ru kinamatuaan nilai, i Aki Kapuuno' ri Abragam, ri Isak am ri Jakub, nanusub noyo rirun mongoi risilo. Ginio noyo inggalan Kuno ra sabuoi-buoi no. Ginio noyo panabitan Raki' ru ngaangai' papag ra orou matong.

¹⁶Ongoi noyo am timungo' tingganai-tingganai ru ulun ru Israil no am balai' ilo ra Aku, TUHAN i Aki Kapuuno' ru kinamatuaan nilai, i Aki Kapuuno' ri Abragam, ri Isak am ri Jakub minintalang noyo rirun. Balai' ilo ra minatong Aku noyo risilo am nakakito noyo ra atan binaal ru ulun ru Misir risilo.

¹⁷Napatas Ku noyo magibit risilo mingkual intor ra Misir, intok ilo inimbolo', am magibit risilo mongoi ra rondo' tana' ondo' langkaya' am malabung, iono pagun ru ulun ru Kanaan, Git, Amori, Piris, Giwi am Jibusi.

¹⁸Ulun Kuno mangining ra ragu muno. Mongoi kou toojo uma' ra raja' ru Misir mabaya' ra tingganai-tingganai ru ulun ru Israil no am mindagu riso, ‘TUHAN i Aki Kapuuno' ru ulun ru Ibrani minintalang noyo ramon. Raino iowo' akai no mugar buoi talu ngoorou pangkiralanan mongoi ra tana' kaagisan, mampataak ra taak simbalui ra TUHAN i Aki Kapuuno' mai.’

¹⁹Nakapandai Aku ra raja' ru Misir kalo mapaugar ramuyun, ondo' ayuk am ru jajalin io mambaal raginio.

²⁰Kaa' mamakai Aku ra kuasa' Kuno am mangukum ra ulun ru Misir am mambaal ra sauk ondo' makalalaa' ra giu' no. Mopongo raginio paugaron no akau.

²¹Mangkinibit Aku ra ulun ru Misir mangurumat ramuyun maa' raginio paat ra akau, ulun Kuno mangiruan ra intok raginio, kalo mugar kau ra kolondo' unu'.

²²Moonong ruandu' ru Israil makitaak ra bayang, am niayuk kuliamos mas am pirok intor ra pasambalayan nano ulun ru Misir am intor ra ruandu' ru Misir ondo' minayan ra pasambalayan nano. Papakayin min ginio ra anak-anak min. Ginio noyo ralan min mampagaau ra rapu' ru ulun ru Misir.”