Read Timugon Murut KAINGKUALAN 30 Bible Online

KAINGKUALAN 30 - Timugon Murut bible

KAINGKUALAN 30

¹“Pambaal no ra rondo' altar intor ra tataun akasia, koson panalaban ra kaminyan.

²Musiti' altar no apat persegi, gawar no 45 ngasintimito am pila' no 45 ngasintimito am sawat no 90 ngasintimito. Musiti' sangau ra kaapat-apat pisuk no mogondo' ra altar no.

³Tampilon ra rasawat no am kaapat-apat kiing am niayuk sangau-sangau no angkupin ra mas kopoyo, am baalin ra bingkai mas ra liput no.

⁴Pambaal noyo ra ruo golong intor ra mas, am patakinon golong no ragana' ru bingkai ra karuruo kiing no, koson mapasanggap ra tataun pamandas ra altar.

⁵Musiti' tataun pamandas no baalon intor ra tataun akasia am angkupin ra mas.

⁶Pabantaan altar ti ra liwar ru tabir ondo' patairon ra saang ru Kaban Nabantuan, intok Kuno tumuum rirun.

⁷Moonong susuab ti, paat ra tomposon ri Arun lampung no, musiti' no solobon kaminyan maamis owou ra rasawat ru altar no.

⁸Musiti' no baalon ondo' mogondo' paat ra io mansikit ra lampung no tampilon ra mai' ti. Musiti' taak kaminyan no rayuson baalo' ra sabuoi-buoi no.

⁹Rasawat ru altar no, pai' pataako' atan pana kaminyan ra inggalarin, kapoam taak simbalui kokoson ra bibiag, kapoam taak simbalui kokoson ra kanuaran; pai' sasari' ra atan pana taak simbalui kokoson ra wain ra rasawat no.

¹⁰Musiti' i Arun sambilor igondo' mambaal ra upacara pamasawan ra altar am kupilin ra raraa' ru bibiag ondo' pataakon koson taak simbalui koson mangampun ra tula, ra kaapat-apat sangau ru altar no. Baal ragitio musiti' baalon moonong bilor ra sabuoi-buoi no. Musiti' matulai ngai' altar ti am patimpokon Raki', TUHAN.”

¹¹Indagu TUHAN ri Musa,

¹²“Paat ra untobon mu ulun ru Israil, musiti' moonong ungkuyon mambayar Raki' ra ruit pamuli' riso maa' raginio kalo malumpa' io ru karaat paat ra panguntaban no paugaron.

¹³Musiti' moonong ulun ondo' untobon ralalom panguntaban no mambayar ra suang ru ruit inaru', sumugut ra logo ondo' inaru' giu' ra Kim Kuno. Musiti' moonong ulun mambayar ru suang raginio koson taak Raki'.

¹⁴Moonong ulun ondo' untobon ralalom panguntaban no, iono moonong ungkuyon makaumur nasailan ra ruo ngoopor ngambilor musiti' mambayar ra suang ru ginio.

¹⁵Ulun langkaya' kalo pambayaron masuang am ulun musikin kalo pambayaron sanganu, paat ra ilo mambayar ra ruit pamuli' risilo no.

¹⁶Timungon ruit no intor ra ulun ru Israil am pakayon ginio koson kaatangan ru sambayang ralalom Kim Kuno. Ngaangai' no iono ruit pamuli' risilo, am magail Aku mangkara' ra mangampin risilo.”

¹⁷Indagu TUHAN ri Musa,

¹⁸“Pambaal noyo ra rondo' bisin intor ra gangsa' am antulan no pana intor ra gangsa' niayuk. Pabantaan bisin no ra lolot ru Kim am altar, am suangin bisin no ra timug.

¹⁹Musiti' i Arun am anak-anak nano mambagu' ra kalindu' am kalayam ra timug no,

²⁰ra kalo poyo mumpos ra Kim am minggaar ra altar koson mapataak ra akanon. Ginio ra kalo potoyon ilo.

²¹Musiti' ilo mambagu' ra kalindu' am kalayam maa' raginio kalo matoi ilo. Aturan ragitio musiti' gagayaan nilo am papag nilo ra sabuoi-buoi no.”

²²Indagu TUHAN ri Musa,

²³“Alap ra apa' pampagamis ra akanon ondo' moonsoi kaga': Onom ngakilogram mur timug, talu ngakilogram kulapa' ru kaningau maamis owou, talu ngakilogram tabu maamis owou,

²⁴Onom ngakilo tataun tija (ngaangai' no timbangon maya' ra timbangan ondo' pakayon ralalom Kim Kuno), am apat ngalito umau jaitun,

²⁵am pambaal ra umau upacara ondo' latakin koson ra umau maamis owou.

²⁶Pakayon umau upacara no mampaluit ra Kim Kuno, Kaban Nabantuan,

²⁷mija' am ngaangai' kuliamos no, tampakan ra lampung am kuliamos no, altar panalaban ra kaminyan,

²⁸altar panalaban ra taak simbalui am niayuk ngaangai' kuliamos no, am bisin am niayuk antulan no.

²⁹Musiti' mu patimpokon ngaangai' kuliamos no am koson raginio ralan no, am ngaangai' no totopot matulai. Atan ayuk makatiu' ra kuliamos no musiti' pataakon ra TUHAN, am osoi ayuk mangambong ra ngaangai' no mausung sabap ra kaikangan ru kapasawan no.[46]

³⁰Paumawon umau upacara no ri Arun am anak-anak nano maa' raginio patimpokon ilo ra imam koson mangandoi Raki' ayuk.

³¹Balai' ulun ru Israil ra umau upacara ondo' matulai no paluntukon Raki' ra sabuoi-buoi no.

³²Umau upacara no kalo paumawon ra ulun kaindalaman, am latok ra mogondo' kalo pakayon koson mambaal ra umau ra bokon. Umau upacara no mapasau am musiti' karaan ra matulai.

³³Osoi mambaal ra umau koson ra umau upacara, kapoam ondo' mamakai ra umau no ra ulun sala' ka imam, kalo boo karaan ra ulun Kuno.”

³⁴Indagu TUHAN ri Musa, “Alap ra kukula' salinut ru apa' pampagamis ra akanon ondo' maamis owou ondo' suang no mogondo': Salong, umang ru lokan, pulut ru raksamala am niayuk kaminyan kopoyo.

³⁵Intor raginio ngai' pambaal ra kaminyan koson mambaal ra umau maamis owou. Ruangin ra usi' koson saukon ginio ra kopoyo am matulai.

³⁶Panutu ra santayaran intor raginio saboi maumok. Ibiton inumok no ralalom Kim Kuno, am pataukon inumok no ra saang ru Kaban Nabantuan. Musiti' kaminyan no karaan ra kuliamos ondo' masapau kaga'.

³⁷Pai' pakayo' pinaratok no koson mambaal ra atan pana kaminyan rirun galama'. Musiti' karaan kaminyan no matulai am paluntukon Raki'.

³⁸Osoi mamakai ra pinaratok no koson mambaal ra umau maamis owou, kalo boo karaan ra ulun Kuno.”